Дар баъзе занон дар марҳилаҳои аввали ҳомиладорӣ қабзият мушоҳида мешавад, дар занони дигар бошад, мумкин аст умуман мушоҳида нашавад.
Дар ин мақола мо сабабҳои қабзият ҳангоми ҳомиладорӣ ва чораҳои бехатари табобатро, ки дар шароити хона барои сабук кардани ин гуна нороҳатӣ дар занон истифода мешаванд, баррасӣ мекунем.
Сабабҳо
Сабаби қабзият ба он вобаста аст, ки дар кадом марҳилаи ҳомиладорӣ рух медиҳад. Ба ин сабабҳои эҳтимолии зерин дохил мешаванд:
Гормонҳо: тағйирёбии миқдори гормонҳо дар давраи барвақти ҳомиладорӣ боиси сустшавии ҳаракати рӯдаҳо ва хориҷ шудани наҷосат аз рӯдаҳо мегардад.
Дар ин ҳолат, миқдори ҷаббиши об дар рӯдаи ғафс меафзояд, ки ин боиси сахт шудани наҷосат мегардад.
Витаминҳои ҳомиладорӣ: витаминҳои пренаталӣ, махсусан доруҳои зиддикамхунӣ аз оҳан бой мебошанд, ки баъзан норасоии витаминҳои асосӣ дар давраи ҳомиладорӣ ба ҳисоб меравад. Оҳан боиси сиёҳ шудани наҷосат, душвор омадани он ва қабзият ҳангоми ҳомиладорӣ мегардад.
Фишори бачадон: дар давраи охири ҳомиладорӣ, дар натиҷаи калон шудани ҳаҷми бачадон ба рӯдаҳо фишор меояд, ки ба ҳаракати наҷосат дар рӯдаҳо душворӣ меорад.
Илова бар ин, баъзан ба ғайр аз ҳаракати рӯдаҳо, варам, нороҳатӣ дар меъда ва пайдоиши наҷосати сахт, хушк ва дарднок низ метавонанд боиси пайдоиши қабзият гарданд.
Дар натиҷа, эҳсоси пурра хориҷ карда натавонистани наҷосат низ ба вуҷуд меояд. Қабзият, махсусан дар давоми давраи ҳомиладорӣ бисёр нороҳатиҳоро ба вуҷуд меорад.
Табобати қабзият ҳангоми ҳомиладорӣ дар шароити хона
Усулҳои бехатари табобат дар шароити хона мавҷуданд, ки қабзиятеро, ки дар занон дар давраи ҳомиладорӣ зуд-зуд пайдо мешавад, сабук мекунанд. Инҳо:
Нах: гирифтани нахҳои иловагӣ ё истеъмоли бештари хӯрокҳои нахдор, инчунин истеъмоли меваҳо, сабзавот ва ғалладонагиҳои пурра боиси зиёд шудани миқдори наҷосат ва осон шудани ҳаракати масса дар рӯдаҳо мегардад. Калонсолон бояд ҳар рӯз ба миқдори 28 ва 34 грамм нах истеъмол кунанд.
Моеъ: нӯшидани миқдори кофии об барои мулоим ва осон гузаштани наҷосати ҷамъшуда муҳим аст. Агар шахс ҳис кунад, ки об ба ӯ кӯмак намекунад, метавонад ба парҳези худ шӯрбо, чой ва афшураҳои табиии мевагӣ ё сабзавотиро илова кунад.
Фоиданок: Сабзавоти фоиданок барои зани ҳомиладор
Серҳаракатӣ: фаъол будан ба ҳаракати наҷосат дар рӯдаҳо мусоидат мекунад, машқҳои мунтазам бо розигии духтур барои сабук кардани қабзият кӯмак мерасонад. Агар имконияти машқ кардан набошад, кӯшиш кунед, ки ҳар рӯз пиёда гардед.
Пробиотикҳо: дар рӯда миллионҳо бактерияҳои солим зиндагӣ мекунанд ва барои дуруст кор кардани он кӯмак мерасонанд. Пробиотикҳо ба афзоиши бактерияҳои рӯда бо штаммҳои солими онҳо мусоидат намуда, дар мӯътадил ва мунтазам шудани ҳаракати рӯда иштирок мекунанд.
Усулҳои дигари табобат
Агар усулҳои дар боло зикршудаи табобат дар шароити хона кор надиҳанд, бо духтур дигар вариантҳои онро муҳокима кардан мумкин аст.*
Истеъмоли витаминҳои пренаталӣ аз ҷониби занон миқдори оҳанро зиёд мекунад, дар ин ҳолат духтурон витаминҳои дорои миқдори ками оҳанро тавсия медиҳанд.
