Рӯйхати маҳсулоте, ки истеъмолашон ба занони ҳомила тавсия дода намешавад, дар назари аввал беохир менамояд. Аз ҷумла, бо гӯшти дуддодашуда, баъзе маҳсулоти баҳрӣ ва ҳатто маҳсулоти дорои кофеин бояд як муддат хайрухуш кард. Он чизе, ки шумо истеъмол мекунед, ба рушду инкишофи фарзанди шумо таъсир мерасонад, бинобар ин эҳтиёткорӣ ва интихобан истеъмол кардан ҳеҷ гоҳ зарар надорад.
Истеъмоли дурусти сабзавот ҳангоми ҳомиладорӣ метавонад кӯдакро бо витаминҳо ва минералҳои муҳиме таъмин кунад, ки ба рушди ӯ дар батни модар ва пас аз таваллуд низ мусоидат менамоянд. Аммо баъзе сабзавотҳо метавонанд ҳангоми ҳомиладорӣ хатарнок ҳам бошанд.
Дар бораи беҳтарин сабзавотҳо ҳангоми ҳомиладорӣ, инчунин кадом сабзавотҳоро набояд истеъмол кард, метавонед тавассути ин мақола маълумоти муфассал гиред.
Мақолаи муфид: Дар давраи ҳомиладорӣ чӣ мумкин нест?
Фоидаи сабзавот дар давраи ҳомиладорӣ
Беҳтарин сабзавотҳо дар давраи ҳомиладорӣ метавонанд миқдори зиёди моддаҳои ғизоиро таъмин кунанд. Дар вақти мувофиқ ва ба миқдори кофӣ ғизо хӯрдан асоси ғизогирии дурустро ташкил медиҳад. Ғизои солим ба пешгирии норасоии моддаҳои ғизоӣ ва диабети қанди давраи ҳомиладорӣ кумак мекунад.
Фоидаҳои ғизои дуруст:
- нигоҳ доштани вазни солим;
- фишори муътадили хун;
- кам шудани хавфи пайдоиши камхунӣ;
- пешгирии бемориҳои меъдаю рӯда, аз қабили дарунравӣ ва қабзият;
- бо вазни кофӣ таваллуд шудани кӯдак.
Баъзе моддаҳои муҳими ғизоӣ аз инҳо иборатанд:
- бета-каротин – барои системаи масуният, қобилияти биноӣ ва рушди ҳуҷайраҳои кӯдак муфид аст;
- витамини C – барои рушди бофтаҳои солим, дандонҳо ва устухонҳо муфид аст;
- кислотаи фолий – барои вазни солими кӯдак ва пешгирии нуқсонҳои найчаи асаб муҳим аст (ба ғайр аз сабзавот, ҳар рӯз истеъмоли 400 мкг кислотаи фолий дар шакли ҳаб низ тавсия дода мешавад);
- калий – барои танзими фишори хун муҳим аст.
Истеъмоли сабзавот дар давраи ҳомиладорӣ ва баъд аз он барои саломатии кӯдаки шумо аҳамияти ниҳоят калон дорад.
Сабзавоти муфид барои занони ҳомиладор
Беҳтарин сабзавот барои истеъмол ҳангоми ҳомиладорӣ инҳоянд:
- кадуи тобистона ва зимистона – манбаи сафеда, кислотаи фолий ва витаминҳои А, С, К;
- морчӯба (спаржа) – дорои витаминҳои А, С, Е ва К, инчунин клетчатка ва кислотаи фолий мебошад;
- помидор – манбаи витаминҳои С ва К ва моддаи биотин;
- лаблабу – манбаи табиии клетчатка, ки барои тақвияти системаи масуният муфид аст;
- картошка – бой аз витаминҳои А, В ва С;
- қаламфури булғорӣ – манбаи клетчатка;
- шибит – манбаи табиии витамини Е, сафеда ва витамини В2 (рибофлавин);
- брокколи – манбаи асосии клетчатка, инчунин бой аз калий ва витаминҳои С ва К;
- испаноҷ, кабудиҳо, барги карам – манбаи кислотаи фолий ва каротиноидҳо.
Ҳангоми муоинаи пизишкӣ шумо метавонед дар бораи дигар сабзавотҳои барои шумо ва тифли ояндаатон муфид низ пурсида, маълумот гиред.
Истеъмоли сабзавот ва кабудиҳо пас аз хуб шустани онҳо бехатар ҳисобида мешавад.
Ва зани ҳомила бояд ҳамеша ба ин диққат диҳад!
Сабзавотҳое, ки истеъмолашон дар давраи ҳомиладорӣ мумкин нест
Баъзе навъҳои сабзавот низ мавҷуданд, ки ҳангоми ҳомиладорӣ набояд истеъмол карда шаванд. Ҳамаи ин гуна сабзавот метавонанд хатари сирояти бактерияҳои барои кӯдаки шумо зарароварро афзоиш диҳанд:
- майсаҳои хом ё нимпухта (моши сабзонидашуда, майсаи юнучқа);
- ҳар гуна сабзавоти ношуста;
- майсаҳои хоми турб ва редиска;
- омехтаҳои тайёри салат.
Чӣ қадар сабзавот истеъмол кардан лозим аст?
Эҳсоси гуруснагии бештар аз ҳарвақта табиист, зеро эҳтиёҷи шумо ба ғизо нисбатан зиёд аст. Аксаран дар давраи ҳомиладорӣ камтар ва тез-тез хӯрок хӯрдан тавсия карда мешавад. Шояд шумо бо ҳозимаи ғизо мушкилӣ дошта бошед. Кам ва тез-тез хӯрок хӯрдан эҳтимолияти ин мушкилотро кам мекунад.
Ба зани ҳомиладор тавсия дода мешавад, ки дар як рӯз 300 грамм (чор порсия) ё бештар аз он сабзавоти хом ё пухта истеъмол кунад.
Чӣ тавр сабзавотро ба барномаи ғизо дохил кардан мумкин аст?
Барои омода кардани сабзавот усулҳои ҷолибе мавҷуданд, ки шумо метавонед онҳоро санҷида бинед. Таф додани сабзавот бо гиёҳу адвиёти табиӣ, аз қабили кашниҷ ва райҳон, онҳоро боз ҳам болаззаттар мекунад. Сабзавоти хуб шусташударо бурида, реза карда ва пухта истеъмол кунед.
Агар сабзавотеро чандон дӯст надоред ва мехоҳед онро ба барномаи хӯроки худ ворид кунед, метавонед онро ҳамроҳ бо дигар сабзавотҳо бипазед.
Ин мақола аз ҷониби дастаи «Lalu» дар асоси маълумоти allaboutwomenmd.com ва www.webmd.com омода шудааст.
