Мушкилоти ҳозима, аз қабили дарунравӣ ва қабзият дар ҳомиладорӣ маъмуланд. Одатан инро ба тағйирёбии гормонҳо, тағйирот дар парҳез ва стресси иловагӣ нисбат медиҳанд.
Диарея ба се ва ё беш аз он маротиба омадани наҷосати обдор дар як рӯз гуфта мешавад. Диареяи доимӣ метавонад боиси беобшавӣ ва аз худ накардани ғизои кофӣ гардад. Дар давраи ҳомиладорӣ ин метавонад ба зан ва ҳомила зарар расонад. Занони ҳомила, ки мубталои дарунравии шадид ва тӯлонӣ ҳастанд, бояд фавран ба ёрии тиббӣ муроҷиат кунанд.
Диарея чист?
Диарея як бемории хеле маъмул аст, ки метавонад ба ҳама, аз ҷумла занони ҳомиладор таъсир расонад. Тибқи маълумоти Коллеҷи амрикоии гастроэнтерология, дар бораи пайдоиши диарея дар занони ҳомила тадқиқотҳои муосири кофӣ вуҷуд надоранд. Диарея дар давраи ҳомиладорӣ метавонад дар натиҷаи тағйироти гормоналӣ ё ҷисмонӣ пайдо шавад. Аммо ин ҳолат метавонад ба ҳомиладорӣ алоқаманд набошад, балки дар натиҷаи сироят ё ихтилоли рӯда пайдо шавад.
Сабабҳои дарунравӣ
Тағйироти гормоналӣ
Яке аз тағйиротҳое, ки метавонад боиси дарунравӣ гардад, баланд шудани сатҳи простагландин мебошад. Простагландинҳо низ, мисли окситотсин, ба зиёд шудани кашишхӯрии бачадон мусоидат мекунанд. Аммо онҳо метавонанд ҳаракатро дар тамоми узвҳои ҳозима низ зиёд кунанд. Зиёдшавии миқдори простагландин низ метавонад боиси дарунравӣ дар давраи ҳайз гардад. Препаратҳои сунъии простагландин низ метавонанд боиси дарунравӣ гарданд.
Дарунравии сироятӣ ҳангоми ҳомиладорӣ
Сироятҳои рӯда сабаби асосии дарунравӣ мебошанд. Дар одамони гирифтори дарунравии сироятӣ, ба ғайр аз дарунравӣ ва наҷосати обӣ, метавонанд аломатҳои зерин низ мушоҳида шаванд:
- наҷосати хунин;
- дилбеҳузурӣ;
- қайкунӣ;
- таб;
- ларзиш;
- сарчархзанӣ.
Организмҳое, ки боиси дарунравии сироятӣ мешаванд, ин бактерияҳо, масалан эшерихия коли ё кампилобактер, салмонелла ё шигелла, вирусҳо ва паразитҳо мебошанд.
Инсон метавонад ин организмҳои зарароварро тавассути хӯрок ё оби ифлосшуда ба худ гузаронад. Ҳангоми сафар ба кишварҳои дар ҳоли рушд қарордошта дарунравии сироятӣ метавонад хатарнок бошад. Аз ин рӯ, барои пешгирӣ кардани дарунравӣ ҳангоми ҳомиладорӣ, зани ҳомила бояд қоидаҳои гигиениро қатъиян риоя кунад.
Бемориҳои системаи ҳозима
Диареяи музмин асосан метавонад нишонаи осеби рӯда бошад, масалан, бемориҳои илтиҳобии рӯда, аз ҷумла
- селиакия;
- бемории Крон;
- синдроми рӯдаи таҳрикпазир;
- афзоиши бактерияҳои рӯдаи борик.
Ҳолатҳои дар боло зикршуда метавонанд боиси бисёр аломатҳои дигар гарданд.
Масалан:
- дарди шикам, дарди кашанда;
- дамкунӣ ва варами шикам;
- камшавии вазн;
- хастагӣ;
- дилбеҳузурӣ ва қайкунӣ;
- мушкилоти пӯст ва буғумҳо;
- камхунӣ.
Агар дарунравӣ бо дигар аломатҳои ба монанди дар боло зикршуда ҳамроҳ шавад, фавран ба духтур муроҷиат кунед.
Сабабҳои дигар
Исҳол ё дарунравӣ ҳангоми ҳомиладорӣ инчунин метавонад аз сабабҳои зерин ба вуҷуд ояд:
- аллергия ба хӯрок;
- тағйироти вобаста ба ғизо;
- стресс ҳангоми ҳомиладорӣ;
- баъзе доруҳо;
- сорбитол;
- ксилитол ё маннитол.
Дар давоми давраи ҳомиладорӣ зан бояд ба ғизое, ки истеъмол мекунад, эҳтиёткор бошад ва ҳангоми зарурат ҳатман бо мутахассис машварат кунад.
Фоиданок: Ҳангоми ҳомиладорӣ чӣ мумкин нест? 11 маҳсулоти зарарноктарин
Кай бояд ба духтур муроҷиат кард?
Диарея метавонад боиси беобшавии шадид ва норасоии ғизо гардад, ки он барои зан ва ҳомила хатарнок мебошад.
Агар зани ҳомиладор ҳолатҳои зеринро аз сар гузаронад, бояд фавран ба ёрии тиббӣ муроҷиат намояд:
- наҷосати хундор ё чиркдор;
- дарунравие, ки зиёда аз 48 соат давом кардааст;
- дар давоми 24 соат 6 ё бештар маротиба рафтани дарун
- таби 39 С ё аз он баланд;
- тез-тез қай кардан;
- дарди шадид дар рӯда ва шикам;
- аломатҳои беобшавӣ, масалан, пешоби рангаш торик, ташнагӣ, хушкии даҳон, сарчархзанӣ ё кам ҷудо шудани пешоб.
Табобати дарунравӣ
Зани ҳомиладор бо нӯшидани миқдори зиёди об пеши роҳи беобшавиро мегирад. Нӯшидани моеъҳои электролитӣ низ муҳим аст.
Ғайр аз ин,
- булён ва шӯрбоҳои ҷӯшондашуда;
- нӯшокиҳои минералӣ;
- шарбатҳои мевагӣ;
- нӯшокиҳои бекофеин.
Барои пешгирии беобшавӣ ва кӯмак ба занони ҳомила дар барқарор кардани электролитҳои дар натиҷаи дарунравӣ гумшуда, табибон метавонанд истеъмоли маҳсулоте ба монанди шарбати себ, банан, картошкаи оддӣ, биринҷ ва нони бирёншударо тавсия диҳанд.
Илова бар ин, аз маҳсулоте, ки дарунравиро шиддат мебахшанд, ба монанди маҳсулоти ширӣ, равған, маҳсулоти қанддор ва нӯшокиҳои кофеиндор эҳтиёт бошед.
Табобати дарунравӣ бо доруҳо
Пеш аз қабули ҳар гуна доруи нав дар давраи ҳомиладорӣ бо табиб машварат кунед. Баъзе доруҳо метавонанд зараровар бошанд ва бехатарии баъзе доруҳо метавонад номаълум бошад.
Ин мақола дар асоси маълумоти Medicalnewstoday ва gi.org аз ҷониби дастаи «Lalu» омода шудааст.
