Hámiledarlıqta toksikoz hámiledarlıqtıń ulıwma belgisi bolıp, kewil aynıwı hám waqtı-waqtı menen qusıw menen ajıralıp turadı. Toksikoz ádette azanǵı kewil aynıwı menen biymazaw qılıwı menen bir qatarda, kúnniń qálegen waqtında da tap usı belgiler menen hámiledar hayalǵa hár túrli qolaysızlıqlar tuwdırıwı múmkin.
Toksikoz ádette, hámiledarlıqtıń birinshi úsh aylıǵında júz beredi hám oǵan hámiledarlıqtıń birinshi belgilerinen biri sıpatında qaraladı. Hámiledar hayallardıń shama menen 70-80 procenti birinshi trimestrde kewil aynıw yamasa qusıw sıyaqlı biymazawlıqlardı bastan keshiredi.
Hámiledarlıqta toksikoz qashan baslanadı?
Hámiledarlıqtıń kewil aynıwı hám qusıw ádette hámiledarlıqtıń 9-háptesinen aldın baslanadı. Hám kópshilik hayallarda bul hámiledarlıqtıń 14-háptesinde joǵaladı. Ayırım hayallarda bolsa toksikoz birneshe hápte yamasa ay dawam etedi. Ayırım hayallarda bolsa bul pútkil hámiledarlıq dáwiri dawamında qıynaydı.
Hámiledarlıqta kewil aynıwı hám qusıw ádette hámilege zıyan jetkermeydi, biraq bul siziń ómirińizge, sonıń ishinde jumıs qábiletińizge yamasa ádettegi kúndelikli jumıslarıńızǵa jaman tásir etiwi múmkin. Ózińizdi jaqsı seziwińiz hám belgilerdiń jamanlaspawın támiyinleytuǵın toksikozdı emlewdiń qáwipsiz variantları bar. Usı maqalamız arqalı hámiledarlıqta toksikozdı úy sharayatında emlew yamasa jeńilletiw usıllarına toqtap ótemiz.
Kóbirek dem alıń
Kóbinese birinshi trimestrde bolajaq ana ózin hálsiz, uyqısı kiyatırǵanday sezedi, dem alıwdı qáleydi hám geyde ol tek háreket etiwge kúsh taba almaydı. Bul, álbette, toksikoz emes, biraq eger bunday sezimler payda bolsa, tosattan kewil aynıwdıń jáne bir pristupın qozǵatpaw ushın olarǵa boyınısıw kerek. Kóbirek dem alıń hám tosattan keskin háreketler islemeń.
Samallatılǵan bólmede uyıqlań: jataq bólmedegi hawa taza hám salqın bolıwı kerek. Bárqulla óz waqtında uyıqlań, yarım túnde televizor yamasa kompyuter aldında otırmań, barlıq tınıshsızlandırıwshı faktorlardı joq etiń: qolaysız matras, kórpe, kópshik, qattı tósek, sebebi uyqı qanbawı da azanǵı kewil aynıwǵa alıp keliwi múmkin.
Hámiledarlıqta toksikoz pristupınan saqlanıw ushın durıs awqatlanıń
Az-azdan kúnine 5-6 márte, hátteki onnan da kóp márte hám bárqulla az-azdan awqatlanıń. Bul toksikozdı jeńillestiriwge járdem beriwi múmkin.
Azanda oyanǵanıńızda dárriw tósegińizden turmań. Toksikozǵa qarsı eń nátiyjeli usıllardan biri tósekte azanǵı awqatlanıw bolıp tabıladı. Keshte qatıq yamasa azanda jewdi jaqsı kóretuǵın qálegen ónimdi jataǵıńızdıń janına qoyıń. Azanda bolsa, turıwdan aldın awqatlanıń, keyin biraz jatıń. Bul menen azanǵı toksikoz ulıwma tınıshsızlandırmawına yamasa júdá jeńil ótiwine erisiw múmkin.
Ádette, toksikozda maylı, ıslanǵan, duzlanǵan awqatlar jew, gazlengen suw ishiw usınıs etilmeydi (ádettegi qáwipli azıq-awqat toplamı). Biraq, itimal, ayırım den-sawlıq ushın paydalı bolmaǵan ónimler hámiledarlıqta sizge unawı hám ayırım paydalı awqatlar, kerisinshe, kewil aynıwına alıp keliwi de múmkin. «Hámiledarlar ınjıqlıqları» — túnde balıq yamasa qıyar menen tort jew tilegi — bul deneniń azıq-awqattıń ol yamasa bul quramlıq bólegine mútájligi haqqındaǵı sorawları bolıp tabıladı. «Lalu» qosımshasınan shıǵıwıńız benen-aq, onı jáne saǵınıp qalıwıńız, bul da «Hámiledarlıq ınjıqlıqları»nan biri. 😊
Mısalı, bor shaynaw tilegi kalciy jetispewshiliginiń belgisi esaplanadı.
