Көпчүлүк болочок энелер кош бойлуулук мезгилинде тамыр тартышуусу сыяктуу жеңил ооруларды бир нече ирет баштан өткөрүшөт. Ымыркай чоңоюп, өөрчүгөн сайын денеде күн сайын өзгөрүүлөр байкалат, деги эле ымыркайды 9 ай бою көтөрүп жүрүү да оңой иш эмес.
Тамыр тартышуу учурлары кош бойлуулук мезгилинде байкалуучу кадимки белгилердин бири болушу мүмкүн. Эгер аял маалыматка ээ болсо, организминде кайсы оору эмне себептен пайда болуп жатканын оңой эле биле алат.
Тамыр тартышуунун пайда болуу баскычтары
Биринчи жана экинчи 3 айлыкта бүткүл дене ымыркай үчүн ыңгайлуу шарт түзүү менен алек болот. Бул убакыттын ичинде жатын булчуңдары созулуп, кеңейе баштайт. Булчуңдардын кеңейиши курсактын эки тарабында тартышуу сезиминин пайда болушуна себеп болот. Кош бойлуулук жаңы башталганда айыз келгендегидей ооруну да сезүүгө болот.
Себептери
Кош бойлуулуктун алгачкы мезгилинде аялдарда адатта ич катуу (ич өтпөй калуу) байкалат, бул да тамыр тартышуусуна себеп болушу мүмкүн. Ошондой эле, күнүмдүк көнүгүүлөрдү аткарууда да тамырлар бат-баттан тартышып калышы мүмкүн.
Инфекция
Козу карын (грибок) инфекциялары же заара жолдорунун инфекциялары да тамыр тартышууга алып келиши мүмкүн. Британия медициналык ассоциациясы тарабынан жүргүзүлгөн изилдөө көрсөткөндөй, болочок энелердин болжол менен 6%ында кош бойлуулук мезгилинде заара жолдорунун инфекциялары өнүгөт.
Маанилүү: Цитомегаловирус
Жыныстык катнаш
Жыныстык катнаш да тырышууну (спазмды) пайда кылышы мүмкүн. «HealthyWomen» бейөкмөт коммерциялык эмес уюмунун маалыматы боюнча, ден соолугу чың аялдардын көпчүлүгү бала төрөлгөнгө чейин деле жыныстык катнашта боло алышат. Бирок кош бойлуулук учурунда курсак чоңойгондуктан, жыныстык катнашта болуу анчалык жагымдуу сезилбеши мүмкүн.
Жатындан тышкаркы кош бойлуулук
Жеңил тамыр тартышуулар кош бойлуу кезде кадыресе көрүнүш деп эсептелсе да, эгер алар кандайдыр бир оорутууларды пайда кылып жатса, дарыгерге көрүнүү сунушталат. Эгерде тартышуулар менен бирге так түшүп же кан агуу башталса, бул жатындан тышкаркы кош бойлуулуктун белгиси болушу мүмкүн, башкача айтканда, мында түйүлдүк жатында эмес, фаллопий түтүкчөлөрүнүн биринде жайгашып калуу ыктымалдыгы бар. Мындай учурда дароо дарыгерге кайрылыңыз.
Бир нече мүнөттө басылбаган тынымсыз катуу оору пайда болуп жатса, дароо дарыгерге кайрылуу зарыл.
Кош бойлуулук учурунда кан басымынын көтөрүлүшү
Адатта кан басымынын көтөрүлүшү түйүлдүк 20 жумалык болгондон кийин башталат. Кан басымынын көтөрүлүшү преэклампсиянын белгиси болушу мүмкүн. Преэклампсияда кабырганын астында, курсактын жогорку оң тарабында оору пайда болушу мүмкүн. Мындай оору, катуу баш оору, көз алдынын бүдөмүктөшү же беттин, колдордун жана буттардын капыстан шишиши байкалса, дароо дарыгерге кайрылыңыз. Кан басымынын көтөрүлүшү ошондой эле плацентанын төрөткө чейин жатындан ажырап калуу коркунучун жогорулатат.
Тамыр тартышуу жана кош бойлуулуктун үчүнчү триместри
Кош бойлуулуктун үчүнчү триместринде аялдар жамбаш сөөк тушунда кошумча басымды сезе башташат, анткени наристе бул мезгилде абдан тез өнүгүп чоңоёт.
Бала чоңойгон сайын буттары менен кын нервдерин басып калат. Ымыркай курсак көңдөйүндө тынымсыз айланып кыймылдай баштаганда, аял басканда адаттагыдан көбүрөөк басымды жана тамырлардын тартышуусун сезиши мүмкүн. Мындай учурларда капталдап жатып бир аз эс алуу ооруну басаңдатат, бирок оору тынымсыз улана берсе, сөзсүз дарыгерге кайрылуу зарыл.
Карышууну жеңилдетүү
Тамыр тартышканда ашыкча дүрбөлөңгө түшүүнүн кереги жок, болгону бир нече жөнөкөй кеңешти кармануу жетиштүү. Алгач, физикалык эмгектеги жигердүүлүктү жана тамыр тартышууга себеп болуучу факторлорду азайтуу керек. Түнкүсүн уктаар алдында жылуу ванна кабыл алуу, тынч жана бейпил чөйрөдө эс алуу ичтин оорусун азайтууга кыйла жардам берет.
Кызыктуу: Кош бойлуулук учурундагы каалоолор эмнеден кабар берет?
