Kóplegen hámiledar hayallarda hámiledarlıqtıń baslanıwı menen, yaǵnıy birinshi trimestr dawamında qan ketiw hám qanlı daqlar baqlanadı. Biraq, hámiledarlıqta qan keliwi yamasa daqlanıwdıń hámmesi birdey birinshi trimestrde qáwipli emes, degen menen medicinalıq jaqtan onı bahalaw júdá úlken áhmiyetke iye. Shıpakerler birinshi úsh aylıqta qan ketiw sebeplerin hár túrli analizler hám tekseriwler nátiyjesinde anıqlawı múmkin. Olar hámiledarlıqta qan ketiw sebebin anıqlaǵanınan soń emlew hám onı basqarıw jolların islep shıǵadı.
Hámiledarlıqta qan ketiw sebepleri
Hámiledar hayallardıń derlik 15-25 %i birinshi úsh aylıqta qan ketiw jaǵdayın basınan keshiredi.
Birinshi úsh aylıqta qan ketiwdiń sebepleri:
- Implantaciyadan qan ketiwi;
- Subxorionlik qan ketiw;
- Hámileni erte joǵaltıw;
- Infekciyalar hám qabınıw;
- Jatırdan tısqarı hámiledarlıq.
Birinshi úsh aylıqta qan ketiwi sebepleri haqqında kóbirek maǵlıwmat alıw ushın tómendegilerdi oqıń:
Implantaciyadan qan ketiwi
Uruǵlanǵan máyekshe endometriyge ornalasqannan 1-2 hápte ótken soń jeńil qan keliwi múmkin. Bul keń tarqalǵan simptom implantaciyadan qan ketiwi sıpatında belgili hám bul qáweterleniwge sebep bolmaydı.
Subxorionlik qan ketiw
Subxorionlik qan ketiw xorion hám jatır diywalı arasında qan ketiw júz bergende payda boladı. Xorion bul jatır diywalında jaylasqan, embriondı oralap turatuǵın membranadır. Xorion aqır-aqıbetinde placentanı payda etedi.
Hámiledarlıqta subxorionik qan ketiwi diagnozı ádette, ultratawıs tekseriwi waqtında kórinedi. Bul jaǵday hátteki asqınıwsız bolǵan hámiledarlıqqa da tásir etiwi múmkin. Erte hámiledarlıq dáwirinde subxorionik qan ketiw erte tuwılıw hám spontan abort qáwpin arttırıwı múmkin.
Hámileni erte joǵaltıw
Shıpakerler hámileniń erte joǵalıwın «jasay almaǵan hámiledarlıq» dep ataydı. Xalıq arasında bul jaǵdaydı óz-ózinen bolǵan abort yamasa bala túsiw dep ataydı.
Erte hámiledarlıqtıń joǵalıwınıń bir neshe sebepleri bar. Eń kóp ushırasatuǵın sebep (shama menen yarımı) — hámiledegi xromosoma anomaliyaları. Basqa sebepler hám jaǵdaylar tómendegiler:
- Jatırdan tısqarı hámiledarlıq;
- Hámiledarlıqtıń trofoblastik keselligi;
- Anembrion hámiledarlıq;
- Tamamlanbaǵan abort;
- Infekciyalar hám basqalar.
Hámiledarlıqta qan ketiw belgileri
Implantaciyadan qan ketiwde jeńil qan ketiw yaki basqa belgilersiz qan ketiw jaǵdayları júzege keledi. Geyde hámiledar hayallar implantacion qan ketiw júz bergende bunı hayz cikli buzılıwı dep qáte oylaydı, sebebi bul jaǵday hayz kóriw kútilip atırǵan múddette yaki sol múddet átirapında júz beriwi múmkin.
Hámileniń erte túsiwi menen qan ketiw baqlanǵanda hayallarda basqa da belgiler júzege keliwi múmkin, máselen, jatırdıń tartısıp awırıwı. Hámileni erte joǵaltıwdıń jáne bir kem ushırasatuǵın belgisi kewil aynıwı sıyaqlı ulıwma hámiledarlıq belgileriniń joǵalıwı bolıp tabıladı.
Eger hámiledarlıqtıń birinshi úsh aylıǵında qınnan qan ketiwine infekciya faktorı sebep bolsa, bunda hayallarda ısıtpa, siyiw waqtında qıyınshılıq yamasa awırıw, qın hám onıń átirapında awırıw sezimi payda bolıwı múmkin.
Jatırdan tısqarı hámiledarlıǵı bar hayallarǵa medicinalıq járdem júdá zárúr. Olar basınan keshiriwi múmkin bolǵan belgilerge qarınnıń tómengi bóleginde (kóbinese bir tárepinde) awırıw, qınnan qan keliwi, iyin ushında awırıw, bas aylanıwı yamasa esinen tanıw kiredi. Qattı awırıw, bas aylanıwı yamasa esinen tanıw bolsa, dárhal tez járdem shaqırıń.
Emlew
Implantaciyadan qan ketiw emleniwdi talap etpeydi, sebebi bul jaǵday birinshi úsh aylıqta bolatuǵın normal jaǵday bolıp, asqınıw qaldırmaydı.
Birinshi úsh aylıqta júz bergen hámileni joǵaltıw jaǵdayı kóbinese óz-ózinen tamamlanadı, biraq geyde dári-dármaqlar yamasa xirurgiyalıq aralasıw (vakuum-aspiraciya) kerek boladı. Sonıń menen bir qatarda bul shıpakerdiń baqlawı astında abort jaǵdayınıń óz-ózinen tamamlanıwın kútiwdi de óz ishine aladı.
Sol sebepli, hámiledarlıqta qan keliw jaǵdayı baqlanıp atırǵan hámiledar hayal ginekolog shıpaker menen bul jaǵdaydı talqılawı, zárúr tekseriwlerden ótiwi kerek.
Áhmiyetli: Hámiledarlıqta sidikte qan bolıwı
Qashan shıpakerge kóriniw kerek?
Birinshi trimestrde yamasa hámiledarlıqtıń qálegen dáwirinde qan ketiw jaǵdayı bolıp atırǵan hayallar álbette, shıpakerge múrájat etiwi kerek. Itimallıǵı, shıpaker qan analizin tapsırıwdı buyıradı hám qan ketiw sebeplerin anıqlaw ushın qındı tekseriwden ótkeredi.
Qan ketiw hárdayım da hámileniń túskenligin (joǵaltılǵanlıǵın) kórsetpeydi. Eger shıpaker hámilede qanday da bir asqınıw júzege keliwinen gúmanlansa, olar birgelikte tiyisli emlew usılların dodalaydı, bul hámiledarlıqtı baqlap barıw, perzent tuwılıwın abaylap kútiw, dári-dármaqlar yamasa operaciya ámeliyatın óz ishine alıwı múmkin.
Juwmaqlap aytqanda, birinshi úsh aylıqta jeńil qan ketiw ádettegi jaǵday. Sonıń menen birge, ayırım jaǵdaylarda qan ketiw hámileniń erte joǵaltılıwın kórsetiwi múmkin. Bunday jaǵdaylarda shıpakerler birinshi gezekte qan ketiw sebebin anıqlaydı. Qan ketiwdiń ayırım kórinisleri qáwipli emes, mısalı, implantaciyadan qan ketiwi. Qınnan qan ketiwdiń basqa sebepleri, sonday-aq, subxorionik qan ketiwler bolsa arnawlı tekseriwdi talap etedi.
Hámiledarlıq mashqalaları: Hámiledarlıqta jatır tonusınıń artıwı