Eger qanday da bir ónimdi jew yamasa ishiwdi qálemeseńiz, hátteki bul ónim júdá paydalı hám zárúr bolsa da, onı tutınbań.
Tez-tez suyıqlıq ishiń
Toksikoz kewil aynıwı menen sheklenbewi múmkin, geyde qusıw da qosılıwı múmkin. Bul organizmde suyıqlıq joǵalatuǵının ańlatadı. Sonıń ushın, awqatlanıw aralıǵında tez-tez suw ishiń: bir-eki urtlam gazlenbegen mineral suw yamasa limonlı shay kewil aynıwdı jeńiwge hám joytılǵan suyıqlıqtıń ornın toltırıwǵa járdem beredi. Biraq suyıqlıqtı kishi urtlamlar menen ishiwińiz kerek. Bunnan tısqarı, bir múddet sorpalardan waz keshiwińiz kerek, sebebi kóp muǵdarda suyıqlıq ishiw hám suyıq awqatlanıw, kerisinshe, kewil aynıw hám qusıwdı keltirip shıǵarıwı múmkin.
Taza hawadan dem alıń
Taza hawada júriw hámme ushın paydalı, bul ásirese toksikoz benen gúresip atırǵan hámiledar hayallar ushın eki ese paydalı. Birinshiden, júriw waqtında hámiledar ana hám náresteniń qanı kislorod penen toyınıp, bul salamatlıq ushın júdá áhmiyetli, ekinshiden, júriw nerv sistemasın tınıshlandıradı.
Bul faktorlar birgelikte toksikozdıń unamsız belgilerin azaytıwǵa járdem beredi. Siz kúnine keminde eki saat piyada júriwińiz kerek, piyada júriw tek ǵana kóshe boylap emes, al hawası taza jerlerde: toǵayda, parkte, ashıq maydanlarda hám eń áhmiyetlisi, qala sırtında bolsa júdá nátiyjeli boladı. Kóshege shıǵıwdan aldın, marshruttı oylap kóriń: gaz benen pataslanǵan magistral jollardan, kóshe kafelerinen, azıq-awqat dúkanlarınan hám basqa da «xosh iyisli» orınlardan ilajı barınsha júrmeń.
Xosh iyislerden qashıń
Birinshi trimestrde dám hám iyiske hámiledar hayaldıń múnásibeti ózgeredi. Endi sizdiń súyikli átirińiz de kewil aynıwı, bas awırıwı hám allergiyalıq reakciyaǵa sebep bolıwı múmkin. Sonıń ushın, sizdi qıynaytuǵın barlıq xosh iyisli kosmetika qurallarınan waqtınsha waz keshiń: parfyumeriya, dezodorantlar, kremler hám basqalar. Ómirlik joldasıńızǵa da sizdi tınıshsızlandırıp atırǵan iyisli átirlerden paydalanbawın túsindiriwińiz múmkin, álbette bular ınjıqlıq emes, al waqıtsha ilaj, tez arada hámmesi normal jaǵdayǵa qaytadı.
Gózzallıq ónimlerisiz ne qılaman, dep táshwishlenbeń. Kosmetika dúkanları da, dárixanalar da iyissiz yamasa minimal iyisli hár qıylı kremler hám shampunlar menen tolı.
Óz ústińizde isleń
Psixologlardıń pikirinshe, toksikozdıń sebebi tek gormonal ózgerisler emes, bálki hayaldıń psixologiyalıq jaǵdayı da. Hayal qanshelli kóp táshwish hám qorqıw astında bolsa, toksikoz sonshelli anıq hám kúshli bolıwı múmkin. Ideal jaǵdayda, hámiledarlıq waqtında hár qanday stressten ózińizdi sheklew jaqsıraq.
Álbette, ashıwlanıw yamasa qáweterleniwden qashıw hár dayım da múmkin emes, biraq televizordı az kóriw, internette unamsız jańalıqlar hám hámiledarlıqtıń «qorqınıshlı gúrrińlerin» oqımaw, kúndelikli turmıslıq mashqalalardan shetlep ótiw imkaniyatı hár bir hayalda bar.
Sonıń ushın, eger hámiledarlıqta toksikoz táshwishke salsa, hámiledarlıq waqtında ózińiz ushın qolaylı dúnyanı jaratıń. Bunday qolaylı dúnyanı jaratıwda sizge «Lalu» járdem beriwi múmkin.
Eger siz ózińiz benen gúrese almasańız, psixologlarǵa múrájat etiń. Toksikoz haqıyqattan da psixoterapiya járdeminde jaqsı emlenedi. Tiykarǵısı, bolajaq ana óz táshwishlerinen, sonıń ishinde toksikozdan qutılıwdı qálewi kerek.
