Hár bir hayal asıǵıp kútken ájayıp dáwir hesh bir gúmansız hámiledarlıqtır. Bul dáwirdegi ruwxıy halattı, ishki sezim-tuyǵılardı ómir dawamında kemnen-kem jaǵdaylarda ǵana seziw imkaniyatı bar. Solay eken, bul demlerdi umıtılmas hám este qalarlıq etip ótkeriw áhmiyetli. Hámiledarlıq dáwiri dawamında usınday sezimlerdi seziwińizde hámiledarlıq taqwimi sizge járdem beredi.
Hámiledarlıq kalendarı (taqwimi) sizge hámiledarlıqtıń pútkil múddeti dawamında óz deneńizde bolıp atırǵan ájayıp ózgerisler haqqında oqıp, sezip barıw imkaniyatın usınadı.
Tuwıt sánesin hám hámiledarlıq múddetin esaplaw ushın tuwıt sánesi kalkulyatorınan paydalanıń.
Tómende sizge hámiledarlıq dáwirinde organizmińizde, bolajaq balajanıńızda júz beretuǵın tiykarǵı ózgerisler haqqında qısqasha maǵlıwmat berip ótemiz.
Hámiledarlıq dawamında zárúr barlıq maǵlıwmatlardı bolsa, “Lalu — Hámiledarlıq mektebi” mobil qosımshası arqalı tabıwıńız múmkin.
Qosımshanı júklep alıw arqalı hámiledarlıqtaǵı ana hám baladaǵı ózgerislerden baslap, durıs awqatlanıw, áhmiyetli medicinalıq tekseriwler, ginekolog másláhátleri, hámiledarlıq shınıǵıwları, bolajaq perzentke at tańlaw, hámiledarlıq múddeti hám de basqa hámiledar hayallar menen sáwbetlesiw, perzent jınısın shama menen anıqlaw sıyaqlı paydalı qurallardı biypul qolǵa kirgiziwińiz múmkin.
Qosımsha sizdi qızıqtırıp atırǵan bolsa, mine mınaw jerden júklep alıwıńız múmkin: https://bit.ly/lalu-ilovasi
Hámiledarlıq kalendarı birinshi trimestr
1-hápte
Organizmińiz hámiledarlıqqa tayarlıq kórmekte. Akusherlik múddetlerinen kelip shıǵıp esaplansa, hámiledarlıqtıń birinshi háptesi aqırǵı hayz kórgen kúnnen baslanadı.
2-hápte
Hámiledarlıqtıń 2-háptesinde hayal organizminde ovulyaciya procesi júz berip, organizm urıqlanıwǵa tayar boladı, yaǵnıy máyeklikten máyek kletkası jetilip shıǵadı. Kóbinese hayallar hayz cikliniń ortasında, yaǵnıy 14-kúninde hámiledar boladı.
Eger máyekliklerden eki jetilgen máyek kletka ajıralsa hám ekewi de urıqlansa, dizigota egiz hámiledarlıq júz beredi.
Hámiledarlıq kalendarı: 3-hápte
Hámiledarlıq testi teris nátiyjeni kórsetedi. Biraq, ayırım hayallar ózlerinde tez sharshaw, jeńil kewil aynıwı, kókirek bezleriniń sezgir bolıp qalıwı, qanlı ajıralmalar payda bolıwı, sidik ajıralıwınıń kóbeyiwi sıyaqlı hámiledarlıq belgilerin seziwleri múmkin.
4-hápte
Hámileniń úlkenligi kóknar dánindey boladı hám ol intensiv túrde ósedi. 10-háptege shekem hámileniń barlıq áhmiyetli organları qáliplesedi hám ayırımları isley baslaydı. Mine usı dáwir ishinde jedel ósip atırǵan embrion názik boladı. Sırtqı unamsız tásirler onıń ólimine yaki tuwılıwdaǵı anomaliyalarǵa sebep boladı.
5-hápte
Hámiledar hayaldıń nerv sisteması hám endokrin sistemasındaǵı ózgerisler hám xorion (hámileniń bir qabatı)nan islep shıǵarılatuǵın xorionik gonadotropin (XG) sintezi esabına, kópshilik hayallarda birinshi úsh aylıqta toksikoz jaǵdayı kelip shıǵadı. Toksikoz belgileri – kóp silekey bóliniwi hám qusıw.
