Жүкті әйелдерге тұтыну ұсынылмайтын тағамдардың тізімі бір қарағанда шексіз көрінеді. Соның ішінде ысталған ет, кейбір теңіз өнімдері және тіпті кофеині бар өнімдермен біраз уақытқа қоштасуға тура келеді. Сіз жейтін тағамдарыңыз балаңыздың дамуы мен өсуіне әсер етеді, сондықтан абайлап әрі талғап жеу ешқашан артық болмайды.
Жүктілік кезінде көкөністерді дұрыс тұтыну нәрестенің ана құрсағында жатқан кезінде де, дүниеге келгеннен кейін де дамуына септігін тигізетін маңызды дәрумендер мен минералдармен қамтамасыз етуі мүмкін. Бірақ кейбір көкөністер жүктілік кезінде қауіпті болуы да мүмкін.
Жүктілік кезіндегі ең пайдалы көкөністер, сондай-ақ қандай көкөністерді тұтынбау керектігі туралы осы мақаладан толық ақпарат ала аласыз.
Пайдалы мақала: Жүктілік кезінде не істеуге болмайды?
Жүктілік кезіндегі көкөністердің пайдасы
Жүктілік кезіндегі ең жақсы көкөністер ағзаны мол қоректік заттармен қамтамасыз ете алады. Дұрыс уақытта, жеткілікті мөлшерде тамақтану дұрыс тамақтанудың негізін құрайды. Салауатты тамақтану қоректік заттардың жетіспеушілігі мен жүктілік кезіндегі қант диабетінің алдын алуға көмектеседі.
Дұрыс тамақтанудың пайдасы:
- салмақты қалыпты сақтау;
- қалыпты қан қысымы;
- анемияның даму қаупінің азаюы;
- іш өтуі мен іш қатуы сияқты асқазан-ішек ауруларының алдын алу;
- нәрестенің жеткілікті салмақпен туылуы.
Кейбір маңызды қоректік заттарға мыналар жатады:
- бета-каротин – нәрестенің иммундық жүйесіне, көру қабілетіне және жасушалардың дамуына пайдалы;
- С дәрумені – сау тіндердің дамуы, тістер мен сүйектер үшін пайдалы;
- фолий қышқылы – нәрестенің қалыпты салмағы үшін және жүйке түтігі ақауларының алдын алу үшін маңызды (көкөністерден бөлек, күн сайын 400 мкг фолий қышқылы таблеткасын қабылдау да ұсынылады);
- калий – қан қысымын реттеу үшін маңызды.
Жүктілік кезінде және одан кейін көкөністерді тұтыну балаңыздың денсаулығы үшін аса маңызды.
Жүкті әйелдер үшін пайдалы көкөністер
Жүктілік кезінде тұтынуға ең пайдалы көкөністер мыналар:
- жазғы және қысқы асқабақ – ақуыз, фолий қышқылы және А, С, К дәрумендерінің көзі;
- спаржа – А, С, Е және К дәрумендері, сондай-ақ жасұнық пен фолий қышқылына бай;
- қызанақ – С және К дәрумендері мен биотин затының көзі;
- қызылша – иммундық жүйені жақсартуға пайдалы жасұнықтың табиғи көзі;
- картоп – А, В және С дәрумендеріне бай;
- тәтті бұрыш – жасұнық көзі;
- аскөк – Е дәрумені, ақуыз және В2 дәруменінің (рибофлавиннің) табиғи көзі;
- брокколи – жасұнықтың негізгі көзі, сондай-ақ калий мен С және К дәрумендеріне бай;
- шпинат, көк шөптер, қырыққабат жапырағы – фолий қышқылы мен каротиноидтардың көзі.
Дәрігердің қарауына барған кезде өзіңіз бен болашақ сәбиіңізге пайдалы басқа да көкөністер туралы сұрап біле аласыз.
Көкөністер мен көк шөптер жақсылап жуылғаннан кейін оларды тұтыну қауіпсіз болып саналады.
Жүкті әйел бұған әрдайым аса мән беруі тиіс!
Жүктілік кезінде жеуге болмайтын көкөністер
Жүктілік кезінде тұтынуға болмайтын кейбір көкөніс түрлері де бар. Мұның барлығы нәрестеңізге зиянды бактериялардың жұғу қаупін арттыруы мүмкін:
- шикі немесе жартылай пісірілген өскіндер (өнген маш, жоңышқа өскіндері);
- жуылмаған кез келген көкөніс;
- шомыр мен редистің шикі өскіндері;
- дайын салат қоспалары.
Қанша көкөніс жеу керек?
Әдеттегіден көбірек аштық сезіну — қалыпты жағдай, өйткені сізде тамақтануға деген қажеттілік біршама жоғары. Жүктілік кезінде көбінесе аз-аздан және жиі тамақтану ұсынылады. Сізде ас қорытуға байланысты мәселелер болуы мүмкін. Аз-аздан және жиі тамақтану бұл мәселелердің туындау ықтималдығын азайтады.
Жүкті әйелге күніне 300 грамм (төрт порция) немесе одан да көп шикі немесе пісірілген көкөніс тұтыну ұсынылады.
Ас мәзіріне көкөністерді қалай қосу керек?
Көкөністерді дайындаудың сіз қолданып көруге болатын қызықты тәсілдері бар. Көкөністерді күнзе, райхан сияқты табиғи дәмдеуіштермен қуыру оларды одан әрі дәмді ете түседі. Жақсылап тазаланған көкөністерді турап, ұсақтап, пісіріп жеңіз.
Егер аса ұнатпайтын көкөністі жеуге тырысып жүрсеңіз, оны жеу үшін басқа көкөністермен бірге қосып пісіруіңізге болады.
Бұл мақаланы allaboutwomenmd.com және www.webmd.com мәліметтері негізінде «Lalu» командасы дайындады.
