Hámiledarlıq — bul úlken quwanısh dáwiri, biraq bolajaq ana qayǵıratuǵın hesh qanday mashqala joq degeni emes. Olardan biri onıń turaqlı ósip baratırǵan náreste hám qarınnıń úlkeyiw jaǵdayı bolıp esaplanadı. Xosh, hámiledarlıqta qarın qalay ózgeredi?
Hayal hámiledarlıq háptesine salıstırǵanda qarnı júdá úlken yamasa júdá kishi yamasa hámile qarınnıń joqarı bóliminde yamasa tómengi bóliminde «jaylasıwı»nan qáweterleniwi múmkin.
Hámileniń rawajlanıwı hár kimde hár qıylı keshedi
Eger siz hámiledar qarnıńızdıń kólemi yamasa forması haqqında qáweterlenip atırǵan bolsańız, jalǵız emesligińizdi biliń. Barlıq hayallarda bul jaǵday hár qıylı kóriniste boladı hám sizdiń balańızdıń rawajlanıwı jaqsı jaǵdayda, qáweterlenbeń.
Hámiledarlıqta qarınnıń kishiligi
Siz jaqsı awqatlanıp atırsız, shınıǵıwlar islep atırsız hám turaqlı túrde tuwıw aldınan tekseriwlerden ótip atırsız. Soǵan qaramastan, adamlar kóbinese siziń hámileńiz múddetińizge salıstırǵanda kishi kórinetuǵının aytadı yamasa haqıyqatında da jeterli awqatlanıp atırǵanıńızdı soraydı.
Náresteler sıyaqlı, hámiledar hayaldıń qarnı da hár qıylı forma hám ólshemde boladı. Shıpakerińiz yamasa akusherińiz turaqlı tekseriwler arqalı tuwıw sánesińiz hám hámileńizdiń úlken-kishiligine qarap, tuwılajaq perzentińizdiń úlkenligin aytıp beredi, hár bir saparıńızda bir márte qarnıńız ólshenedi hám bul turaqlı tekseriwler 15 hápteden 20 háptege shekemgi waqıttan baslap ótkeriledi.
Eger qarın boslıǵı bulshıq etleri shınında da kúshli hám bekkem bolsa, olar siziń ósip atırǵan jatırıńızdaǵı hámileniń kútilgenindey sırtqa shıǵıp ketiwine jol qoymaydı. Uzın boylı hayallardıń qarnı da qarın boslıǵı birdey múddet hám ólshemdegi kelte boylı hayaldıń qarnına qaraǵanda kishirek kórinedi.
Hámiledarlıqta qarınnıń kishiligi menen baylanıslı bolǵan birden-bir mashqala bul oligogidramnion dep atalatuǵın jaǵday bolıp, bunda amniotik suyıqlıq júdá az muǵdarda boladı. Bul shıpakerińiz siziń turaqlı prenatal tekseriwlerińizde itibar beriwi kerek bolǵan jaǵday.
Qızıqlı: Analıq instinkti degen ne?
Hámiledarlıqta qarın úlkeyiwi yamasa úlken bolıwı
Hámileniń qarnıńızda jaylasıwı yamasa dene dúzilisińiz sebepli siz salıstırmalı úlkenirek hámileni kóterip atırǵanday kóriniwińiz múmkin. Kelte boylı hayalda hámiledar qarın júdá úlken kóriniwi múmkin.
Eger bul siziń birinshi hámiledarlıǵıńız bolmasa, itimal birinshi hámiledarlıq dáwirine qaraǵanda erterek qarnıńızdıń úlkeygenin sezgen bolıwıńız múmkin. Bunıń sebebi, birinshi hámiledarlıqtan keyin bulshıq etlerińiz biraz sozılǵan boladı hám jatırdıń keńeyiwine ańsatıraq boysınadı.
Siziń shıpakerińiz yamasa akusherińiz hár saparı prenatal tekseriwlerde qarın kólemin ólsheydi hám qadaǵalaydı.
Kemnen-kem jaǵdaylarda, qarınnıń úlken bolıwına amniotik suyıqlıqtıń kópligi (poligidramnion) sebep boladı hám shıpaker óz waqtında bul jaǵdaydı durıs bahalap, shara kóriwi kerek boladı.
Hámileniń qarınnıń joqarı bóliminde bolıwı
Náresteniń jatırǵa aldıǵa hám joqarıǵa qaratılǵan jaǵdayda jaylasıwı, ásirese, hámiledarlıqtıń birinshi eki trimestrinde ádettegi jaǵday emes. Ayırım hayallar hámiledarlıqtı basınan aqırına shekem usı tárizde ótkeredi, ásirese qarın bulshıq etleri júdá kúshli bolǵan hayallar. Ayırım hayallar úlken jastaǵılardan hámileniń jaylasıwına qarap jınısın anıqlawǵa qızıǵadı. Hám túrli izertlewler júrgizedi. Biraq hámile jaylasıwına qarap jınısın anıqlaw sıyaqlı pikirler hesh qanday ilimiy tiykarǵa iye emes.
Hámileniń tómende jaylasıwı
Balanı jatırdıń tómengi bóliminde kóterip júriw qolaysız bolıwı múmkin. Ekinshi yamasa úshinshi hámiledarlıqta ósip atırǵan jatırǵa járdem beriwshi bulshıq etler hám sińirler sozılǵan hám hálsiregen bolıp, ósip atırǵan jatırdı burınǵıday uslap tura almaydı.
Hámiledarlıqtıń aqırına kelip, siz derlik bir túnde aldınǵıǵa qaraǵanda kemrek awırlıqtı kóterip atırǵanıńızdı seziwińiz múmkin. Bunıń sebebi, itimal, siziń náresteńiz tuwılıwǵa tayarlıq kórip atır (Hámme nárestelerde de bul baqlanbaydı, ayırımları tuwıw baslanǵanǵa shekem túspeydi).
Eger hámiledarlıq kalendarı boyınsha 37-hápteden aldın bir kún ishinde bul jaǵday payda bolǵanın sezseńiz, shıpakerińiz benen sóylesiń, sebebi bul organizmińiz tuwılıwǵa tayarlanıp atırǵanın bildiriwi múmkin.
Hámileniń tómende bolıwınıń eń úlken mashqalası — bul siziń belińizge basım túsiriwi. Jambas boslıǵın háreketlendiriw sıyaqlı shınıǵıwlar tómengi bólimdegi qolaysızlıq yamasa beldegi awırıwdı jeńilletiwge járdem beredi.
Áhmiyetli: Hámiledarlıqta bel awırıwı — sebepleri hám saplastırıw usılları
Hámiledarlıqta qarın: Keń jayılıwı
Qarınnıń keń bolıwı balańızdıń kesesine jatqanlıǵın, yaǵnıy bası joqarıǵa yamasa tómenge emes, al qaptalǵa qaratıp jatqanlıǵın ańlatıwı múmkin.
Eger náreste tuwılıw waqtına shekem basın tómenge qaratpasa, bul jaǵdayda sizge keserva kerek bolıwı múmkin.
Hámiledarlıqta durıs awqatlanıw ushın shıpaker yamasa akusherdiń kórsetpelerine ámel etiń, sebebi siz hám náresteńizdiń densawlıǵı áyne salamat awqatlanıw hám durıs shólkemlestirilgen kúndelikli ádetlerge baylanıslı.
