Jáne bel awırıwı biymazawlap atır ma?! Hámiledarlıqta bel awırıwı ne sebepten payda boladı hám onı qalay jeńiwińiz múmkin?! Usı maqala arqalı bul sorawlarǵa qoldan kelgenshe juwap berip ótemiz.
Eger hámiledarlıqta bel awırıwı kóp biymazawlap atırǵan bolsa, siz jalǵız emessiz. Bel awırıwı hámiledarlar arasında eń keń tarqalǵan unamsız belgilerden biri bolıp esaplanadı.
Hámiledarlıqta bel awırıwı qalay namayan boladı?
Hámiledarlıq waqtında bel awırıwı ádette ayaq yamasa quymıshaq ishine kirip barıwı múmkin bolǵan, joqarı yamasa tómengi bel hám sanlarda ushırasatuǵın qatıp qalıwlar sıyaqlı awırıwlar túrinde namayan boladı.
Ókinishke oray, bel awırıwı hámiledarlıq kalendarınıń dáslepki múddetlerinen-aq baslanıwı múmkin. Ayırım hayallar bunı birinshi trimestrde basınan keshiredi, biraq kópshilik hayallarda hámiledarlıqta bel awırıwı 18-háptelerde, ekinshi trimestrde baslanadı. Ekinshi trimestr hám ásirese úshinshi trimestrde, yamasa siz tuwǵanǵa shekem bel awırıwı dawam etiwi, geyde kúsheyiwi múmkin. Ayırım jaǵdaylarda hámiledarlıqtaǵı bel awırıwı tuwıwdan keyingi bel awırıwı menen almasadı.
Hámiledarlıqta bel awırıwı ne sebepten payda boladı?
Hámiledarlıq dawamında relaksin dep atalıwshı gormon bólinip shıǵadı, nátiyjede balańızdıń tuwıw waqtında tuwıw jollarınan ańsatıraq ótiwi ushın jambas súyegi hám basqa jerlerdegi buwınlar baylamları bosasadı.
Buǵan ósip atırǵan jatırıńızdıń salmaǵı qosıladı, hám deneńizdiń tayanısh orayı aldıǵa jıljıwı menen teńsalmaqlıǵıńız joǵaladı.
Óz gezeginde, júkti kóteriw ushın tómengi bel tárepińiz ádettegiden kóbirek iyiledi, nátiyjede bulshıq etler qıyınshılıq penen isleydi hám siz boljaǵanıńızday, awırıw hám qattılıq sezimi payda boladı.
Oqıń: Hámiledarlıqta jatır tonusınıń artıwı
Hámiledarlıqtaǵı bel awırıwı radikulitke uqsas pa?
Awa, radikulitke uqsas. Eger siz arqańızdan yamasa quymıshaǵıńızdan baslanıp ayaqlarıńızdan ótetuǵın ótkir, tartıwshı awırıwdı sezseńiz, siz radikulitti bastan ótkerip atırǵan bolıwıńız da múmkin.
Hámiledarlıq waqtında bel awırıwı haqqında jaqsı jańalıq sonda, ol ádettegidey, ańsat sheshiledi. Bunnan tısqarı, onı jeńillestiriwshi kóplegen usıllar bar. Sonıń ushın eger bir sheshim islemese, basqası járdem beriwi múmkin.
Bel awırıwın emlew usılları
Hámiledarlıqtaǵı bel awırıwın joq etiw ushın tómendegi usıllardı sınap kóriń:
Otırıw jaǵdayıńızǵa itibar beriń!
Kúni menen stulda súyenip otırıw omırtqańızǵa hámme nárseden de kóbirek júk boladı. Úyde hám jumısta siz kóp paydalanatuǵın stullardıń jaqsı ekenligine isenim hasıl etiń. Arqa hám qollar tuwrı halatta hám bekkem kópshik penen otırıw abzalıraq.
Ayaqlarıńızdı biraz kóteriw ushın ayaq tireginen paydalanıń hám ayaqlarıńızdı ayqastırıp otırmań. Bul siziń jambas súyegińizdi aldıǵa jıljıtıwǵa alıp keledi, bul bolsa arqa bulshıq etlerdiń zorıǵıwına sebep boladı.
Tánepisler qılıń!
Imkaniyat tuwılsa, saatına keminde bir márte júriń, yamasa ornıńızdan turıń hám sozılıń. Uzaq otırıw yamasa belgili bir jaǵdayda bolıw belińizdiń jáne de qattıraq awırıwına alıp keliwi múmkin.
Uzaq tik turmawǵa da háreket etiń. Eger siz ayaq ústinde isleseńiz, belińizdi biraz basıp turıw ushın bir ayaǵıńızdı pás stulǵa qoyıp islewge háreket etiń.
Awır júklerdi kóteriwden saqlanıń!
Eger májbúr bolsańız, bunı áste-aqırın orınlań. Keń poziciyanı iyelep, ózińizdi turaqlastırıń; belden emes, dizeden búgiliń; eńkeyiń hám belińiz benen emes, al qollarıńız hám ayaqlarıńız kúshi járdeminde kóteriń. Jaqsısı, birewden járdem sorań!
Óz salmaǵıńızdı baqlap barıń!
Hámiledarlıq waqtında salmaq artıwın baqlap barıń: artıqsha salmaq hám júdá tez semiriw omırtqa baǵanasıńızǵa túsetuǵın júklemeniń artıwına sebep bolıwı múmkin.
Tuwrı ayaq kiyim kiyiń!
Júdá biyik ókshelerden bas tartıń. Imkan barınsha, tegis óksheli ayaq kiyim kiyiń. Qánigeler deneńizdi tuwrı tegislikte uslap turıw ushın tabandı jaqsı qollap turatuǵın, pás óksheli ayaq kiyimdi usınıs etedi. Bunnan tısqarı, bulshıq etler ushın arnalǵan arnawlı ayaq kiyim qosımshaların da kórip shıǵıwıńız múmkin.
Qattı tósekten paydalanıń!
Eger qattı tósekten paydalanbasańız onı waqtınsha almastırǵanıńız maqul. Sebebi tegis betke jatıw sizge stressti minimallastırıwǵa hám uyqı jaǵdayın jaqsılawǵa járdem beredi.
