Құрғақ көз синдромы — көздің ылғал жетіспеушілігінен туындайтын құрғау жағдайы, ол әйелдерде көбінесе гормоналды өзгерістер кезінде, мысалы, жүктілік немесе емізу кезінде көрініс береді. Жүктілік кезінде құрғақ көз синдромы, әдетте, бірінші триместрдің соңында күшті гормоналды өзгерістерге байланысты «өршиді».
Жүктілік кезеңінде байқалатын гормоналды өзгерістер көздің құрғауына себеп болуы мүмкін.
Әдетте жүктілік кезінде көздің құрғауы жайсыздық тудырғанымен, қауіпсіз болып табылады. Босанғаннан кейін бірнеше апта өткен соң, гормондар деңгейі қалпына келгенде бұл жағдай көбінесе басылады.
Жүктілік кезінде көздің құрғау белгілері
Жүктілік кезінде көздің құрғауы түрлі белгілермен көрініс табуы мүмкін, соның ішінде бұл белгілер екі көзде де қатар пайда болуы ықтимал. Бұл белгілерге мыналар жатады:
- қызару;
- көздің жасаурауы (бұл күтпеген жағдай болып көрінуі мүмкін, бірақ бұл ағзаның мәселені шешуге тырысуынан болады);
- көздің қышуы, ашуы немесе шаншып ауыру сезімі;
- көздің бұлдырауы немесе ішінде бірдеңе тұрғандай сезілуі;
- ұйқыдан оянғанда қабақтың жабысып қалуы;
- жанаспалы линзаларды тағу кезіндегі қолайсыздық;
- жарыққа сезімталдық;
- түнде нашар көру;
- көздің талуы.
Пайдалы: Жүктілік кезінде іште болатын өзгерістер
Жүктілік кезінде көздің құрғау себептері?
Құрғақ көз синдромы — кез келген адамда пайда болуы мүмкін кең таралған дерт. Бұл әдетте көзді ылғал әрі жайлы ұстау үшін көз жасы жеткілікті бөлінбеген кезде орын алады.
Көз жасы жай ғана су емес. Ол су, шырыш және майлардан тұрады. Бұл нәзік қоспа көзді ылғалды әрі таза сақтауға көмектеседі. Жүктілік кезінде бұл жағдай әдетте гормондар деңгейінің өзгеруі салдарынан дамиды.
Гормоналды өзгерістер дені сау жүктілік үшін маңызды, бірақ олар көздің құрғауы сияқты жанама әсерлерді тудыруы мүмкін. Егер жүкті болсаңыз және кенеттен көзіңіздің құрғағанын байқасаңыз, бұл қалыпты жағдай, өйткені жүктілік гормондары ағзаңызда көз жасының аз бөлінуіне себеп болады.
Жүктілік кезінде көздің құрғауына себеп болатын басқа да қауіп факторлары:
- аллергия;
- жанаспалы линзалар тағу;
- сусыздану;
- ыстық үйде болу;
- күн көзінде сыртта ұзақ болу;
- суықта немесе желде сыртта болу;
- аутоиммундық аурулар;
- А дәруменіне бай тағамдарды жемеу;
- компьютер немесе телефон экрандарын ұзақ уақыт пайдалану.
Маңызды: Жүктілік кезіндегі ентігу
Жүктілік кезінде құрғақ көзге арналған қауіпсіз құралдар
Келесі әдістер жүктілік кезінде көздің құрғауының алдын алуға көмектеседі:
- көп су ішу, әсіресе токсикоз болып, құсып жүрсеңіз;
- көп мөлшерде жеміс-жидек және көкөністермен үйлесімді тамақтану;
- пренаталды дәрумендер қабылдау (және егер гинекологыңыз ұсынған болса, басқа да қоспалар);
- құрғақ ауаны кетіру үшін үйде ылғалдандырғыш пайдалану;
- ауаны ылғалды әрі таза ұстауға көмектесуі үшін үйде өсімдіктер ұстау;
- ашық ауада болғанда көзіңізді жел мен күннен қорғау үшін көзілдірік тағу;
- экранға ұзақ уақыт қараудан сақтану;
- рецептсіз сатылатын жасанды көз жасын қолдану.
Пайдалы: Жүктілік кезінде тәбеттің жоғалуы және оны жеңілдету жолдары
Емдеу
Жүктілік кезінде көздегі кейбір өзгерістер көздің құрғауынан гөрі күрделірек болуы мүмкін. Жүктілік кезінде көздің құрғауын жою бірқатар профилактикалық шаралармен қатар, офтальмолог жүргізетін медициналық процедуралар арқылы жүзеге асырылады.
Көздегі кейбір белгілер преэклампсия сияқты қауіпті жағдайдың бар екенін көрсетуі мүмкін. Көзіңізде мынадай белгілер пайда болса, күтпестен, дереу дәрігеріңізге, перзентханаға немесе жедел жәрдемге хабарласыңыз (әсіресе олар бас ауруымен немесе кенеттен пайда болған ісінумен қатар жүрсе):
- көрудің бұлдырауы;
- түстерді ажыратудағы өзгерістер;
- көру өрісіндегі қара дақтар, жыпылықтаған жарық, қалқымалы бейнелер және көрудегі кез келген әдеттен тыс өзгерістер;
- назарды шоғырландыра алмау;
- уақытша немесе қысқа мерзімді соқырлықтың пайда болуы.
Егер сізде келесі денсаулық мәселелерінің бірі болса, жүктілік кезінде көзде елеулі өзгерістер пайда болу қаупі бар:
- жүктілікке дейін болған қант диабеті (1 немесе 2 типті);
- жоғары қан қысымы;
- бүйрек аурулары.
Сол себепті, жүктілік кезінде көздің құрғауы мазаласа, міндетті түрде офтальмолог қарауынан өтіңіз. Ал егер көру кенеттен бұлдырап кетсе, көз алдында жарқыл немесе қара дақтар пайда болса, офтальмологқа қаралуды күтпеңіз – дереу акушер-гинекологыңызға, перзентханаға немесе жедел жәрдемге хабарласыңыз, себебі бұл преэклампсияның белгісі болуы мүмкін.
Бұл мақала www.aoa.org және www.healthline.com басылымдарының мәліметтері негізінде «Lalu» командасы тарапынан дайындалды.
