Ayırım hayallarda hámiledarlıqtıń dáslepki basqıshlarında ish qatıw baqlanadı, basqa hayallarda bolsa, ulıwma baqlanbawı da múmkin.
Bul maqalada biz ne ushın hámiledarlıqta ish qatıwı, yaǵnıy qabızlıq sebepleri hám hayallardaǵı bunday qolaysızlıqlardı jeńillestiriw ushın úy sharayatında qollawǵa bolatuǵın qáwipsiz emlew ilajların dodalaymız.
Sebepleri
Qabızlıqtıń sebebi hámiledarlıqtıń qaysı basqıshında júz berip atırǵanına baylanıslı. Buǵan tómendegi múmkin bolǵan sebepler kiredi:
Gormonlar: gormonlar muǵdarınıń ózgeriwi, erte hámiledarlıqta isheklerdegi hárekettiń, isheklerden úlken dárettiń shıǵıwınıń báseńlewine sebep boladı.
Bunda juwan ishekte suw sorılıw muǵdarı kúsheyedi, bul bolsa úlken dárettiń qattı bolıp qalıwına alıp keledi.
Hámiledarlıq vitaminleri: prenatal vitaminler, ásirese anemiyaǵa qarsı dáriler temirge bay, geyde bul hámiledarlıq dáwirinde tiykarǵı vitaminler jetispewshiligi esaplanadı. Temir dárettiń qarayıwına, qıyın keliwine hám hámiledarlıqta ish qatıw jaǵdayına sebep boladı.
Jatır basımı: hámiledarlıqtıń sońǵı dáwirinde, jatır kóleminiń úlkeyiwi nátiyjesinde isheklerge basım boladı, bul bolsa isheklerden dárettiń háreketleniwinde qıyınshılıq tuwdıradı.
Qosımsha túrde geyde ishek háreketinen tısqarı ish qatıw kelip shıǵıwında isik, asqazandaǵı qolaysızlıqlar hám qıyın, qurǵaq, azap beriwshi dáret payda bolıwı da sebep bolıwı múmkin.
Bunıń nátiyjesinde sonday-aq, dáretti tolıq shıǵara almaw sezimi júzege keledi. Ish qatıw, ásirese hámiledarlıq dáwiri dawamında kóp qolaysızlıqlardı keltirip shıǵaradı.
Hámiledarlıqta ish qatıwdı úy sharayatında emlew
Hámiledarlıq dawamında hayalda tez-tez kelip shıǵatuǵın qabızlıqtı jeńillestiriwshi, qáwipsiz úy sharayatında emlew usılları bar. Bular:
Talshıq: qosımsha talshıqlar alıw yamasa talshıqlı awqatlardı kóbirek paydalanıw, sonday-aq, miyweler, kókónisler hám pútin dánlerdi jew dáret muǵdarınıń artıwına hám ishekte massanıń ótiwin ańsatlastırıwǵa alıp keledi. Úlken jastaǵılar hár kúni 28 hám 34 gramm muǵdarda talshıq qabıl etiwi kerek.
Suyıqlıq: jeterli muǵdarda suw ishiw saqlanǵan dárettiń jumsaq hám ańsat ótiwi ushın áhmiyetli esaplanadı. Eger insan oǵan suw járdem bermey atırǵanın sezse, sorpa, shay hám tábiyiy shiyrin miywe yamasa kókónis sherbetlerin óz dietasına qosıwı múmkin.
Paydalı: Hámiledar hayal ushın paydalı kókónisler
Háreketsheńlik: aktiv bolıw ishektegi dárettiń háreketleniwine járdem beredi, shıpakerdiń razılıǵı menen turaqlı shınıǵıwlar qabızlıqtı jeńilletiwge járdem beredi. Eger shınıǵıw islew imkaniyatı bolmasa, hár kúni piyada júriwge háreket etiń.
Probiotikler: isheklerde millionlap salamat bakteriyalar jasaydı hám onıń durıs islewine járdem beredi. Probiotikler ishektegi bakteriyalar menen olardıń salamat shtammlarınıń kóbeyiwine járdem beredi, ishek háreketiniń normal hám turaqlı bolıwında qatnasadı.
Basqa emlew usılları
Eger joqarıdaǵı úy sharayatında emlew usılları nátije bermese, shıpaker menen bunıń basqa variantların talqılaw múmkin.*
Hayallardıń prenatal vitaminlerdi qabıllawı temir muǵdarın asırıp jiberedi, bunda shıpakerler temir muǵdarı kem bolǵan vitaminlerdi usınıs etedi.
