Экзема (инчунин дерматити атопикӣ низ номида мешавад) доғи хушк ва хоришдори пӯст аст, ки метавонад дар ҳама ҷойи бадан пайдо шавад, вале он одатан дар пӯсти рӯй ва дасту пой ба вуҷуд меояд. Экзема метавонад дар ҳар як инсон, аз ҷумла дар навзодон низ пайдо шавад.
Сабабҳои экзема дар кӯдакон
Баъзе омилҳо боиси моил шудани одамон ба доғи экзема мегарданд, аз ҷумла:
- Агар дар таърихи оилавӣ экзема бошад;
- Агар дар таърихи оилавӣ доғҳои гармӣ, аллергия ё астма бошад;
- Мунтазам дар иқлими хунук ва нам зиндагӣ кардан;
- Дар муҳити атроф мавҷуд будани моддаҳои барангезанда (масалан, дуд, хокаҳои ҷомашӯӣ, моддаҳои хушбӯй ва моддаҳои заҳрнок).
Фоиданок: Чӣ тавр метавон кӯдаки гирёнро ҳангоми хоб ором кард?
Экземаи кӯдакон чӣ гуна менамояд?
Экзема бештар дар тифлони то 6-моҳа дар пӯсти сар ва рӯй пайдо мешавад. Доғҳо одатан сурх буда, дар шакли ҳубобча пайдо мешаванд, сипас аз ин ҳубобчаҳо моеъ ҷорӣ шуда, аз боло бо қасмоқ пӯшида мешаванд.
Дар кӯдакони рӯ ба афзоиш, экзема метавонад дар зону ва оринҷ пайдо шавад. Хориши экзема дар тифл нороҳатӣ ба вуҷуд меорад. Кӯдак гуфта наметавонад, ки чӣ ҳодиса рӯй дода истодааст, аммо аз рафтори ӯ дидан мумкин аст, ки экзема боиси нороҳатӣ мегардад.
Аломатҳои доғҳои экзема инҳоро дар бар мегиранд:
- Мушкилоти хоб;
- Сироятҳои пӯст (сироят дар натиҷаи харошидан ё молидани доғҳо);
- Нооромӣ.
Ҷолиб: Ҷиҳатҳои фоидаовар ва зараровари муддати дароз бо шири модар ғизо додани кӯдакон
Усулҳои табобати экзема
Экземаро бевосита табобат кардан ғайриимкон аст, аммо тавассути мубориза бо хориш, хушкии пӯст, харошидашавӣ ва пешгирии воридшавии сироят якчанд усулҳои табобат мавҷуданд.
Чунин усулҳои табобат инҳоро дар бар мегиранд:
- Пӯсти кӯдакро дар ҳолати хуб намнок нигоҳ доред: кӯдаки худро бо оби ширгарм оббозӣ кунед ва пӯсташро хушк карда пок кунед, сипас фавран кремҳои намноккунандаро истифода баред;
- Аз моддаҳое, ки хориши умумиро ба вуҷуд меоранд, худдорӣ намоед: ҳангоми шустани либосҳои кӯдакатон аз собун ва маводи шустушӯии бебӯй истифода баред. Либосҳои фарзандатон бояд аз матоъҳои пахтагии мулоим бошанд;
- Аз аллергенҳои умумӣ худдорӣ намоед: хонаатон, махсусан ҳуҷраи фарзандатонро зуд-зуд аз чанг ва пашми ҳайвоноти хонагӣ тоза кунед;
- Пешгирии харошидан: агар кӯдак пӯсташро харошиданӣ шавад, нохунҳои ӯро кӯтоҳ кунед ва дастонашро бо ҷӯроб ё дастпӯшак пӯшонед. Илова бар ин, шумо метавонед ба пӯст компрессҳои матои намнокро истифода баред. Агар хориш шадид бошад, педиатри шумо метавонад доруҳои антигистаминиро тавсия диҳад;
- Усулҳои табобати пӯст: педиатри шумо метавонад барои пӯсти кӯдакатон истифодаи маводҳои стероидӣ ва ғайристероидиро тавсия диҳад;
- Пешгирии сироят: роҳи самараноктарини табобати экзема дар шароити хона — ин ванна бо маҳлули сафедкунанда мебошад. Гарчанде ки онҳо усули табобате нестанд, ки ҳангоми авҷи ногаҳонии беморӣ барои сабук кардани ҷараёни он ё пешгирии он истифода мешаванд, метавонанд як қисми реҷаи табобати экзема бошанд.
Муҳим: Марҳилаҳои инкишофи кӯдак: Шунавоӣ ва овозбарорӣ
Кай бояд ба духтур муроҷиат кард?
Доначаҳои экзема, махсусан агар онҳо харошида шаванд, метавонанд сироят ёбанд. Барои бартараф кардани сироятҳо истифодаи антибиотикҳо ва дигар доруҳо аз ҷониби духтур тавсия дода мешавад. Агар шумо дар пӯсти кӯдакатон пайдоиши сироятро мушоҳида кунед, ба педиатри худ муроҷиат кунед.
Пешгирии экзема дар навзодон
Пешгирии худи пайдоиши экзема имконнопазир аст, аммо муайян кардани ангезандаҳои он ва пешгирии хурӯҷи беморӣ имконпазир аст. Баъзе усулҳои коҳиш додани омилҳои ангезанда инҳоянд:
- Кӯдаки худро аз шароити ҳавои хушк ва хунук дур нигоҳ доред;
- Агар кӯдаки шумо 6 моҳа ё калонтар бошад, дар як сол як маротиба ваксинаи зидди зукомро бо машварати духтури сироятшинос гузаронед;
- Аз омилҳои ангезандаи умумӣ дар хонаатон, ки ҳолати хоришро ба вуҷуд меоранд, канорагирӣ кунед ва бо тамғакоғазҳои ҳар як маҳсулот шинос шавед;
- Барои он ки боқимондаҳои воситаҳои шустушӯй дар либосҳо намонанд, либосҳоро ду маротиба шӯед;
- Барои донистани он ки фарзанди шумо ба кадом моддаҳо аллергия дорад, бо машварати аллерголог дар ӯ санҷишҳо гузаронед;
- Барои муайян кардани омилҳое, ки экземаи кӯдакро шиддат мебахшанд, фарзанди худро мунтазам назорат кунед;
- Пӯсти кӯдаки худро намнок нигоҳ доред.