Hámiledarlıq kalendarı: 6-hápte
Hámileńizdiń uzınlıǵı 0,51-0,64 sm ge jetedi. Onıń júzi áste-aqırın qáliplese baslaydı. Eki noqat payda boladı hám olardan keyinshelik kóz qáliplesedi, jáne eki noqattan bolsa murın tesikleri qáliplesedi. Bunnan basqa jaqlar, ishki qulaq, til hám dawıs baylamları hám de moyın hám iyek parıqlana baslaydı. 6-háptelik embrionnıń bası úlken, denesi bolsa “C” háribin esletedi.
7-hápte
Hámiledarlıq – beyimlesiw qıyın bolǵan fiziologiyalıq process. Sol sebepli de 7-hápte ótip atırǵan bolsa da, hayal adamda keypiyat ózgeriwsheńligi saqlanıp qalǵan boladı.
7-háptede kishi jambas boslıǵına qan aǵımı kóbeyedi, bunıń nátiyjesinde sidik ajıralıwı kóbeyedi, qarında spazmlar júzege keledi.
8-hápte
Tuwılajaq balanıń organizmi jedel ósedi, hámile ushın kóp energiya qurılıs materialları kerek boladı. Sol sebepli embrion júregi kóp márte qısqaradı, bir minutta 150-170 márte qısqaradı. Bas miyde neyronlar tarmaqlanadı hám jańa baylanıslar payda boladı.
Hámiledarlıq kalendarı: 9-hápte
Hámiledarlıq kalendarınıń 9-háptesine kelip hayal organizminde may toqımaları toplana baslaydı – usı jol menen hayal organizmi sút arqalı awqatlandırıwǵa tayarlanadı.
Kópshilik hayallarda relaksin gormonı tásirinde – jambas baylamları bosayadı. Keyinirek tuwıw procesi ańsatlasadı. Sol sebepli hayal adam jambas aymaǵındaǵı awırıwlar hám júriwdegi ózgerislerdi seziwi múmkin.
10-hápte
Balańızdıń uzınlıǵı 3-4 sm-den kóbirek, dene salmaǵı bolsa 4 grammdı quraydı. Jaqın hápteler ishinde hámile úsh ese úlkeyedi, onıń mańlayı bórtip shıǵadı, sebebi bas miy de úlkeyedi. Hámiledarlıq waqtında eń kerekli bolǵan mikroelementlerdiń biri – cink. Cink kóplegen fermentler quramına kiredi hám olar organizmdegi bioximiyalıq proceslerde jedel qatnasadı. Cink qatnasıwında 300 den artıq túrdegi beloklar sintezlenedi.
Hámiledarlıq kalendarı: 11-hápte
Hámiledar hayaldıń ulıwma jaǵdayı jaqsılanadı. Endi gormonal «dawıl» páseyedi hám hayaldı burınǵıday kóp mazasızlamaydı. Aldın biyzar etken toksikoz belgileri endi hámiledar hayaldı mazasızlamaydı.
Sonday bolsa da, hámiledarlıq barlıq hayallarda hár qıylı ótedi, geyparalarında 11-12-háptege kelip, barlıq belgilerdiń biliniwi «shıńına shıǵıwı» múmkin.
12-hápte
Hámiledarlıq dáwiriniń 12-háptesine kelip, hámileniń rawajlanıwında eń áhmiyetli proceslerdiń biri – refleksler qáliplesedi. Onıń barmaqları hám alaqanı búgiledi hám jazıladı, bulshıq etler qısqara baslaydı, awız, kóz átirapındaǵı bulshıq etler de háreketlene baslaydı, sorıw refleksi payda boladı. Endi hámile ana qarnına qol menen sıypalanǵanın sezedi hám oǵan juwap retinde háreketler jasaydı. Biraq, ana bunday háreketlerdi ele sezbeydi.
Hámiledarlıq kalendarı: 13-hápte
Bul háptege kelip, UTT (UZI) járdeminde bolajaq perzentińizdiń jınısın anıqlasa boladı. Solay bolsa da, tolıq isenim menen aytıw qıyın. Balanıń háreketleniwi belsendilesedi: endi ol erkin qol hám ayaqların háreketlendire aladı, jutınadı, esneydi hám ıqılıq tutadı.
Qutlıqlaymız!
Siz hámiledarlıqtıń eń názik dáwirin artta qaldırdıńız. Endi jeńil dem alsańız da boladı.
Eger hámiledarlıq dáwirin jáne de mazmunlıraq ótkeriwdi qáleseńiz, “Lalu – Hámiledarlıq mektebi” mobil qosımshasın júklep alıń.
