Kópshilik bolajaq analar hámiledarlıq dáwiri dawamında bir neshe márte tamır tartılıwı sıyaqlı jeńil awırıwlardı basınan keshiredi. Náreste úlkeyip rawajlanǵan sayın hár kúni denede ózgerisler baqlanadı, ulıwma alǵanda náresteni 9 ay dawamında kóterip júriw de ańsat jumıs emes.
Tamır tartılıw jaǵdayları hámiledarlıq dáwirinde baqlanatuǵın ádettegi belgilerden biri bolıwı múmkin. Eger hayal maǵlıwmatqa iye bolsa, organizminde qaysı awırıw ne sebepten payda bolıp atırǵanın ańsat biliwi múmkin.
Tamır tartılıwı payda bolıw basqıshları
Birinshi hám ekinshi 3 aylıq dawamında pútkil dene náreste ushın qolaylı ortalıq jaratıw menen bánt boladı. Bul waqıt dawamında jatır bulshıq etleri sozılıp, keńeyiwdi baslaydı. Bulshıq etlerdiń keńeyiwi qarınnıń eki tárepinde tartılıw sezimi payda bolıwına sebep boladı. Hámiledarlıq dáwiri endi baslanǵanda hayız kórgendegidey awırıwlardı da seziw múmkin.
Sebepleri
Hámiledarlıqtıń dáslepki dáwirinde hayallarda ádette ish qatıwı (qabızlıq) baqlanadı, bul da tamır tartılıwına sebep bolıwı múmkin. Sonday-aq, ádettegi kúndelikli shınıǵıwlardı orınlawda da tamırlar tez-tez tartılıp qalıwı múmkin.
Infekciya
Zamarrıq infekciyaları yamasa sidik jolları infekciyaları da tamır tartılıwına alıp keliwi múmkin. Britaniya medicina associaciyası tárepinen ótkerilgen izertlew sonı kórsetti, bolajaq analardıń shama menen 6% inde hámiledarlıq dáwirinde sidik jolları infekciyaları rawajlanadı.
Áhmiyetli: Citomegalovirus
Jınısıy qatnas
Jınısıy qatnas ta tamır tartılıwın keltirip shıǵarıwı múmkin. “HealthyWomen” mámleketlik emes kommerciyalıq emes shólkeminiń maǵlıwmatlarına qaraǵanda, saw hayallardıń kópshiligi náreste tuwılǵanǵa shekem de jınısıy qatnasta bolıwı múmkin. Biraq hámiledarlıq dáwirinde qarın úlkeygeni sebepli jınısıy qatnasta bolıw onsha jaǵımlı sezilmeydi.
Jatırdan tıs hámiledarlıq
Jeńil tamır tartısıwları hámiledarda qáliptegi jaǵday esaplansa da, eger ol qanday da bir awırıwlardı keltirip shıǵarıp atırǵan bolsa, shıpakerge kóriniw usınıs etiledi. Eger tartısıwlar menen birge daqlar yamasa qan ketiw baslansa, bul jaǵday jatırdan tıs hámiledarlıq belgisi bolıwı múmkin, yaǵnıy bunda hámile jatırda emes, al fallopiy tútiksheleriniń birinde jaylasıp qalıw itimallıǵı bar. Bunday jaǵdayda dárhal shıpakerge múrájat etiń.
Bir neshe minutta ótip ketpeytuǵın turaqlı kúshli awırıwlar payda bolıp atırǵan bolsa, dárhal shıpakerge kóriniw shárt.
Hámiledarlıq dáwirinde qan basımınıń kóteriliwi
Ádette qan basımınıń kóteriliwi hámile 20 háptelik bolǵannan keyin baslanadı. Qan basımınıń kóteriliwi preeklampsiya belgisi bolıwı múmkin. Preeklampsiyada qabırǵalar astında, qarınnıń joqarı oń tárepinde awırıw payda bolıwı múmkin. Bunday awırıw, kúshli bas awırıwı, kóz aldınıń kúńgirtleniwi yamasa bettiń, qollar hám ayaqlardıń birden isip ketiwi baqlansa, dárhal shıpakerge múrájat etiń. Qan basımınıń kóteriliwi placentanıń tuwıwdan aldın jatırdan ajıralıp qalıw qáwpin de arttıradı.
Tamır tartısıwları hám hámiledarlıqtıń úshinshi dáwiri
Hámiledarlıqtıń úshinshi dáwirinde hayallar jambas tarawında qosımsha basım seze baslaydı, sebebi náreste bul dáwirde júdá tez rawajlanıp úlkeyip baradı.
Bala úlkeygen sayın bolsa, ayaqları menen qın nervlerin basıp qaladı. Náreste qarın boslıǵında turaqlı aylanıp háreketlene baslaǵannan keyin bolsa hayal júrgende ádettegiden kóbirek basım hám tamır tartısıwların seziwi múmkin. Bunday waqıtlarda biraz qaptallap jatıp dem alıw awırıwlardı kemeytedi, biraq awırıw turaqlı dawam etse, álbette shıpakerge múrájat etiw kerek.
Tamır tartısıwın jeńillestiriw
Tamır tartısqanda artıqsha hawlıǵıw shárt emes, tek ǵana bir neshe ápiwayı másláhátlerge ámel qılıw jetkilikli. Dáslep, fizikalıq miynette belsendi bolıwdı hám tartısıw payda bolıwına sebep bolatuǵın faktorlardı azaytıw kerek. Túnde uyqlawdan aldın jıllı vanna qabıl etiw, tınısh hám asuda ortalıqta dem alıw qarındaǵı awırıwlardı azaytıwǵa ádewir járdem beredi.
Qızıqlı: Hámiledarlıq dáwirindegi qálew-tilekler neden derek beredi?
