Дар аксари одамон пневмония бо шамолхӯрии оддӣ ё зуком оғоз ёфта, сипас ба шуш мегузарад. Агар пневмония дар давраи ҳомиладорӣ табобат карда нашавад, метавонад барои ҳаёт хатарнок бошад, бар замми ин, мубориза бо ин беморӣ барои занони ҳомила каме мушкилтар мегузарад.
Аломатҳои пневмония дар давраи ҳомиладорӣ
Ҳангоми ҳомиладорӣ бояд аз аломатҳои пневмония огоҳ буд ва барои табобати он фавран ба духтур муроҷиат кард.
Аломатҳои умумӣ инҳоянд:
- Аломатҳои ба шамолхӯрӣ ва зуком монанд, масалан, дарди гулӯ, сар ва буғумҳо;
- Мушкил шудани нафаскашӣ ё нафаскашии тез-тез;
- Беҳолии сахт, хастагӣ;
- Таб ё ларза;
- Дард дар қафаси сина;
- Сулфаи шадид.
Таъсири пневмония ба модар ва кӯдак
Пневмония бемории вазнин буда, дар сурати табобат нашудан, метавонад барои модар ва кӯдаки оянда оризаҳои хатарнок ба бор орад.
Пневмонияи давраи ҳомиладорӣ ба кам шудани оксиген дар организм оварда мерасонад, зеро дар ин ҳолат шушҳо наметавонанд ба бадан миқдори кофии оксигенро дастрас кунанд. Дар натиҷа, ба бачадон низ миқдори ками оксиген мерасад.
Эҳтимол дорад, ки ин беморӣ аз шуш ба дигар узвҳои бадан, аз ҷумла ба рагҳои хунӣ низ паҳн шавад.
Пневмония дар давраи ҳомиладорӣ метавонад ба чунин оқибатҳо оварда расонад:
- Таваллуди бармаҳал;
- Кам шудани вазни ҷанин.
Аксари занон нигаронанд, ки сулфаи сахт барои ҳомила хатарнок аст. Аммо тифл бо моеъи амниотикӣ фаро гирифта шудааст, ки ҳамчун амортизатор амал карда, ҳомиларо аз сулфа, ларзишҳову садоҳои гуногун, фишор ва зарбаҳои сабук муҳофизат менамояд.
Муҳим: Оё мавҷудияти сафеда дар таркиби пешоб ҳангоми ҳомиладорӣ хатарнок аст?
Омилҳои хавф
Ҳомиладорӣ хатари гирифторшавии занро ба пневмония зиёд мекунад, зеро организм барои инкишофи кӯдак дар бачадон энергияи зиёд сарф менамояд. Илова бар ин, кӯдаки дар ҳоли рушд ва бачадони калоншаванда низ ҳаҷми шуши занро кам мекунанд, ки ин ба фаъолияти шуш бори иловагӣ меорад.
Пневмония аксар вақт дар натиҷаи сирояти бактериявие, ки ба шуш паҳн мешавад, ба вуҷуд меояд. Бактерияҳое, ки бештар боиси пневмония мегарданд, инҳоянд:
- Haemophilus influenzae
- Mycoplasma pneumoniae
- Streptococcus pneumoniae
Сироятҳои вирусие, ки боиси пневмония (илтиҳоби шуш) мегарданд, инҳоянд:
- Вируси зуком
- Обулакон ё герпеси камарбандӣ (тошмаи сироятӣ)
- Вируси респиратории синситиалӣ (РСВ) ва коронавирус (COVID-19).
Дар ҳолатҳои зерин хавфи гирифтор шудани занон ба пневмонияи давраи ҳомиладорӣ бештар аст:
- Тамоку кашад;
- Анемия (камхунӣ) мавҷуд бошад;
- Астма дошта бошад;
- Ба бемории музмин гирифтор бошад;
- Бо касбе, ки кор бо кӯдакони хурдсолро тақозо мекунад, машғул бошад;
- Дар беморхонаҳо ё хонаҳои пиронсолон кор кунад;
- Иммунитеташ паст бошад.
Табобати илтиҳоби шуш (пневмония) ҳангоми ҳомиладорӣ
Табобати пневмония ҳангоми ҳомиладорӣ ба он вобаста аст, ки ангезандаи сироят вирус аст ё бактерия.
Бисёр усулҳои табобати пневмонияи вирусӣ дар давраи ҳомиладорӣ бехатар ҳисобида мешаванд ва агар бемории пневмония дар марҳилаи аввал муайян карда шавад, онро тавассути доруҳои зиддивирусӣ бартараф кардан мумкин аст. Дар баъзе ҳолатҳо аз ҷониби духтур ба таври иловагӣ оксигентерапия таъин карда мешавад.
Пневмонияи бактериявӣ бошад, бо ёрии антибиотикҳое, ки бо тавсияи духтур таъин шудаанд, табобат карда мешавад.
Шавқовар: Тағйироти шикам ҳангоми ҳомиладорӣ
Кай бояд ба духтур муроҷиат кард?
Ҳамин ки дар зани ҳомила нишонаҳои пневмония пайдо шуданд, бояд фавран ба духтур муроҷиат кард. Дар ин сурат аз оризаҳои гуногуне, ки бар асари беморӣ метавонанд ба вуҷуд оянд, пешгирӣ карда мешавад.
Духтур ба ҷуз пурсидан дар бораи нишонаҳои беморӣ аз шумо:
- Бо фонендоскоп шушҳоро муоина мекунад;
- Аз шушҳо акси рентгенӣ мегирад;
- Аз балғам намуна мегирад.
Дар сурати муайян шудани дараҷаи вазнини пневмония, бистарӣ шудан дар беморхона талаб карда мешавад. Агар зани ҳомила бо аломатҳои зерин дучор ояд, ӯ бояд фавран ба рақами 103 ё рақами ёрии таъҷилии маҳаллӣ занг занад:
- Дарди қафаси сина;
- Душвории нафаскашӣ;
- Таби баланд (38 °C ё болотар), ки ҳатто пас аз қабули парасетамол паст намешавад, ё қайкунии бефосила; ошуфтагии ҳуш ё кам шудани ҳаракатҳои ҳомила.