Усули табобати аввалияи тиббии қабзият ҳангоми ҳомиладорӣ ин доруҳои исҳоловар мебошанд, ки ба бемор ҳангоми ба ҳоҷатхона рафтан роҳат ва сабукии зиёд меоранд.
Истифодаи доруҳои исҳоловар одатан бехатар аст, аммо беҳтар аст, ки аз доруҳои исҳоловарии ангезанда ва қавӣ худдорӣ кунед, зеро онҳо метавонанд кашишхӯрии бачадонро зиёд кунанд.
Бо вуҷуди он ки аксари доруҳои исҳоловар бе дорухат фурӯхта мешаванд, барои фаҳмидани он ки кадоме аз онҳо бехатар аст, бояд бо духтур маслиҳат кард.
Дар бораи баъзе доруҳое, ки дар давраи ҳомиладорӣ истифода бурдан мумкин аст, маълумоти мухтасар медиҳем.
Зан метавонад дар давоми ҳомиладорӣ аз доруҳои зерини бехатари исҳоловар истифода барад:
Моддаҳои массасоз
Онҳо ба таркиби наҷосат ҳамроҳ шудани нах ва ба миқдори зиёд ҷаббида шудани об ёрӣ мерасонанд. Бо ин роҳ, онҳо наҷосатро мулоимтар ва хориҷшавии онро осонтар мегардонанд.
Ин навъи воситаҳои исҳоловар метавонанд боиси спазм ва нороҳатӣ гарданд, бинобар ин зани ҳомиладор бояд бо духтур машварат карда, истеъмоли чунин воситаҳоро бо вояи хурд оғоз кунад ва бо оби бештар нӯшад.
Масалан, моддаҳои масса ҳосилкунанда писеллиум, метилселлюлоза ва поликарбофилро дар бар мегиранд.
Воситаҳои нармкунандаи наҷосат
Воситаҳои нармкунандаи наҷосат барои нигоҳ доштани оби кофӣ дар наҷосат ёрӣ мерасонанд, ки ин онро мулоим ва хориҷшавиашро осон мегардонад.
Воситаҳои нармкунандаи наҷосат одатан ба занони ҳомила тибқи тавсияи духтур бо дорухат дода мешаванд.
Воситаҳои равғании исҳоловар
Воситаҳои равғании исҳоловар ба рӯйи наҷосат қабати лағжанда илова мекунанд ё ба берун баровардани наҷосати дар рӯда монда ёрӣ мерасонанд.
Шамъчаҳои глитсерин як навъи воситаҳои равғании исҳоловар мебошанд. Пеш аз истифодаи ин суппозиториҳо, махсусан ҳангоми ҳомиладорӣ, ҳамеша бо мутахассиси соҳаи тандурустӣ машварат кардан лозим аст.
Воситаҳои исҳоловари осмотикӣ
Ин воситаҳои исҳоловар миқдори обро дар рӯдаҳо зиёд карда, ба мулоим шудани наҷосат мусоидат мекунанд. Онҳо инчунин ҳаракати наҷосатро қад-қади рӯда таъмин мекунанд.
Ин навъи воситаҳои исҳоловар инчунин метавонанд боиси дамиши шикам ва спазм гарданд.
Оқибатҳои қабзият ҳангоми ҳомилагӣ
Дар аксари ҳолатҳо қабзият ҳангоми ҳомиладорӣ кӯтоҳмуддат буда, бе табобат ё бо дахолати ҳадди ақал мегузарад. Дар ҳолатҳои камназир, қабзияти тӯлонӣ метавонад ба ҳолатҳои вазнин оварда расонад, пеш аз сар задани чунин ҳолатҳо, бояд бо духтур машварат кард ва чораҳои зарурии табобатиро андешид.
Истифодаи пайвастаи доруҳои исҳоловар метавонад боиси он гардад, ки рӯдаҳо системаи мустақили ихроҷи наҷосатро "фаромӯш" кунанд.
Ин доруҳо инчунин дар баъзе одамон боиси вайрон шудани мувозинати электролитҳо ва моеъ мегарданд.
Ин мушкилот одатан ба одамоне таъсир мерасонанд, ки мушкилоти дигари саломатӣ доранд, масалан, диабети қанд ё бемориҳои гурда.
Дар бораи навъҳои воситаҳои исҳоловар ва чанд маротиба қабул кардани онҳо ҳатман бо духтур машварат кардан лозим аст.
