Hámiledarlıqta ısıtpa shıǵıwı menen hámiledarlıqqa tán qızıwdı ózara ajıratıw qıyın bolıwı múmkin.
Hámiledarlıq dáwirinde ısıtpa shıǵıwı haqqında biliwińiz kerek bolǵan áhmiyetli nárseler, sonıń ishinde, hámiledar hayallarda ısıtpanıń ne ekenligi, dene temperaturası kóterilip, ısıtpa shıqqanda qanday dári ishiw múmkin ekenligi hám ısıtpa sizge hám ósip atırǵan balańızǵa alıp keliwi múmkin bolǵan qáwiplerdi minimallastırıw ushın shıpakerińizge xabarlasıwdıń áhmiyeti haqqında tómendegi maqala arqalı maǵlıwmat berip ótemiz.
Hámiledarlıqta ısıtpa degen ne?
Ísıtpa haqqında sóz bolǵanda, termometrdegi sanlar siziń simptomlarıńızdıń qanshelli awır ekenligin kórsetedi. Ádettegidey, hámiledarlıq waqtında da qaǵıydalar birdey: 37.7 oC dáreje hám onnan joqarı dene temperaturası ısıtpa dep esaplanadı.
Eger temperaturasıńız 38,0 oC dárejege jetse yamasa onda kóteriliwdi dawam etse, tún yarımı bolsa da shıpakerge xabarlasıń.
Eger sizde shamallaw yamasa gripptiń belgileri sezilmese hám siziń ısıtpańız 37.7 oC dárejege kóterilse, onı tezden paracetamol menen túsiriwdi baslań hám sol kúni shıpakerińizge qońıraw etiń, yamasa, eger temperaturasıńız tún yarımında kóterilse, ertesi kúni azanda xabarlasıwıńız múmkin.
Ulıwma alǵanda, 37.7 oC dárejege shekemgi tómen ısıtpa yamasa temperatura ádette siz oylaǵanday qáweterlenetuǵın nárse emes. Aytıp ótiw kerek, bul itibarsız qaldıratuǵın nárse de emes. Sonıń ushın sanlar kóterile baslamaslıǵına isenim hasıl etiw ushın termometr menen ólshep, dene temperaturasıńızdı baqlap barıń.
Qızıqlı: Hámiledarlıqta toksikoz hám onı jeńillestiriw usılları
Hámiledarlıqta dene temperaturası kóteriliwine sebep ne?
Shamallaw (ÓRVI)
Negizinde, hámiledarlıqta shamallaw sıyaqlı keń tarqalǵan viruslı infekciyalarǵa dus keliwińiz itimalı joqarı. Sebebi bul dáwirde immunitet sistemasıńız ózgeriske ushıraydı hám organizmińiz jat dep esaplaǵan hámileńizdi qabıl etilmewinen qorǵaydı. Nátiyjede, ádettegige qaraǵanda, hámiledarlıq dáwiri dawamında kóbirek shamallawıńız múmkin. Bul infekciyalar nátiyjesinde bolsa, ısıtpa shıǵıwı baqlanadı.
Gripp
Shamallaw sıyaqlı hámiledarlıq waqtında immunitet sistemasınıń ózgeriwi grippti juqtırıw qáwpin arttırıwı múmkin.
Tómengi dárejedegi ısıtpa suwıq tiyiw sıyaqlı qáwipli viruslı infekciyanıń nátiyjesi, joqarı ısıtpa bolsa gripptiń belgisi esaplanadı. Gripp penen kesellengende ısıtpa shıǵıwı sıyaqlı belgilerden tısqarı, dene awırıwı hám qaltıraw da payda boladı.
Dıqqat! Bolajaq analardıń hámiledarlıq waqtında gripp penen kesellenbewi, imkanı bolǵanınsha onıń aldın alıwı hámile salamatlıǵı ushın úlken áhmiyetke iye!
Bakterial infekciyalar
Geyde ısıtpa antibiotiklerdi talap etiwi múmkin bolǵan bakterial infekciya, máselen, sidik jolları infekciyası, búyrek infekciyası yamasa tamaqtaǵı streptokokklar sıyaqlı bakterial infekciyalar sebepli kelip shıǵıwı múmkin.
Listerioz
Ulıwma alǵanda, listerioz benen keselleniw itimalı júdá tómen bolsa da, hámiledar hayal hámiledarlıq waqtında túrli keselliklerden abaylı bolıwı kerek.
Hámiledarlıq dáwirinde listeriya bakteriyalarına dus kelmew ushın hámiledar hayallar shiyki gósh, balıq hám pasterizaciyalanbaǵan sırdı jewden saqlanıwı kerek, bul da joqarı temperatura payda etiwi múmkin.
Hámiledarlıqta ısıtpa shıǵıwı hám COVID-19
Hámiledarlıqta dene temperaturası kóteriliwiniń sebebi koronavirustıń jańa keselligi bolǵan COVID-19 da bolıwı múmkin. Eger siz COVID-19 benen kesellendim dep oylasańız, dárhal shıpakerge múrájat etiń, sebebi hámiledar hayallarda bul kesellik emlenbese, awır asqınıwlarǵa alıp keliwi múmkin.