Hámiledarlıqtaǵı ish qatıwdı birlemshi medicinalıq emlew usılı bul ish aydawshı dári quralları, olar nawqastıń hájetxanaǵa barıwında kóp ǵana qolaylıqlar hám jeńilliklerdi júzege keltiredi.
Ish aydawshı qurallardan paydalanıw ádette qáwipsiz, biraq qozdıratuǵın, kúshli ish aydawshı dári qurallarınan ózin shetlew jaqsı, sebebi olar jatır qısqarıwların kúsheytip jiberiwi múmkin.
Kóplegen ish aydawshı qurallar receptsiz satılıwına qaramastan, olardan qaysı biri qáwipsiz ekenligin shıpaker menen másláhátlesip paydalanıw shárt.
Hámiledarlıq dawamında paydalanıw múmkin bolǵan ayırım dáriler haqqında qısqasha maǵlıwmat berip ótemiz.
Hayal hámiledarlıq dawamında tómendegi qáwipsiz ish aydawshı dári qurallarınan paydalanıwı múmkin:
Massa payda etiwshi zatlar
Olar dáret quramına talshıqtıń qosılıwına hám kóp muǵdarda suw sorılıwına járdem beredi. Bunday etiw arqalı olar dárettiń jumsaqlaw hám ańsatıraq ótiwin támiyinlep beredi.
Bunday súrgi qurallarınıń túrleri spazm hám qolaysızlıqlarǵa sebep bolıwı múmkin, sonıń ushın hámiledar hayal bunday qurallardı shıpaker menen másláhátlesken halda ishiwdi kishi dozadan baslawı hám kóbirek suw menen ishiwi kerek.
Mısalı, massa payda etiwshi zatlar pisellium, metilcellyuloza hám polikarbofil zatların óz ishine aladı.
Dáret jumsartıwshı qurallar
Dáret jumsartıwshı qurallar dárette suwdıń jeterli bolıwına járdem beredi, bul onıń jumsaq bolıwın hám ótiwin qolaylastıradı.
Dáret jumsartıwshı qurallar ádette hámiledar hayallarǵa recept tiykarında shıpaker usınısı menen beriledi.
Maylı súrgi dári quralları
Maylı súrgi quralları dáret betine tegis qaplama qosadı yamasa ishek jolında qalǵan dárettiń deneden sırtqa shıǵıwına járdem beredi.
Glicerin shamshaları maylı súrgi qurallarınıń bir túri bolıp esaplanadı. Bul suppozitoriylerdi qollanıwdan aldın, ásirese hámiledarlıqta bárqulla densawlıqtı saqlaw qánigesi menen másláhátlesiw kerek.
Osmotik súrgi quralları
Bul ish júrgiziwshi qurallar isheklerde suw muǵdarın arttırıp, dárettiń jumsaq bolıwına járdem beredi. Olar sonday-aq ishek boylap dárettiń háreketleniwin támiyinleydi.
Ish júrgiziwshi qurallardıń bul túrleri sonday-aq, qarında isiw hám spazmǵa sebep bolıwı múmkin.
Hámiledarlıqta ish qatıwınıń asqınıwları
Kópshilik jaǵdaylarda hámiledarlıqtaǵı ish qatıw qısqa múddetli bolıp, emlewsiz yamasa minimal dárejede ótip ketedi. Kemnen-kem jaǵdaylarda uzaq dawam etken ish qatıw awır jaǵdaylardı keltirip shıǵarıwı múmkin, bunday jaǵdaylar júz bermesten burın, shıpaker menen másláhátlesiw hám zárúr emlew ilajların kóriw kerek.
Ish júrgiziwshi dári qurallarınan úzliksiz paydalanıwdı dawam etiw isheklerdiń ǵárezsiz dáret shıǵarıw sistemasın “umıtıp” qoyıwına sebep bolıwı múmkin.
Bul dáriler sonday-aq ayırım adamlarda elektrolit hám suyıqlıq balansı teńsalmaqlılıǵınıń buzılıwına sebep boladı.
Bunday mashqalalar ádette, densawlıǵında basqa mashqalaları bolǵan adamlarǵa tásir etedi, máselen, qantlı diabet yamasa búyrek keselliklerinde.
Ish júrgiziwshi qurallardıń túrleri hám olardı qanshelli jiyi qabıl etiw haqqında shıpaker menen másláhátlesiw shárt.
