Кош бойлуу аялдарга жегенге сунушталбаган азык-түлүктөрдүн тизмеси бир караганда чексиздей сезилет. Анын ичинде ышталган эт, айрым деңиз азыктары, жадагалса курамында кофеин бар азыктар менен бир аз убакытка коштошууга туура келет. Сиз жеген нерселер балаңыздын өсүп-өнүгүшүнө таасир этет, андыктан этияттык жана тандап тамактануу эч качан ашыктык кылбайт.
Кош бойлуулук учурунда жашылчаларды туура колдонуу ымыркайды эне курсагында жүргөндө да, төрөлгөндөн кийин да өсүп-өнүгүшүнө көмөктөшүүчү маанилүү витаминдер жана минералдар менен камсыздашы мүмкүн. Бирок кээ бир жашылчалар кош бойлуу кезде кооптуу да болушу мүмкүн.
Кош бойлуулуктагы эң пайдалуу жашылчалар, ошондой эле кайсы жашылчаларды жебеш керектиги тууралуу бул макаладан кеңири маалымат ала аласыз.
Пайдалуу макала: Кош бойлуу кезде эмнелерге болбойт?
Кош бойлуу кездеги жашылчалардын пайдасы
Кош бойлуу кездеги эң мыкты жашылчалар көп өлчөмдө азык заттарды бере алат. Өз убагында, жетиштүү өлчөмдө тамактануу туура тамактануунун негизин түзөт. Сергек тамактануу азык заттардын жетишсиздигинин жана кош бойлуулуктагы кант диабетинин алдын алууга жардам берет.
Туура тамактануунун пайдалары:
- нормалдуу салмакты сактоо;
- нормалдуу кан басымы;
- анемиянын пайда болуу коркунучун азайтуу;
- ич өтүү жана ич катуу сыяктуу ашказан-ичеги ооруларынын алдын алуу;
- ымыркайдын жетиштүү салмакта төрөлүшү.
Айрым маанилүү азык заттарга төмөнкүлөр кирет:
- бета-каротин – ымыркайдын иммундук системасы, көрүү жөндөмү жана клеткаларынын өөрчүшү үчүн пайдалуу;
- С витамини – дени сак ткандардын өөрчүшү, тиштер жана сөөктөр үчүн пайдалуу;
- фолий кислотасы – ымыркайдын салмагынын нормалдуу болушу жана нерв түтүгүнүн кемтиктеринин алдын алуу үчүн маанилүү (жашылчалардан тышкары, күн сайын 400 мкг фолий кислотасын таблетка түрүндө ичүү да сунушталат);
- калий – кан басымын жөнгө салуу үчүн маанилүү.
Жашылчаларды жеш кош бойлуулук учурунда жана андан кийин балаңыздын ден соолугу үчүн өтө чоң мааниге ээ.
Кош бойлуулар үчүн пайдалуу жашылчалар
Кош бойлуулук учурунда жеш үчүн эң жакшы жашылчалар төмөнкүлөр:
- жайкы жана кышкы ашкабак – белок, фолий кислотасы жана А, С, К витаминдеринин булагы;
- спаржа – А, С, Е жана К витаминдери, ошондой эле клетчатка жана фолий кислотасына бай;
- помидор – С жана К витаминдеринин жана биотин затынын булагы;
- кызылча – иммундук системаны чыңдоодо пайдалуу болгон клетчатканын табигый булагы;
- картошка – А, В жана С витаминдерине бай;
- болгар калемпири – клетчатканын булагы;
- шибит – Е витамини, белок жана В2 витамининин (рибофлавиндин) табигый булагы;
- брокколи – клетчатканын негизги булагы, ошондой эле калий жана С, К витаминдерине бай;
- шпинат, көк чөптөр, капуста жалбырагы – фолий кислотасы жана каротиноиддердин булагы.
Дарыгердин кароосуна барганыңызда сиз жана төрөлө турган балаңыз үчүн пайдалуу болгон башка жашылчаларды да сурап билип алсаңыз болот.
Жашылчалар жана көк чөптөр жакшылап жуулгандан кийин аларды жеш коопсуз деп эсептелет.
Ал эми кош бойлуу аял буга дайыма маани бериши зарыл!
Кош бойлуулукта жегенге болбой турган жашылчалар
Кош бойлуулукта жегенге болбогон айрым жашылча түрлөрү да бар. Мунун баары балаңызга зыяндуу бактерияларды жуктуруп алуу коркунучун жогорулатышы мүмкүн:
- чийки же чала бышырылган өскүндөр (өнүп чыккан маш, беде өскүндөрү);
- жуулбаган ар кандай жашылча;
- турп жана редисканын чийки өскүндөрү;
- даяр салат аралашмалары.
Канча жашылча жеш керек?
Кадимкиден көбүрөөк ачка болуу сезими табигый көрүнүш, анткени сизде тамактанууга болгон муктаждык салыштырмалуу жогору. Көбүнчө кош бойлуу кезде азыраак жана бат-баттан тамактануу сунушталат. Сизде тамак сиңирүү менен байланышкан көйгөйлөр болушу мүмкүн. Аз-аздан жана бат-баттан тамактануу бул көйгөйлөрдүн ыктымалдыгын азайтат.
Кош бойлуу аял күнүнө 300 грамм (төрт порция) же андан көп чийки же бышырылган жашылча жеши сунушталат.
Менюга жашылчаларды кантип киргизүү керек?
Жашылчаларды даярдоонун сиз карап көрсөңүз боло турган кызыктуу ыкмалары бар. Жашылчаларды кинза, райкан сыяктуу табигый татымалдар менен кууруу аларды ого бетер даамдуу кылат. Жакшылап тазаланган жашылчаларды кесип, майдалап жана бышырып жеңиз.
Эгер анча жактырбаган жашылчаны жегенге аракет кылып жатсаңыз, аны башка жашылчаларга кошуп бышырсаңыз болот.
Бул макала allaboutwomenmd.com жана www.webmd.com маалыматтарынын негизинде «Lalu» жамааты тарабынан даярдалды.