Hámiledarlıq kalendarı ekinshi trimestr
14-hápte
Hámileniń uzınlıǵı 9 sm-di, dene salmaǵı bolsa 35-45 gr-dı quraydı. Hámileniń denesi basına qaraǵanda tezirek ósedi, moynı anıq kórine baslaydı. Bala dem alıw háreketlerin orınlaydı, usı jol menen dem alıw bulshıq etleriniń rawajlanıwı tezlesedi.
15-hápte
Hámiledar hayaldıń sırtqı kórinisi hár túrli bolıwı múmkin. Bul dáwirde hayaldıń jatırı kishi jambasqa sıymay qaladı hám qarın sezilerli dárejede úlkeyedi.
Gormonal ózgeris tásirinde qan kólemi kóbeyedi hám murınnıń ishki qabıǵında jıynalıwı esabına murın pitiwi hám qanawı múmkin.
Hámiledarlıq kalendarı: 16-hápte
Balada ishki qulaq qáliplesken, esitiw súyekleri bar. Endi ol sizdi esite aladı hám dawısıńızdı yadında saqlap qaladı. Tuwılǵannan keyin de siziń dawısıńızdı parıqlay aladı. Ilimiy izertlewler nátiyjesine qaraǵanda, náreste ana qarnındalıǵında esitken muzıkaların esley aladı.
17-hápte
Qarın úlkeyiwi nátiyjesinde dene teńsalmaqlıǵı buzıladı hám sol sebepli hayal «ayaǵında turıwı qıyınlasadı». 17-háptege kelip ayırım hayallar balalarınıń háreketlerin seze baslaydı; ádette háreketler 16–24-hápteler aralıǵında, birinshi hámiledarlıqta bolsa kóbinese 20-hápteden keyin seziledi.
Kópshilik hayallar hámiledarlıqtıń ekinshi úsh aylıǵında ádettegidey emes túsler kóredi.
Hámiledarlıq kalendarı: 18-hápte
Bolajaq perzentińizdiń seziw aǵzaları funkciyası artadı: esitiw, kóriw hám dám biliw. Bala ana organizmindegi proceslerdi esitedi, eger ana janında qattı ses esitilse, ol “shoship túsedi”.
19-hápte
Bul dáwirge kelip, ayırım hámiledar hayallar jambas, qarın hám qasaǵa aymaǵındaǵı ótkir awırıwlarǵa shaǵınadı. Ádette, bunday awırıwlar keskin háreket etkende payda boladı hám birneshe minuttan keyin ótip ketedi. Bul jaǵdayǵa domalaq baylamnıń sozılıwı sebep sıpatında kórsetiledi.
Hámiledarlıq kalendarı: 20-hápte
Hámileniń uzınlıǵı 25,4 sm, dene salmaǵı bolsa 300 gr boladı. Hámiledarlıqtıń 20-háptesine shekemgi dáwirinde hámile ayaqları jıynalǵan bolǵanlıǵı sebepli onıń tolıq boy uzınlıǵın ólshew múmkin bolmaydı, sol sebepli jambastan basına shekem shama menen ólshenedi. 20-háptege kelip bolsa onıń boy uzınlıǵın tabanınan basına shekem ólshew múmkin.
21-hápte
Belde hám kishi jambas aymaǵında tartılıw sezimi payda bolıwı múmkin. Bul jaǵday awırıwsız bilinedi, 1 minut dawam etip, soń ótip ketedi hám hár 4-5 saatta qaytalanıp turıwı múmkin. Bular jalǵan tolǵaq (dárt) esaplanadı. Onıń sebebi tolıq úyrenilmegen, biraq bunday tolǵaqlar ádette qáwipsiz esaplanadı. Degen menen, 37-háptege shekem tolǵaqlar turaqlı yaki awırıwlı bolıp qalsa, ádettegiden basqasha bel awırıwı payda bolsa, qınnan suyıqlıq yaki qan kelse, dárhal shıpakerge múrájat etiń.
Hámiledarlıqta bel awırıwın jeńillestiriw boyınsha usınıslardı mına maqala arqalı oqıp alıwıńız múmkin: Hámiledarlıqta bel awırıwı – sebepleri hám saplastırıw usılları
Hámiledarlıq kalendarı: 22-hápte
22-hápteden baslap balańızdıń jeke “kún tártibi” boladı, yaǵnıy ol belgili bir waqıtta uyıqlaydı (uyqı dáwirleri ádette 20–40 minut dawam etedi hám kemnen-kem 90 minuttan asadı), belgili bir waqıtta oyaw boladı. Siziń qarnıńız úlkeygen hám gormonlar tásirinde kókirek sút bezleriniń kólemi de artadı.
