Kesar kesiw yamasa keserva — tuwıw shıpakeri, yaǵnıy akusher-ginekolog náresteni vagina arqalı emes, al ananıń qarın boslıǵı hám jatırında kesim payda etiw arqalı tuwdıratuǵın ámeliyat.
Ayırım shıpakerler bunı qarın boslıǵı arqalı tuwılıw dep te ataydı. Ádette, kesar kesiw usılı ana ushın vaginal tuwıw qáwipli bolǵanda yaki bul balaǵa saldamlı zıyan jetkeriw qáwpi tuwılǵanda ǵana ótkeriledi.
Keserva qashan islenedi?
Kesar kesiwdi ótkeriw tómendegi sebeplerge kóre medicinalıq jaqtan zárúr esaplanadı:
- tuwıw belgileri rawajlanbaǵan jaǵdayda;
- kóp hámileli hámiledarlıqta, máselen, egizek yamasa úsh egizek bolǵanda;
- hámilede ayrıqsha yamasa awır densawlıq mashqalaları júzege kelgen waqıtta;
- hámilede gidrocefaliya yamasa miyde artıqsha suyıqlıq bar bolǵanda;
- hámile jaǵdayı arqası menen yaki kesesine bolıp qalǵanda;
- jatır moyınına salıstırǵanda hámileniń erkin ótiwi ushın kóleminiń júdá úlkenligi;
- anada vaginal tuwıw arqalı juǵatuǵın gerpes yamasa AIV sıyaqlı juqpalı virus bolsa;
- anada diabet yamasa joqarı qan basımı sıyaqlı quramalı jaǵdaylar bolsa;
- anada jatır keselligi yamasa jatır moyının tosıp qoyıwshı mioma bolsa;
- placenta yaki kindik bawında anomaliyalar bar bolsa;
- ana burın da kesar kesiwdi basınan keshirgen bolsa.
Qáwipli faktorlar
Kesar kesimi qáwipli faktorlar menen birge keledi. Bunda ana dus keliwi múmkin bolǵan mashqalalarǵa tómendegiler kiredi:
- kesim jarası;
- qan joǵaltıw;
- qan quyqaları;
- organlardaǵı jaraqatlar, sonday-aq, ishekler yamasa sidik qaltası;
- dárilerge yamasa anestetiklerge unamsız reakciyalar;
- keleshekte hámiledarlıq dáwiri dawamında júz beriwi múmkin bolǵan asqınıwlar.
Ayırım hayallar endometritti, jatır silekey qabatınıń jallıǵlanıw keselligin basınan ótkeriwi múmkin. Nárestede júzege keliwi múmkin bolǵan qáwiplerge xirurgiyalıq jaraqat hám dem alıwdaǵı qıyınshılıqlar, máselen, dem alıwdıń tezlesiwi (taxipnoe) yamasa respirator distress sindromı kiredi.
Kesar kesiw operaciyası
Rejeli kesar kesiw ámeliyatı, ádette hámiledarlıqtıń 39-háptesinen baslap ámelge asırıladı.*
Kesar kesiwde akusher ana omırtqasındaǵı arqa miy epidural boslıǵınan anesteziya qılınǵannan soń, qarın hám jatır boylap kesim ótkeredi. Kesar kesiw waqtında ana keń tarqalmaǵan ulıwma biyhushlıq jaǵdayında boladı.
Kesim ádette 10 nan 20 santimetrge (sm) shekem uzınlıqta boladı.
Epidural anesteziya menen ananıń tolıq esten tanbawına qaramastan, deneniń tómengi bólimi awırıwsız bolıp qaladı. Olar tartılıw yamasa tartılıw sezimin bastan keshiriwi múmkin.
Kesiw ádette, 10 nan 20 santimetrge shekemgi uzınlıqta boladı.
Epidural anesteziyada ana tolıq esten tanıp ketpewine qaramastan, bunda deneniń tómengi bóliminde awırıw sezilmeydi.
Geyde akusher ana operaciya procesin kórmewi ushın perde ornatadı, sebebi bul jaǵday anada awırıwlı bolmasa da, onıń ushın process qayǵı sezimin payda etiwi múmkin. Ayırım emlewxanalarda móldir perdelerden paydalanıwǵa ruxsat beriledi. Akusher hám akusher-ginekologlar ananı operaciyanıń qanday ótip atırǵanlıǵı haqqında xabardar etip turadı. Aldın kesar kesiw menen tuwǵan hayallar keyingi hámiledarlıqlarında vaginal, tábiyǵıy tuwıw jolı menen tuwıwı múmkin, álbette joqarıdaǵı sebep faktorları bolmaǵan jaǵdaylarda.
Qayta tikleniw
Kesar kesiwden keyin hayal hám onıń nárestesi emlewxanada kórsetpege muwapıq 2-4 kún qalıwı múmkin.
Jańa ana 4-6 hápte dawamında kesilgen jerinde awırıw, spazm hám qan quyqaları menen yamasa onsız qan ketiwin bastan keshiriwi múmkin. Operaciyanı basınan ótkergen hár bir hayal ushın bul belgilerdiń awırlıq dárejesi parıq qıladı, biraq waqıt ótiwi menen jaǵday tez jaqsılanıp barıwı kerek.
Emlewxanadan soń úyde hayallarǵa fizikalıq iskerlikti sheklew usınıs etiledi.
Shıpaker normal iskerlikti tiklew qáwipsiz ekenligin aytpaǵansha, ádette operaciyadan 4-6 háptege shekem, awır fizikalıq shınıǵıwlar islewden, awır zatlardı kóteriwden, qınǵa bir nárse qoyıwdan yamasa jınısıy qatnasıq jasawdan saqlanıw maqsetke muwapıq.
Keserva operaciyasınan keyin…
Infekciya yamasa basqa da asqınıwlardıń dáslepki belgileri seziliwi menen yamasa gúmanlı bolǵan hár qanday belgiler haqqında shıpakerge xabar beriń.
Bul belgiler tómendegilerdi óz ishine alıwı múmkin:
- ısıtpa;
- awırıwdıń kúsheyiwi;
- vaginal qan ketiwiniń kúsheyiwi;
- kesik ornında qızarıwdıń kúsheyiwi;
- xirurgiyalıq kesiktiń isiwi;
- qızarıw yamasa ısıtpa menen emshek awırıwı;
- jaman iyisli bólinip shıǵıwlar;
- siyiw waqtındaǵı awırıw.
Bul maqala Mayoclinic.org, NHS.uk hám Medicalnewstoday.com maǵlıwmatları tiykarında «Lalu» komandası tárepinen tayarlandı.
