Кош бойлуулук учурунда төрөлө турган балаңыздын жүрөк согушу нормада экенин кантип билсе болот? Бул суроо аялдарда көбүнчө түйүлдүктүн жүрөк согушун биринчи жолу укканда пайда болот. Бул добуш сизди таң калтырышы да табигый көрүнүш. Анткени адатта аялдар кош бойлуулук мезгили ичинде ымыркайдын жүрөгү канчалык тез согорунан кабарсыз болушат.
Балаңыздын жүрөк согушу кандай өзгөрөт
Көпчүлүк аялдар түйүлдүктүн жүрөк согушун биринчи жолу укканда бул абалды сүрөттөө үчүн "дүк-дүк" сыяктуу тууранды сөздөрдү колдонушат. Кош бойлуулук учурунда жүрөктүн согуу ылдамдыгы чоң адамдардын жүрөгүнүн согуу ылдамдыгынан жогору болот, бирок түйүлдүктүн нормалдуу жүрөк согушу кош бойлуулук мезгилине жана күндүн бөлүктөрүнө жараша өзгөрөт.
Кош бойлуулуктун ар кандай мезгилдериндеги түйүлдүктүн жүрөк согушу
Түйүлдүк болжол менен беш жумалык болгондо, ымыркайдын жүрөгү сого баштайт. Бул убакытта түйүлдүктүн нормалдуу жүрөктүн согуу ылдамдыгы эненин жүрөгүнүн согушу менен бирдей болот: мүнөтүнө 80ден 85ке чейин согот. Ошол убакыттан баштап, биринчи айда жүрөктүн согушу күнүнө болжол менен үч жолу тездейт. Дарыгериңиз ультраүн (УЗИ) жардамы менен түйүлдүктүн канча айлык болгонун аныктоодо жүрөк согуу ылдамдыгын колдонушу мүмкүн.
Түйүлдүктүн жүрөгүнүн согушу уланып турса, анын түшүп калуу коркунучу азаят. Бирок жүрөктүн согушу бир жума же андан көп убакытка токтоп калса, акыры боюнан түшүүгө (абортко) алып келиши мүмкүн.
Тогузунчу жумага келип, ымыркайдын жүрөгү мүнөтүнө орточо 175 жолу согот. Ошол убакыттан баштап бул ылдамдык басаңдай баштайт жана мүнөтүнө болжол менен 120-180 соккуну түзөт. Кош бойлуулуктун акыркы 10 жумасында түйүлдүктүн нормалдуу жүрөк согушунун ылдамдыгы кайрадан басаңдайт, бирок ошондо да чоң адамдардын жүрөгүнүн согушунан болжол менен эки эсе тез болот. Түйүлдүгүңүздүн жүрөгүнүн согушунун нормалдуу көрсөткүчүн «Lalu» колдонмосу аркылуу билип алсаңыз болот.
Түйүлдүктүн жүрөк согушунун күн ичинде өзгөрүшү
Наристеңиздин жүрөгүнүн согушу, кудум эле сиздин жүрөгүңүздүн согушу сыяктуу, күнү-түнү табигый түрдө өзгөрүп турат. Физикалык кыймыл-аракеттер же уйку учурунда жүрөк кадимкиден ылдамыраак же жайыраак согот. Балаңыздын жүрөк кагышына байланыштуу ар кандай олуттуу өзгөрүүлөр тууралуу дарыгерге кабарлап туруу сунушталат.
Ымыркайдын жүрөгүнүн согушун текшерип туруу
Кээ бир ата-энелер үй шартында да баласынын жүрөгүнүн согушун күн сайын байкап туруу жөнүндө ойлонушат. Бул процесстин оң жана терс жактары бар.
Маанилүү: Тератоген деген эмне?
Үйдө ымыркайдын жүрөгүнүн согушуна байкоо жүргүзүү
Кээ бир ата-энелер үйдөн туруп наристесинин жүрөгүнүн согушун байкап турганда өздөрүн тынч сезишет. Бирок мындай учурларда үй шартында допплер сыяктуу түрдүү аспаптарды колдонбогон оң. Анткени допплер угуу аппаратын узак убакыт же туура эмес колдонуу, же болбосо туура эмес чечмелөө ар кандай терс кесепеттерге алып келиши мүмкүн.
Төрөт учурунда ымыркайдын жүрөгүнүн согушун көзөмөлдөө
Төрөт учурунда түйүлдүктүн жүрөгүнүн согушун текшерүү аускультация аркылуу ишке ашырылышы мүмкүн, б.а. төрөттүн ар кандай баскычтарында стетоскоптун, фетоскоптун же допплердин жардамы менен, кээде болсо тышкы байкоо каражаттары аркылуу аныктоо мүмкүнчүлүгү бар. Айрым учурларда дарыгерлер үзгүлтүксүз тышкы же ички мониторинг текшерүүсүн сунушташы да мүмкүн.
