Жүктілік кезінде ісіну – қалыпты жағдай, өйткені ағза дамып келе жатқан нәрестенің қажеттіліктерін өтеу үшін шамамен 50% көбірек қан мен сұйықтық өндіре бастайды. Ісіну әдетте қол, бет, аяқ және тобықта пайда болады.
Жүктілік кезіндегі ісінудің себептері
Ағзада сұйықтықтың жиналуы әйел денесін жұмсартуға көмектеседі, бұл өз кезегінде дамып келе жатқан нәрестенің оңайырақ өсуіне мүмкіндік береді. Сондай-ақ қосымша сұйықтықтың болуы босану кезінде жамбас буындары мен тіндерінің жеңіл ашылуына септігін тигізеді. Жүктілік кезінде жиналған сұйықтық әйел салмағының шамамен 25%-ын құрайды.
Пайдалы: Жүктілік күнтізбесі мен есептеу калькуляторы
Жүктілік кезінде ісіну қашан пайда болады?
Жүктілік кезінде ісіну кез келген уақытта пайда болуы мүмкін, ол негізінен жүктіліктің бесінші айында айқын білінеді.
Ісінудің пайда болуына келесі факторлар себеп болуы мүмкін:
- Жаз мезгіліндегі ыстық ауа райы;
- Ұзақ уақыт бойы тік тұру;
- Күн бойғы тынымсыз қозғалыс;
- Құрамындағы калий мөлшері аз тағамдарды тұтыну;
- Құрамында кофеин мөлшері жоғары өнімдерді тұтыну;
- Құрамында натрий көп өнімдерді тұтыну.
Жүктілік кезінде ісінуді емдеу әдістері
Ісінуді калийге бай өнімдерді тұтыну арқылы азайтуға болады. Мысалы, банан калийге бай жеміс болып саналады, сондай-ақ құрамында кофеин бар өнімдерді тұтынбау ұсынылады.
Пайдалы мақала: Жүктілік кезінде не істеуге болмайды? Ең зиянды 11 өнім
Ісінудің алдын алу бойынша кеңестер:
- Аяқта ұзақ уақыт тік тұрудан сақтану. Аяқты жоғары көтеріп жату, тобықты бірінің үстіне бірін қойып жиі ауыстырып тұру, балтыр бұлшықеттері демалуы үшін аяқты ақырын бүгіп жату ұсынылады.
- Сол қырымен жату. Бұл қалып үлкен веналар арқылы дененің төменгі бөлігінен жүрекке қайта баратын қан тамырларына түсетін қысымды азайтады. Нәтижесінде жүрекке қан жақсырақ барады. Сондай-ақ жатқан кезде аяқтың астына жастық қойып көтеру де жақсы нәтиже береді.
- Компрессиялық шұлық кию. Күн бойы жүрген кезде аяқтағы қысымды бірқалыпты ұстап тұру үшін мұндай шұлықтар да көмектесуі мүмкін.
- Күн сайын физикалық белсенді болу. Жаяу жүру, жаттығу велосипедін тебу және жеңіл жүзу де жақсы нәтиже береді.
- Бассейнде жүру немесе жай ғана суда тік тұру да аяқ бұлшықеттеріндегі қысымды азайтып, пайда болған ауырсынудан арылтуы мүмкін.
- Кең киім кию. Мүмкіндігінше тар киім кимеген жөн, өйткені олар денеге жабысқан сайын ағзадағы қан айналымына кедергі келтіреді, сондай-ақ тобық пен балтырды қысып тұратын шұлықтарды кию де мүлдем ұсынылмайды.
Кейбір зерттеулерге сәйкес, аяқ, қол және құлақтың кейбір жерлерін уқалау арқылы да осы кезеңдегі ісінуді азайтуға болады.
Ісінуге байланысты сұйықтықты аз ішуге тырысу дұрыс емес, керісінше, бұл кезеңде күніне шамамен 10 стақан (2,4 литр) сұйықтық ішу ұсынылады.
Жүктілік кезінде аяқ пен тобықтың ісінуі қалыпты жағдай болғанымен, бір аяқтың кенеттен ісінуі және ауырсыну пайда болуы терең веналар тромбозының белгісі болуы мүмкін. Бұл аяқ венасында қан ұйындысы (тромб) пайда болғанын білдіреді; егер ентігу немесе кеудедегі ауырсыну қосылса, дереу жедел жәрдем шақырыңыз. Сондай-ақ беттің, қолдың немесе аяқтың кенеттен қатты ісінуі, әсіресе қатты бас ауруымен, көз алдының бұлдырауымен немесе қабырға астындағы ауырсынумен қатар жүрсе, преэклампсияның (қан қысымының қауіпті көтерілуі) белгісі болуы мүмкін. Мұндай жағдайларда дереу дәрігер қарауынан өтіп, диагноз қойылғаннан кейін емделу қажет.
