Кош бойлуулукта шишиктер кадимки көрүнүш, анткени өсүп жаткан баланын муктаждыктарын канааттандыруу үчүн организм болжол менен 50% көбүрөөк кан жана суюктук иштеп чыгара баштайт. Шишиктер адатта кол, бет, бут жана кызыл ашыктарда пайда болот.
Кош бойлуулук учурундагы шишиктердин себептери
Организмде суюктуктун топтолушу аялдын денесин жумшартууга кызмат кылат, бул болсо өз кезегинде өсүп келе жаткан баланын жеңилирээк чоңоюшуна шарт түзөт. Ошондой эле кошумча суюктуктун болушу төрөт учурунда жамбаш муундары менен кыртыштарынын жеңил ачылышына жардам берет. Кош бойлуулук мезгилинде топтолгон суюктук аялдын салмагынын болжол менен 25%ин түзөт.
Пайдалуу: Кош бойлуулук календары жана эсептөө калькулятору
Кош бойлуулукта шишиктер качан пайда болот?
Кош бойлуулук мезгилинде каалаган убакта шишиктер пайда болушу мүмкүн, алар негизинен кош бойлуулуктун бешинчи айында даана байкалат.
Шишиктин пайда болушуна төмөнкү факторлор себеп болушу мүмкүн:
- Жай мезгилиндеги ысык аба ырайы;
- Узак убакыт бою тик туруу;
- Күн бою тынымсыз кыймылдоо;
- Курамында калийдин өлчөмү төмөн болгон тамак-аштарды жеш;
- Кофеиндин өлчөмү жогору болгон азыктарды колдонуу;
- Натрий көп болгон азыктарды колдонуу.
Кош бойлуулук учурунда шишиктерди дарылоо ыкмалары
Шишикти калийге бай азыктарды колдонуу аркылуу азайтууга болот. Мисалы, банан калийге бай жемиш болуп саналат, ошондой эле курамында кофеин бар азыктарды колдонбоо сунушталат.
Пайдалуу макала: Кош бойлуу кезде эмнелер болбойт? Эң зыяндуу 11 азык
Шишиктин алдын алуу боюнча кеңештер:
- Бутта узак убакыт тик туруудан сактануу. Буттарды жогору көтөрүп жатуу, кызыл ашыктарды бири-биринин үстүнө коюп, тез-тез алмаштырып туруу, балтыр булчуңдары эс алышы үчүн бутту акырын бүгүп жатуу сунушталат.
- Сол капталга жамбаштап жатуу. Бул абал чоң веналар аркылуу дененин төмөнкү бөлүгүнөн жүрөккө кайтып баруучу кан тамырларга түшкөн басымды азайтат. Натыйжада жүрөккө кан жакшыраак барат. Ошондой эле жаткан учурда буттун астына жаздык коюп көтөрүү да жакшы натыйжа берет.
- Компрессиялык байпактарды кийүү. Күн бою басып жүргөндө буттардагы басымды бир калыпта кармап туруу үчүн мындай байпактар да жардам бериши мүмкүн.
- Күн сайын физикалык активдүү болуу. Жөө басуу, стационардык велосипед тебүү жана жеңил сүзүү да жакшы натыйжа берет.
- Бассейндин ичинде басуу же жөн эле сууда тик туруу да бут булчуңдарындагы басымды азайтып, пайда болгон оорудан арылтышы мүмкүн.
- Кең кийимдерди кийүү. Мүмкүн болушунча тар кийимдерди кийбөө керек, алар денеге канчалык жабышып турса, организмдеги кан айланууга ошончолук тоскоолдук кылат, ошондой эле кызыл ашык менен балтырларды кысып турган байпактарды кийүү да таптакыр сунушталбайт.
Кээ бир изилдөөлөргө ылайык, бут, кол жана кулактардын айрым жерлерин укалоо аркылуу да бул мезгилдеги шишиктерди азайтууга болот.
Шишиктен улам суюктукту азыраак ичүүгө аракет кылуу туура эмес, тескерисинче, бул мезгилде күнүнө болжол менен 10 стакан (2,4 литр) суюктук ичүү сунушталат.
Кош бойлуулук мезгилинде буттун жана кызыл ашыктын шишиши нормалдуу көрүнүш болсо да, бир буттун капысынан шишип кетиши жана оору пайда болушу терең веналардын тромбозунун белгиси болушу мүмкүн. Бул буттун венасында кан уюгу (тромб) пайда болгонун билдирет; эгер дем кысылуу же көкүрөктөгү оору кошулса, дароо тез жардам чакырыңыз. Ошондой эле беттин, колдун же буттун капысынан катуу шишиши, өзгөчө катуу баш оору, көрүүнүн бүдөмүктөшү же кабыргалардын астындагы оору менен коштолсо, преэклампсиянын (кан басымынын коркунучтуу жогорулашы) белгиси болушу мүмкүн. Мындай учурларда тезинен дарыгердин кароосунан өтүп, диагноз коюлгандан кийин дарылануу зарыл.
