Көпчүлүк адамдарда пневмония жөнөкөй суук тийүү же сасык тумоо менен башталып, андан кийин өпкөгө өтөт. Кош бойлуу кезде пневмония дарыланбаса, өмүргө кооптуу болушу мүмкүн, анын үстүнө кош бойлуу аялдардын бул оору менен күрөшүүсү бир аз кыйыныраак өтөт.
Кош бойлуулуктагы пневмониянын белгилери
Кош бойлуулук учурунда пневмониянын белгилерин билүү жана аны дарылоо үчүн дароо дарыгерге кайрылуу зарыл.
Жалпы белгилери төмөнкүдөй:
- Суук тийүү жана сасык тумоого окшош белгилер, мисалы, тамактын, баштын жана муундардын оорушу;
- Дем алуунун кыйындашы же бат-бат дем алуу;
- Катуу алсыроо, чарчоо;
- Дене табынын көтөрүлүшү же чыйрыгуу;
- Көкүрөк тушундагы оору;
- Катуу жөтөл.
Пневмониянын энеге жана балага тийгизген таасири
Пневмония оор оору болуп саналат жана дарыланбаса, эне менен болочок бала үчүн кооптуу кесепеттерди алып келиши мүмкүн.
Кош бойлуу кездеги пневмония организмдеги кычкылтектин азайышына алып келет, анткени мындай абалда өпкө денеге жетиштүү өлчөмдөгү кычкылтекти жеткире албайт. Натыйжада жатынга да кычкылтек аз өлчөмдө жетет.
Бул оорунун өпкөдөн дененин башка бөлүктөрүнө, мисалы, кан тамырларга да таралуу ыктымалдыгы бар.
Кош бойлуу кездеги пневмония төмөнкүдөй кесепеттерге алып келиши мүмкүн:
- Эрте төрөт;
- Түйүлдүктүн салмагынын аз болушу.
Көпчүлүк аялдар катуу жөтөл түйүлдүк үчүн кооптуу деп тынчсызданышат. Бирок ымыркай амортизатордун милдетин аткарган амниотикалык суюктук менен курчалган, бул суюктук түйүлдүктү жөтөлдөн, ар кандай термелүүлөрдөн, үндөрдөн, басымдан жана жеңил соккулардан коргойт.
Маанилүү: Кош бойлуулукта заарада белоктун болушу кооптуубу?
Коркунуч факторлору
Кош бойлуу болуу аялдын пневмония менен ооруп калуу коркунучун арттырат, анткени организм жатындагы баланын өрчүшү үчүн көп энергия сарптайт. Мындан тышкары, өсүп жаткан ымыркай жана чоңоюп жаткан жатын да аялдын өпкөсүнүн көлөмүн азайтат, бул болсо өпкө функциясына кошумча жүктөм жаратат.
Пневмония көбүнчө өпкөгө тараган бактериялык инфекциянын натыйжасында пайда болот. Көбүнчө пневмонияга себеп болуучу бактерияларга төмөнкүлөр кирет:
- Haemophilus influenzae
- Mycoplasma pneumoniae
- Streptococcus pneumoniae
Пневмонияга алып келүүчү вирустук инфекцияларга төмөнкүлөр кирет:
- Грипп вирусу
- Суу чечек же курчоочу герпес (жугуштуу бөртмө)
- Респиратордук-синцитиалдык вирус (РСВ) жана коронавирус (COVID-19).
Төмөнкү учурларда аялдардын кош бойлуу кезинде пневмония менен ооруп калуу коркунучу жогору:
- Тамеки чексе;
- Анемия (аз кандуулук) бар болсо;
- Астмасы болсо;
- Өнөкөт ооруга чалдыккан болсо;
- Жаш балдар менен иштөөнү талап кылган кесип менен алектенсе;
- Ооруканаларда же карылар үйлөрүндө иштесе;
- Иммунитети төмөн болсо.
Кош бойлуулукта пневмонияны дарылоо
Кош бойлуу кездеги пневмонияны дарылоо инфекциянын козгогучу вирус же бактерия экендигине байланыштуу.
Кош бойлуулук мезгилинде вирустук пневмонияны дарылоонун көп ыкмалары коопсуз болуп саналат жана пневмония оорусу алгачкы баскычында аныкталса, вируска каршы дары-дармектер аркылуу айыктырууга болот. Айрым учурларда дарыгер тарабынан кошумча кычкылтек терапиясы дайындалат.
Бактериалдык пневмония болсо дарыгердин сунушу боюнча берилген антибиотиктер менен дарыланат.
Кызыктуу: Кош бойлуулукта курсакта боло турган өзгөрүүлөр
Дарыгерге качан кайрылуу керек?
Кош бойлуу аялда пневмониянын белгилери пайда болор замат дарыгерге кайрылуу зарыл. Ошондо оорудан улам келип чыгышы мүмкүн болгон ар кандай кабылдоолордун алдын алууга болот.
Дарыгер сизден оорунун белгилери жөнүндө сурагандан тышкары:
- Фонендоскоп менен өпкөнү текшерет;
- Өпкөнү рентгенге тартат;
- Какырыктан үлгү алат.
Пневмониянын оор даражасы аныкталса, ооруканага жатып дарылануу сунушталат. Эгер кош бойлуу аял төмөнкү белгилерге туш болсо, ал дароо 103 же жергиликтүү тез жардам номерине чалышы керек:
- Көкүрөктүн оорушу;
- Дем алуунун кыйындашы;
- Парацетамол ичкенден кийин деле түшпөгөн жогорку температура (38 °C же андан жогору) же тынымсыз кусуу; аң-сезимдин чаташуусу же түйүлдүктүн кыймылынын азайышы.
