Ҳангоми ба дандонпизишк муроҷиат кардани занони ҳомиладор бинобар хунравии милки дандон, ба онҳо ташхиси бемории гингивити ҳомиладорӣ (илтиҳоби милки дандон) гузошта шуданаш мумкин аст.
Тақрибан дар 60-75 фоизи занони ҳомила милки дандонҳои онҳо варам карда, сурх мешаванд. Аз сабаби нозук ва ҳассос будани милки дандон, ҳангоми бо чӯткаи оддии дандоншӯӣ шустани дандонҳо хун меравад. Ин беморӣ гингивити ҳомиладорӣ ба ҳисоб меравад, ки яке аз навъҳои сабуки илтиҳоби милки дандон мебошад.
Гингивити ҳомиладорӣ бар асари тағйироти гормоналӣ ва баланд шудани ҳассосияти милки дандон ба бактерияҳои лавҳаи дандон ба вуҷуд меояд. Умуман, дар давраи ҳомиладорӣ дар занҳо миқдори прогестерон ва эстроген бениҳоят баланд мешавад ва дар натиҷа ҷараёни хун дар пардаҳои луобӣ меафзояд, ки ин ҳассосияти милки дандонро зиёд мекунад.
Сабабҳои гингивити ҳомиладорӣ
- Тағйирёбии гормонҳо;
- Тағйирот дар ратсион;
- Камшавии истеҳсоли оби даҳон;
- Тағйирот дар оби даҳон;
- Таъсири хамираи дандон;
- Қайкунӣ ва беҳолӣ.
Гингивити ҳомиладорӣ ба ҳомила чӣ гуна таъсир мерасонад?
Агар шумо гигиенаи тоза нигоҳ доштани дандонҳоро риоя кунед, гингивити ҳомиладорӣ ба шумо ё кӯдаки шумо зарар намерасонад. Ақидае мавҷуд аст, ки бемории милки дандон метавонад боиси таваллуди бармаҳал гардад, аммо он метавонад танҳо барои занони гирифтори шакли вазнини ин беморӣ хатарнок бошад.
Тадқиқотҳо нишон медиҳанд, ки шакли вазнини бемории милки дандон метавонад ба таваллуди бармаҳал, бо вазни кам таваллуд шудани кӯдак ва ҳатто преэклампсия (баландшавии фишори хун) оварда расонад. Тадқиқотҳои дигар бошанд, алоқамандии байни бемории милки дандон ва чунин оризаҳои ҷиддиро рад мекунанд.
Хунравии милки дандон ҳангоми ҳомиладорӣ кай оғоз мешавад?
Гарчанде ки дар семоҳаи дуюми ҳомиладорӣ бо сабаби тағйироти гуногуни гормоналӣ милкҳо хеле мулоимтар ва ҳассос мешаванд, одатан дар семоҳаи сеюм, вақте ки сатҳи эстроген ва прогестерон ба авҷи худ мерасад, хунравии милк мушоҳида мешавад. Милкҳои ҳассос дар семоҳаи аввал метавонанд нишонаи аввалини ҳомиладорӣ бошанд.
Нигоҳубини дандонҳо ҳангоми ҳомиладорӣ
Нигоҳубини дандонҳоро аз тоза нигоҳ доштани холигии даҳон оғоз кунед:
- Дар як рӯз ҳадди ақал ду маротиба (агар имкон бошад, пас аз ҳар хӯрок) бо ёрии чӯткаи мулоим ва хамираи дандони фтордор боэҳтиёт тоза кунед. Инчунин, аз хамираҳои махсуси дандони зидди гингивит, ки пеши роҳи аломатҳои гуногунро мегиранд, истифода баред;
- Ҳар рӯз дандонҳоро бо риштаи дандон тоза кунед;
- Аз воситаи даҳончайқонии фтордор ва беалкогол истифода баред;
- Агар имкон бошад, истеъмоли шакарро маҳдуд кунед, зеро он метавонад эҳтимоли пайдоиши кирови дандон ва миқдори бактерияҳоро дар даҳон зиёд кунад.
Барои пешгирии ҳар гуна беморӣ мунтазам ба духтури дандон муроҷиат кунед. Илова ба муоинаҳои мунтазам, дар ҳолатҳои зерин фавран ба духтури дандон занг занед:
- Дарди дандон;
- Хунравии тез-тези милки дандон;
- Аломатҳои дигари бемории милки дандон, масалан, варам ё ҳассосияти милки дандон, ҷудо шудани милк аз дандон, бӯи нохуши доимӣ ё лақ шудани дандонҳо;
- Дар ковокии даҳон пайдо шудани захмҳои гуногун;
- Карахт шудани ковокии даҳон.
Гингивити ҳомиладориро чӣ гуна метавон табобат кард?
Дандонпизишкон барои табобати гингивити ҳомиладорӣ як қатор муолиҷаҳоро, аз ҷумла антибиотикҳо ва воситаҳои шустушӯи даҳонро бар зидди бемориҳои милк тавсия медиҳанд. Дар ҳолатҳои вазнин мумкин аст ҷарроҳӣ низ гузаронида шавад.
Ин антибиотикҳо ва воситаҳои шустушӯи даҳон одатан барои занони ҳомиладор бехатар мебошанд, аммо ягон тадқиқот оид ба таъсири онҳо ба саломатии кӯдаки рушдёбанда гузаронида нашудааст. Ҳангоми таъин кардани ин гуна воситаҳо, дандонпизишкон бояд ҳомиладории шумо, вақти боқимонда то таваллуд ва ҳолати аллергии мавҷудаи шуморо ба назар гиранд ва боварӣ ҳосил кунанд, ки муолиҷа комилан бехатар аст.