23-hápte
Balanıń kóp háreketleniwi sebepli sizde geyde tınıshsızlıqlar baqlanıwı múmkin. Bunday waqıtta kóbirek seyil etiń, balańız benen sóylesiń, oǵan itibar qaratıń. Eger perzentińizge elege shekem at tańlamaǵan bolsańız, “Lalu — Hámiledarlıq mektebi” mobil qosımshasınan paydalanıp, kishkene súykimli perzentińizge at tańlawıńız múmkin.
24-hápte
Hámiledarlıq kalendarınıń 24-háptesine kelip, bolajaq perzentińizdiń úlkenligi domalaq qawınday boladı. Endi onıń teri qaplamı móldir emes, sebebi pigmentler hám teri astı may qabatı qáliplesedi. Mayda kapillyarlar kóbeygenligi sebepli teri reńi pushtıǵa ózgerip baradı.
Hámiledarlıq kalendarı: 25-hápte
Hámiledarlıqtıń bul waqtına kelip, ádette hámiledar hayallar ózinde biraz semiriwdi seziwi múmkin. Eger siz de ózińizde semiriwdi sezseńiz, bunnan qáweterleniwińiz shárt emes. Sebebi bul dáwirde hámileniń ósiwi, qan hám suyıqlıq kóleminiń artıwı hám de emiziw ushın may qorınıń jıynalıwı esabınan salmaq qosılıwı tábiyiy. Biraq salmaq yaki isik birden keskin artsa, shıpakerge múrájat etiń. Hámiledarlıq dáwiri dawamında salmaǵıńızdı ólshep, mobil qosımshamızdıń “Salmaq qadaǵalawı” bóliminde qayd etip barıwdı umıtpań.
26-hápte
26-háptege kelip, jatır túbi kindikten 6 sm joqarıda jaylasadı. Hámile úlkeyiwi esabınan uyqı waqtında qolaysızlıqlar kelip shıǵadı. Birinshiden, jatıwdıń qolaysızlıǵı sebepli sizdi hámiledarlıqta qalay jatıw kerek, degen soraw qıynay baslaydı, ekinshiden, tuwılajaq bala haqqında kóp oylaw sebep boladı. Geyde bolsa, bul jaǵday hámiledarlıqta uyqısızlıq dárejesine shekem barıwı múmkin. Sonıń ushın uyqı gigiyenasına qatań ámel etiń.
Bul sıyaqlı jaǵdaylardı saplastırıw hám jeńilletiw ushın hámiledarlıq jastıqshalarınan paydalanıwıńız múmkin.
Qutlıqlaymız!
Siz hám perzentińiz uzaq joldı basıp, ekinshi trimestrdi artta qaldırıp, hámiledarlıqtıń úshinshi trimestri tárep qádem qoymaqtasız. Bul joldı ańsat hám tabıslı basıp ótiwińizde “Lalu — Hámiledarlıq mektebi” sizge joldas bolıwı múmkin.
Hámiledarlıq kalendarı úshinshi trimestr
27-hápte
Kishkintayıńızdıń uzınlıǵı 36-37 sm di quraydı. Bala ushın jatır endi tarlıq ete baslaydı, sol sebepli onıń háreketleri kúshli bilinetuǵınday bolıp seziledi.
Onıń bas miyi quramalasıp baradı, refleksler de tolıq qáliplesedi. Bala barmaǵın soradı, kózleri jumıq halda uyqlaydı hám oyanadı.
Hámiledarlıq kalendarı: 28-hápte
Perzent haqqında kóp oylaw hám gormonal ózgerisler tásirinde uyqı mashqalaları baqlanadı. Uyqlaw ushın jatqanıńızda sizdiń uyqıńız kelmey, qanday da bir jumıslar menen shuǵıllanǵıńız kelip qaladı.
29-hápte
Balanıń denesi tuwılatuǵın náresteler sıyaqlı jaǵdayǵa keledi, onıń bası da denesine salıstırǵanda júdá úlken emes. Hámile teri astı may qatlamınıń ósiwi esabına «semiredi». Bul waqıtqa kelip, onıń jeke immun sisteması qáliplesedi, biraq antitelolardı ana organizminen qan arqalı alıp turadı.
