Кош бойлуулук ушундай мезгил, анда көптөгөн өзгөрүүлөр байкалат. Бул өзгөрүүлөрдү нормадан жана патологиядан ажырата билүү кош бойлуу аялдан жоопкерчиликти, ал эми дарыгерден билимди жана тажрыйбаны талап кылат. Ошондой көйгөйлөрдүн бири – бул кош бойлуулук учурунда заарада кандын болушу.
Эгерде сиз кош бойлуу болсоңуз жана заараңыздан кан көрсөңүз, же дарыгериңиз зааранын анализинен кан бар экенин аныктаса, бул заара чыгаруу жолдорунун сезгенүү оорусунун белгиси болушу мүмкүн. Заара чыгаруу жолдорунун сезгениши – бул адатта бактериялар пайда кылган заара чыгаруу жолдорундагы инфекциялык абалдын натыйжасы болуп саналат.
Кош бойлуулук учурунда бул абал көп кездешет, анткени өсүп жаткан түйүлдүк табарсыкка жана заара чыгаруу жолдоруна басым жасашы мүмкүн. Бул болсо бактериялардын кармалып калышына же зааранын агып чыгышына алып келет.
Заара чыгаруу жолдорунун сезгенишинин белгилери кандай?
Заара чыгаруу жолдорунун сезгенүү оорусунун белгилери төмөнкүлөр:
- дайыма заара ушатууга муктаждык;
- тез-тез, бирок аз өлчөмдө заара чыгаруу;
- заара ушатууда ачышуу;
- ысытма;
- жамбаш сөөгүндөгү ыңгайсыздык;
- белдин оорушу;
- жагымсыз жыттуу заара;
- кан аралаш зааранын келиши (гематурия);
- ылайкаланган зааранын бөлүнүп чыгышы.
Кош бойлуулукта сийдик жолдорунун сезгенишине эмне себеп болот?
Кош бойлуулук учурунда бул оорунун 3 негизги түрү бар, алардын ар биринин ар кандай себептери бар:
Симптомсуз бактериурия
Симптомсуз бактериурия көбүнчө кош бойлуулукка чейин аялдын организминде болгон бактериялардан келип чыгат. Сийдик жолдорунун жабыркашынын бул түрү олуттуу симптомдорду жаратпайт. Эгер дарыланбаса, симптомсуз бактериурия бөйрөк инфекциясына же курч табарсык инфекциясына алып келет. Бул инфекция кош бойлуу аялдардын болжол менен 1,9-9,5%ында кездешет.
Дүйнөлүк саламаттыкты сактоо уюмунун (ДСУ) маалыматы боюнча, дарыланбаган симптомсуз бактериуриясы бар кош бойлуу аялдардын 45%ына чейин пиелонефрит өнүгөт.*
Курч уретрит же цистит
Уретрит – бул заара жолунун сезгениши, цистит – табарсыктын сезгениши. Бул 2 абалды тең бактериялык инфекция (көбүнчө E. coli) козгойт.
Пиелонефрит
Пиелонефрит – бөйрөк инфекциясы. Бул кан айлануу же заара чыгаруу жолдорунун башка жерлеринен бөйрөгүңүзгө кирген бактериялардан улам болушу мүмкүн. Мында кош бойлуу аялдын заарасында кан менен бир катарда, ысытма, заара чыгарууда оору жана арка, каптал, курсактын астында же курсакта оору сыяктуу симптомдор байкалышы мүмкүн.
Кош бойлуулук учурунда заара жолунун инфекциясын дарылоо
Кош бойлуулук учурунда бул ооруну дарылоо үчүн дарыгерлер адатта антибиотиктерди колдонушат. Дарыгер кош бойлуулук учурунда колдонуу үчүн коопсуз болгон антибиотиктерди дайындайт, албетте, бул антибиотиктер денеңиздеги бактерияларды өлтүрүүдө натыйжалуу болот.
Кош бойлуулук учурунда заарада кандын болушуна дагы эмнелер себеп болушу мүмкүн?
Кош бойлуулугуңузга карабастан, заарада кан болушу бир нече абалдарга байланыштуу болушу мүмкүн. Буга төмөнкүлөр кирет:
- табарсыкта же бөйрөктө таштын болушу;
- гломерулонефрит, бөйрөктүн тазалоо системасынын сезгениши;
- сийдик же табарсык рагы;
- бөйрөктүн жаракаты, мисалы, жыгылуу же жол кырсыгынын натыйжасында;
- орок сымал анемия же Альпорт синдрому.
Мындай гематурияга (кан аралаш сийдик келишине) себеп болуучу факторлорду аныктоо кээде дарыгерге да кыйынчылык туудурат.
Ушул себептен, эгерде кош бойлуулукта аялда сийдик аралаш кан кетүүсү байкалса, сөзсүз дарыгерге кайрылуу зарыл.
Гематурия адатта зыянсыз болсо да, бул олуттуу оорунун алгачкы белгилеринин бири болушу мүмкүн.
Эгер сиз кош бойлуу болсоңуз жана кан аралаш заара келсе, дарыгериңиз менен байланышыңыз. Заара чыгаруу жолдорунун жабыркоолорун үзгүлтүксүз текшертүү кош бойлуу аялга кам көрүүнүн бир бөлүгү болушу керек.
Зааранын анализин жана текшерүүлөрүн жүргүзүү үчүн дарыгериңиз же гинекологуңуз менен кеңешиңиз.
