Пас аз таваллуд бадани шумо тағйироти зиёдеро аз сар мегузаронад ва барои барқарор шудани он вақт лозим аст. Дар давоми як ҳафтаи пас аз таваллуд эҳсос кардани баъзе нороҳатиҳо, аз қабили дард ва хастагии шадид маъмул аст. Аммо дар баъзе занон пас аз таваллуд аворизи мушкилоти ҷиддии саломатӣ пайдо мешаванд, ки барои ҳаёт хатарноканд. Агар аз вазъи саломатии худ хавотир бошед ё дард ва нороҳатиҳо дошта бошед, ба духтури худ муроҷиат кунед.
Ҳамаи занон ба нигоҳубини пас аз таваллуд ниёз доранд. Нигоҳубини пас аз таваллуд — ин ёрии тиббӣ ба заноне мебошад, ки нав таваллуд кардаанд. Ҳатто агар шумо худро хуб ҳис кунед ҳам, аз ҳамаи муоинаҳои пас аз таваллуд гузаред. Инҳо муоинаҳои тиббие мебошанд, ки барои боварӣ ҳосил кардан ба барқароршавии хуби шумо пас аз таваллуд кӯмак мерасонанд.
Нигоҳубини пас аз таваллуд хеле муҳим аст, зеро модарони нав дар рӯзҳо ва ҳафтаҳои пас аз таваллуд зери хатари ҷиддӣ ва баъзан барои ҳаёт хатарнок қарор мегиранд.
Аломатҳои огоҳкунандаи пас аз таваллуд
Умуман, ба аломатҳои мушкилоти ҷиддии саломатӣ дарди қафаси сина, душвории нафаскашӣ, хунравии шадид ва дарди шадид дохил мешаванд.
Агар шумо аломатҳои зеринро ҳис кунед, ба духтури худ занг занед.
Аломатҳои сироят:
- Таби баландтар аз 38,0°C, таб вақте ки бадани шумо кӯшиш мекунад вирус ё бактерияҳои боиси сироятро бикушад, пайдо мешавад;
- ихроҷ, дард, сурхшавӣ, ки дар атрофи буриши кесарӣ, эпизиотомия ё даридани миёнаҷой зиёд мешавад;
- Буриши кесарӣ — ҷарроҳиест, ки дар он духтури шумо кӯдакро тавассути буридани шикам ва бачадон ба дунё меорад.
- Эпизиотомия – буришест, ки дар даромадгоҳи маҳбал барои кумак дар баровардани тифл ҳангоми таваллуд анҷом дода мешавад;
- Даридани миёнаҷой — даридани байни маҳбал ва рӯдаи рост ҳангоми таваллуд ба ҳисоб меравад.
- Сӯзиш ё дард ҳангоми пешоб кардан, дарди паҳлӯи миён ё майли зуд-зуд пешоб кардан.
- Хатҳои сурх ё варамҳои нав дар сина. Шумо метавонед сирояти сина, ки мастит номида мешавад, дошта бошед.
- Дарди шадид дар қисми поёни шикам. Эҳтимол дорад, ки шумо эндометрит, яъне илтиҳоби луобпардаи бачадон дошта бошед.
- Ихроҷи бадбӯй. Шумо инчунин метавонед сирояти эндометрит ё вагинози бактериявӣ дошта бошед. Агар дар маҳбал миқдори зиёди бактерияҳои муайян мавҷуд бошад, вагинози бактериявӣ ба вуҷуд меояд.
Агар пас аз таваллуд дар шумо нишонаҳо ё аломатҳои зерин пайдо шаванд, ба рақами 103 занг занед ва ёрии таъҷилиро даъват кунед:
- эҳсоси сармо;
- арақкунии зиёд;
- нафаскашии тез;
- тапиши тези дил;
- парешонӣ;
- таб;
- дарди сахт ва нороҳатӣ.
Нишонаҳои мушкилоти дигари вобаста ба саломатӣ:
- Хунравии шадидтар аз ҳайзи муқаррарӣ ё хунравие, ки бо мурури замон шиддат мегирад. Эҳтимол, шумо ҳолати хунравии пас аз таваллуд (ки онро PPH низ меноманд) дошта бошед. Ин ҳолат хунравии шадиди пас аз таваллуди зан мебошад. Ин як ҳолати ҷиддӣ, вале нодир аст, ки метавонад то 12 ҳафтаи пас аз таваллуд рух диҳад.
- Агар дар пойҳо, махсусан дар соқҳо, дард, варам, сурхшавӣ, хунукхӯрӣ мушоҳида шавад. Эҳтимол, шумо тромбози шадиди рагҳо дошта бошед.
- Тағйирёбии биноӣ, сарчархзанӣ, дарди шадиди сар, дарди қисми болоии рости шикам ё китф, душвории нафаскашӣ, тез зиёдшавии вазн ё варами пой, даст ё рӯй. Эҳтимол, шумо ҳолати преэклампсия-и пас аз таваллуд дошта бошед. Ин ҳолати ҷиддӣ ба ҳисоб рафта, вақте ки зан фишори баланди хун дорад ва баъди таваллуд баъзе узвҳояш, аз қабили гурда ва ҷигар, ба таври муқаррарӣ кор намекунанд, рӯй медиҳад.
- Дарди қафаси сина, сулфа. Эҳтимол, шумо эмболияи шуш дошта бошед.
- Эҳсоси ноумедӣ ё ғамгинӣ зиёда аз 10 рӯз пас аз таваллуд. Эҳтимол, шумо ҳолати депрессияи пас аз таваллуд дошта бошед. Депрессия дар занҳо баъди таваллуди кӯдак пайдо мешавад.
- Дарди меъда ё қайкунӣ.
