Көптеген болашақ аналар жүктілік кезеңінде бірнеше рет жеңіл ауырсынуды, соның ішінде тамыр (сіңір) тартылуын бастан кешіреді. Сәби өсіп, дамыған сайын денеде күн сайын өзгерістер байқалады, жалпы алғанда сәбиді 9 ай бойы көтеріп жүру де оңай іс емес.
Тамыр тартылуы — жүктілік кезінде байқалатын қалыпты белгілердің бірі болуы мүмкін. Егер әйел бұл туралы хабардар болса, ағзасында қай ауырсынудың не себепті пайда болып жатқанын оңай түсіне алады.
Тамыр тартылуының пайда болу кезеңдері
Бірінші және екінші 3 айлық (триместр) кезінде бүкіл дене нәресте үшін қолайлы орта қалыптастырумен айналысады. Осы уақыт ішінде жатыр бұлшықеттері созылып, кеңейе бастайды. Бұлшықеттердің созылуы іштің екі жағында тартылу сезімінің пайда болуына себеп болады. Жүктілік енді ғана басталған кезде етеккір келгендегідей ауырсынуды да сезінуге болады.
Себептері
Жүктіліктің алғашқы кезеңінде әйелдерде әдетте іш қатуы (іш өтпеуі) байқалады, бұл да тамыр тартылуына себеп болуы мүмкін. Сондай-ақ күнделікті қарапайым жаттығуларды орындаған кезде де тамырлар жиі тартылып қалуы мүмкін.
Инфекция
Саңырауқұлақ инфекциялары немесе зәр шығару жолдарының инфекциялары да құрысуларға әкелуі мүмкін. Британ медицина қауымдастығы жүргізген зерттеу болашақ аналардың шамамен 6%-ында жүктілік кезінде зәр шығару жолдарының инфекциялары дамитынын көрсетті.
Маңызды: Цитомегаловирус
Жыныстық қатынас
Жыныстық қатынас та құрысу тудыруы мүмкін. «HealthyWomen» коммерциялық емес үкіметтік емес ұйымының мәліметінше, дені сау әйелдердің көпшілігі нәресте дүниеге келгенге дейін де жыныстық қатынасқа түсе алады. Бірақ жүктілік кезінде іштің үлкеюіне байланысты жыныстық қатынаспен айналысу онша жағымды болмауы мүмкін.
Жатырдан тыс жүктілік
Жеңіл құрысулар жүкті әйелде қалыпты жағдай саналса да, егер олар қандай да бір ауырсыну тудырса, дәрігерге көріну ұсынылады. Егер құрысулармен бірге дақ түсу немесе қан кету басталса, бұл жағдай жатырдан тыс жүктіліктің белгісі болуы мүмкін, яғни ұрықтың жатырда емес, фаллопий түтіктерінің бірінде орналасып қалу ықтималдығы бар. Мұндай жағдайда шұғыл түрде дәрігерге жүгініңіз.
Бірнеше минут ішінде басылмайтын тұрақты қатты ауырсыну пайда болса, дереу дәрігерге жүгіну қажет.
Жүктілік кезінде қан қысымының көтерілуі
Әдетте қан қысымының көтерілуі ұрық 20 апталық болғаннан кейін басталады. Қан қысымының көтерілуі преэклампсияның белгісі болуы мүмкін. Преэклампсия кезінде қабырға астында, іштің жоғарғы оң жақ бөлігінде ауырсыну пайда болуы мүмкін. Осындай ауырсыну, қатты бас ауруы, көз алдының бұлдырауы немесе беттің, қолдың және аяқтың кенеттен ісінуі байқалса, дереу дәрігерге жүгініңіз. Қан қысымының көтерілуі сондай-ақ плацентаның босануға дейін жатырдан ажырап кету қаупін арттырады.
Құрысулар және жүктіліктің үшінші триместрі
Жүктіліктің үшінші триместрінде әйелдер жамбас аймағында қосымша қысымды сезіне бастайды, өйткені бұл кезеңде нәресте өте тез дамып, үлкейе түседі.
Нәресте өскен сайын, аяғымен қынап жүйкелерін басып қалады. Нәресте құрсақ қуысында үнемі айналып, белсенді қозғала бастаған кезде, әйел жүргенде әдеттегіден көбірек қысым мен құрысуды сезінуі мүмкін. Мұндай кездерде бір қырындап жатып сәл тынығу ауырсынуды бәсеңдетеді, бірақ ауырсыну тоқтамаса, міндетті түрде дәрігерге жүгіну қажет.
Құрысуды жеңілдету
Тамыр тартылғанда артық үрейленудің қажеті жоқ, бар болғаны бірнеше қарапайым кеңесті ұстансаңыз жеткілікті. Ең алдымен, дене еңбегіндегі белсенділікті және тартылудың пайда болуына себеп болатын факторларды азайту керек. Түнде ұйықтар алдында жылы ванна қабылдау, тыныш әрі жайлы ортада демалу іштің ауырсынуын азайтуға едәуір көмектеседі.