Hámiledarlıq kalendarı: 30-hápte
Ayırım hayallarda túshkirgende, jótelgende, kúlgende sidikti uslay almaw baqlanadı. Ayaqlarda isik payda bolıp turadı. Bunday belgiler kóbinese tuwıttan keyin joǵaladı; sidikti uslay almaǵanda jambas túbi bulshıq etlerine arnalǵan shınıǵıwlar járdem beredi. Júzde, qollarda yaki ayaqlarda birden kúshli isik payda bolsa, dárhal shıpakerge múrájat etiń.
Uyqı menen baylanıslı ádetten tıs jaǵdaylar baqlanadı: úshinshi úsh aylıqta hámiledar hayallar uyqısında tez-tez mazasızlanıp turadı, hár qıylı túsler kóredi. Buǵan sebep gormonlar tásiri hám tuwılatuǵın perzent haqqında kóp oylawdır.
31-hápte
Bul waqıtqa kelip hámileniń dene salmaǵı boyınıń uzınlıǵına salıstırǵanda kóbirek artadı. Onıń dene uzınlıǵı 41 sm, dene salmaǵı bolsa 1,5 kg dı quraydı. 31-háptede ayırım balalardıń basında shash júdá kóp bolsa, ayırım balalardıń shashı ulıwma bolmawı múmkin.
32-hápte
Kishkene balajanıńız tuwılıwın «kútip jatıw» waqtında – ómiri ushın áhmiyetli bolǵan háreketler: sorıw, jutınıw, dem alıw, basın burıw, ayaqshaları hám qolshaların háreketlendiredi. Ol sharshaǵan payıtlarında uyıqlaydı, hátte tús te kóredi.
Hámiledarlıq kalendarı: 33-hápte
Jalǵan tolǵaqlar jáne de kóbirek biymaza etedi. Usı jol menen organizm tuwıw procesine tayarlanıp baradı. Shın tolǵaq penen jalǵan tolǵaqlardıń parqı, jalǵan tolǵaqlar qısqa múddet ishinde ótip ketedi.
34-hápte
Bul dáwirge kelip siz qarnıńızdıń biraz kishireygenin seziwińiz múmkin. Bunıń eki sebebi bar. Birinshisi, hámile biraz tómenirek túsedi. Ayırım jaǵdaylarda bul erterek júz berse, geyde bolsa tuwıt procesine bir neshe saat qalǵanda júz beredi. Ekinshisi bolsa, jatırda amniotik suyıqlıq (qaǵanaq suwı) muǵdarınıń biraz kemeyiwi – ol ádette 32–34-háptelerde eń kóp boladı, sonnan keyin tábiyiy túrde kemeye baslaydı. Biraq qarnıńız sezilerli kishireygendey bolıp seziletuǵın bolsa yaki qınnan suyıqlıq kelse, dárhal shıpakerge múrájat etiń: bul qaǵanaq suwınıń azlıǵınan (oǵan organizmniń kúshli suwsızlanıwı da sebep bolıwı múmkin), qaǵanaq qabınıń jırtılıwınan yaki hámile ósiwiniń ásteleniwinen dárek beriwi múmkin.
35-hápte
Hámiledarlıq kalendarınıń 35-háptesine kelip, balańızdıń boyı 46 sm, dene salmaǵı bolsa 2,4 kg-dı quraydı. Onıń dene salmaǵı teri astı may qabatı qalıńlasıwı esabınan artadı. Kishkintayıńızdıń rawajlanıwı derlik tolıq juwmaqlanadı.
Hámiledarlıq kalendarı: 36-hápte
Hámiledarlıqtıń 36-háptesinde hám keyingi háptelerde hámile biraz tómenirek túsedi. Nátiyjede qıjıl hám entigiw joǵaladı, biraq sidik qaltasınıń eziliwi esabına sidik ajıralıwı kúsheyedi, jambas aymaǵında diskomfort payda boladı.
37-hápte
Balanıń háreketleriniń xarakteri ózgeredi (jatır tarlıq qılǵanı ushın tebiwlerdiń ornına kóbirek awnaw, sozılıw seziledi), biraq háreketler sanı azaymawı kerek. Háreketler azaysa yaki ádettegiden ózgerse, kútpesten dárhal tuwıtxanaǵa múrájat etiń. Hámile tuwılǵannan keyin ómir ushın áhmiyetli bolǵan barlıq reflekslerdi orınlay aladı: dem alıw hám shıǵarıw, jutıw, sorıw, kózlerin ashıp-jumıw. Ol bárqulla usınday háreketlerdi tákirarlap turadı.