Tiyisli: Hámiledarlıqtaǵı infekciyalar: eń qáwipli infekciyalar hám olardan qorǵanıw usılları
Ísıtpanı túsiriw usılları
Hámiledarlıqta ısıtpa shıǵıwı baqlansa, álbette, shıpakerge múrájat etip, bunıń sebebin anıqlaw hám soǵan muwapıq háreket etiw kerek.
Shıpaker qabıllawına barǵanǵa shekem, ısıtpanı túsiriw ushın paracetamol preparatın ishiw múmkin. Hámiledarlıq waqtında, eger qánige tárepinen usınıs etilmegen bolsa, aspirin hám de ibuprofen quramlı preparatlardı qabıl etiw múmkin emes.
Hámiledarlıqta ısıtpa kóteriliwi baqlanǵanda úy sharayatında bir qansha ámellerdi orınlaw arqalı dene temperaturasın belgili dárejede normallastırıw imkaniyatı bar:
- Suwıq vanna yamasa dush qabıl etiń;
- Salqınlaw hám suwsızlanıwdıń aldın alıw ushın kóp muǵdarda suw hám basqa ishimlikler ishiń;
- Jeńil kiyimler kiyiń.
Hámiledarlıqta ısıtpa kóteriliwiniń profilaktikası
Suwıq tiyiwden yamasa grippten tez-tez qollarıńızdı juwıw arqalı saqlanıń, nawqas adamlar menen ushıraspań hám jámiyetlik orınlarda kóp bolmań.
Gripp tek ǵana ısıtpanı keltirip shıǵarıwı emes, al basqa da asqınıwlardı keltirip shıǵarıwı múmkin ekenligin esapqa alıp, eger siz hámiledar bolsańız yamasa hámiledarlıqtı rejelestirip atırǵan bolsańız gripp máwsimi baslanǵanda grippke qarsı emleniń.
Hámiledarlıqtıń basında ısıtpa shıǵıwı múmkin be?
Negizinde, hámiledarlıq waqtında qálegen waqıtta ısıtpańız kóteriliwi múmkin. Sonıń ishinde, dáslepki múddetlerde de.
Izertlewler sonı kórsetedi, hámiledar hayallardıń shama menen úshten bir bóleginde hámiledarlıq dáwirinde ısıtpası kóteriledi hám kópshiligi salamat perzentlerdi dúnyaǵa keltiredi.
Biraq hámiledarlıq waqtında qálegen waqıtta ısıtpa kóteriliwi múmkin bolsa da, hámiledarlıqtıń birinshi háptelerindegi gripp hám sol sıyaqlı infekciyalıq kesellikler sebepli kelip shıǵatuǵın joqarı ısıtpa keyin ala sol sebepler menen ushırasıwı múmkin bolǵan ısıtpaǵa qaraǵanda ádewir qáwipli bolıwı baqlanǵan. Yaǵnıy erte múddetlerde baqlanǵan gripp, suwıq tiyiwler hámile ushın qáwipli bolıw itimalı joqarı.
Ilimiy basılımlarda járiyalanǵan ısıtpa menen baylanıslı izertlewler sonı kórsetedi, birinshi trimestrde joqarı ısıtpa bolıwı hár qıylı tuwma kemislikler rawajlanıw qáwpin arttıradı.
Hámiledarlıqta ısıtpa shıǵıwı hámilege qanday tásir etiwi múmkin?
Ísıtpa hámiledarlıǵıńızǵa tásir etiwi itimaldan uzaq emes. 37,4-37,6 oC dárejege shekem bolǵan jeńil ısıtpa ádette qáweterge sebep bolmaydı hám siziń ósip atırǵan náresteńizge salmaqlı tásir kórsetpeydi.
Biraq joqarı ısıtpa qáwipli bolıwı múmkin, sonıń ushın bul sanlar kóteriliwin kóriwińizden-aq, shıpakerge xabarlasıwıńız hám joqarıda atap ótilgen usıllar menen ısıtpanı túsiriw júdá áhmiyetli.
Emlenbegen joqarı dárejedegi ısıtpa asqınıwlarınan hayal hám hámile jábirleniw itimalı kóbirek bolsa da, buǵan ısıtpanıń ózi tikkeley sebep bolmawı múmkin. Ádette júzege keliwi múmkin bolǵan asqınıwlarǵa gripp sıyaqlı infekciyalar yamasa qanday da bir jaǵday sebep boladı.
Sonday-aq, hámiledarlıqta dene temperaturasınıń kóteriliwine itibarsız bolıp, ısıtpa sebepshileri menen gúrespegen hámiledar hayallardıń balalarında autizm keselligi qáwpi bar ekenligi de ayırım izertlewlerde anıqlanǵan.
Biraq kóp qáweterlenbeń, sebebi bunday jaǵday júzege keliw itimalı júdá az hám izertlew boyınsha anıq juwmaqlar shıǵarıwdan aldın jáne kóp izleniwler ótkeriw kerek.
Juwmaqlap aytqanda, túrli infekciyalıq keselliklerdiń aldın alıw hám shıpaker menen másláhátlesip tez emleniw hámiledarlıqta ısıtpa shıǵıwına qarsı eń jaqsı qorǵanıw quralı bolıp esaplanadı.