Maǵlıwmat ornında, hámiledarlıqtıń 37-háptesi baslanıwınan aldın júz bergen tuwıw erte tuwıw esaplanadı.
38-hápte
Hámileńizdi – endi náreste dep atasaq ta boladı. Onıń barlıq aǵzaları tolıq rawajlanǵan. Ol óz aldına jasawǵa tolıq tayar. Hámile jambas aymaǵına túsedi hám ayırım nerv tamırların qısıp qoyıwı múmkin.
39-hápte
Óz waqtındaǵı tuwıw 37 hám 42 hápteler aralıǵında júz beredi. Birinshi ret perzent kórip atırǵanlar ádette 41-háptede perzentlerin dúnyaǵa keltiredi. 39-háptede jalǵan tolǵaqlar biytınısh etip turadı. Eger shın tolǵaq gúzetilse, tuwıw belgileri haqqında jeterli maǵlıwmatqa iye bolsańız, siz onı jalǵan tolǵaqtan qıynalmay ajıratıp alasız: shın tolǵaq awırıw menen, belgileri kúsheyip barıwshı xarakterge iye, uzaq waqıt dawam etetuǵın kóriniste payda boladı.
Hámiledarlıq kalendarı: 40-hápte
Tuwıt procesin kútip, ózińizdi xatırjam tutıń. Eger tómendegi belgiler júzege kelse, dárriw tuwıtxanaǵa barıw kerek:
— Hámile aldı suyıqlıǵı kelse. Hámile aldı suyıqlıǵın ápiwayı qın ajıralmasınan yaki sidikten ajıratıw hár dayım ańsat emes, kópshilik hayallar sidik ajıraldı dep oylawı múmkin – gúmanıńız bolsa da tuwıtxanaǵa barıń.
— Shın tolǵaq baslansa. Olar jalǵan tolǵaqlardan parıqlı túrde awırıwlı, dawamlı xarakterge iye hám kóbirek diskomfort tuwdıradı.
41-hápte
Hámile uzınlıǵı 50-56 sm, dene salmaǵı bolsa 3,2-4,1 kg-dı quraydı. Bul kórsetkishler násilge hám basqa faktorlarǵa baylanıslı boladı. Bul kórsetkishler ortasha etip alınǵan. 41-háptege kelip hámile organizminde sezilerli ózgerisler júz bermeydi. Barlıq aǵzalar jetilisken, bala dúnyaǵa keliwge tayar.
Tuwıt akusher-ginekolog tárepinen tábiyiy tuwıw yamasa kesarche kesiw usılında ámelge asırıladı.
Hámiledarlıq kalendarı: 42-hápte
Tuwıt hár qanday waqıtta júz beriwi múmkin hám siz jaqın waqıtlar ishinde perzentińizdi qolıńızda uslawıńız, onı emiziwińiz, besikke bólewińiz hám usı sıyaqlı jaǵımlı mashǵalalar menen bánt bolasız. 41 hápte tolǵannan keyin tuwıt baslanbasa, ana hám hámile ushın qáwip arta baradı. Sol sebepli xalıqaralıq usınıslarǵa muwapıq 41 hápte tolǵanda shıpaker tuwıttı jasalma túrde qozǵatıwdı usınıs etedi – bul múddetke jetkenińizde álbette shıpakerińizge barıń.
Náreste múbárek bolsın!
Siz hár bir hayal asıǵıp kútken baxıtqa miyasar boldıńız, qutlıqlaymız! Bunday baxıtlı demlerińizde sizge sherik bolǵanımızdan quwanıshlımız!
Eger sizge “Lalu – Hámiledarlıq mektebi” mobil qosımshası unaǵan bolsa, basqa da hámiledar doslarıńızdı usı mektebimizge mirát etiń.
Sizge bolsa náreste kútimi hám tárbiyasında áwmet tilegen halda, bunday áhmiyetli wazıypaǵa tap hámiledarlıq dáwirińizdegi sıyaqlı juwapkershilik penen qatnas jasawıńızdı sorap qalamız.
Náresteńizdi kútiwde de sizge “Lalu” qosımshamız asqatar degen úmittemiz. Eger balańızdıń durıs ósip-rawajlanıwın hámde kútimin isenimli maǵlıwmatlar tiykarında alıp barıwdı qáleseńiz, usı qosımshamızdan paydalanıwdı dawam etiń!
