Хурроккашӣ дар давраи ҳомиладорӣ асосан дар триместри 2-юми ҳомиладорӣ, тахминан дар ҳафтаи 16-уми тақвими ҳомиладорӣ ба сабаби саршавии басташавии бинӣ аз таъсири гормонҳои ҳомиладорӣ ба вуҷуд меояд.
Хурроккашӣ дар давраи ҳомиладорӣ аз чӣ сабаб ба вуҷуд меояд?
Дар занҳо ба туфайли зиёд шудани гормонҳои ҳомиладорӣ, баланд шудани сатҳи эстроген ва прогестерон пардаҳои луобии бинӣ варам мекунанд. Ҳангоми истироҳат, шумо аз сабаби варами пардаҳои луобии бинӣ хуррок мекашед. Инчунин, эҳтимоли хурроккашӣ ба вазни зиёдатӣ дар давраи ҳомиладорӣ низ вобаста аст. Вазни зиёдатӣ дар давраи ҳомиладорӣ боиси инкишофи бофтаҳои иловагӣ дар атрофи сар ва гардан мегардад, ки ин дар навбати худ метавонад хурроккаширо шиддат бахшад.
Оё хурроккашӣ дар давраи ҳомиладорӣ аломати преэклампсия аст?
Дар аксари ҳолатҳо, хурроккашӣ боз як нишонаи дигари манфии ҳомиладорӣ ба шумор меравад. Омили дигари муҳим ин аст, ки хурроккашӣ дар натиҷаи апноэи обструктивии хоб (натиҷаи аз ҳад зиёд суст шудани мушакҳои қисми қафои гулӯ барои нафаскашии муқаррарӣ) ба вуҷуд меояд. Ин ҳолат натиҷаи варамҳои музмини роҳҳои нафас мебошад. Тадқиқотҳо нишон медиҳанд, ки апноэи хоб бо фишори баланди хун ва преэклампсия (ҳолати ногаҳон пайдо шудани фишори баланди хун дар давраи ҳомиладорӣ) алоқаманд аст. Барои пешгирии ба эклампсия гузаштани преэклампсия ё ба вуҷуд овардани дигар оризаҳо, онро назорат кардан лозим аст.
Аломатҳои преэклампсия: варами ғайримуқаррарии буҷулаки пой, дастҳо ва рӯй, тағйирёбии қобилияти биноӣ, хирашавӣ ва ҷамъ кардани вазни зиёдатӣ, ки ба меъёри истеъмол вобаста нест. Апноэи хоб дар давраи ҳомиладорӣ модари оянда ва тифлро аз оксиген маҳрум мекунад, ки дар натиҷа хатари мушкилоти саломатӣ, аз қабили бемориҳои дил ва эмболияи шуш дар тифли оянда зиёд мешавад. Аломатҳои апноэи хоб метавонанд субҳ бо дарди сар бедор шудан ва зуд-зуд хаста шудан, асабоният ё мушкилоти хотираро (хастагӣ ва бехобӣ инчунин метавонанд аломатҳои муқаррарии ҳомиладорӣ бошанд, махсусан дар семоҳаи аввал ва сеюм) ба вуҷуд оранд.
Муфид: Баландшавии фишори хун ҳангоми ҳомиладорӣ — намудҳо ва пешгирии он
Агар шумо дар худ нишонаҳои зеринро мушоҳида кунед ва бештар аз муқаррарӣ хуррок кашед, ҳатман ба духтур муроҷиат кунед. Агар шумо аз апноэи хоб азият кашед, духтури шумо нақшаеро таҳия мекунад, ки барои шумо ба таври солим ва бехатар кам кардани вазнро таъмин мекунад. Фаромӯш набояд кард, ки вазни зиёдатӣ ба апноэи хоб оварда мерасонад.
Чӣ гуна метавон аз хурроккашӣ дар давраи ҳомиладорӣ пешгирӣ кард?
Барои кам кардан ё тамоман қатъ кардани хурроккашӣ, шумо метавонед баъзе тавсияҳоро иҷро кунед:
- Ба паҳлӯ хоб равед, ба пушт хобидан метавонад хуррокро зиёд кунад;
- Дар ҳолати каме баландтар истироҳат кунед, дар ин раванд бо болиштҳо каме баландтар бардоштани сар ҳангоми хоб ба тоза кардани роҳҳои нафас кӯмак мекунад;
- Аз намкунак истифода баред, илова кардани намӣ ба ҳаво дар ҳарорати гарм ё сард метавонад пеши роҳи хурроккашии шуморо ҳангоми истироҳат гирад;
- Аз дудҳои гуногун худдорӣ намоед, ҳатто дуди ғайримустақим ҳам метавонад роҳҳои нафаси шуморо озурда созад ва боиси хурроккашӣ гардад.
Чӣ гуна метавон ҳангоми ҳомиладорӣ беҳтар хоб кард?
Ҳангоми ҳомиладорӣ гигиенаи хоб хеле муҳим аст. Аз сабаби дардҳои гуногун, нороҳатиҳо ва тамоюл ба бехобӣ шумо метавонед эҳсос кунед, ки дар хоб хуб истироҳат карда наметавонед.
Фоиданок: Бехобӣ дар давраи ҳомиладорӣ — сабабҳо ва роҳҳои бартараф кардани он
Баъзе маслиҳатҳо барои беҳтар хобидан ҳангоми ҳомиладорӣ:
- Кӯшиш кунед, ки ҳар рӯз дар як вақт хоб равед, то ҷисми худро ба як ритм оваред. Ин одат инчунин ба шумо имкон медиҳад, ки субҳ дар як вақт аз хоб бедор шавед.
- Пеш аз хоб одатҳои оромбахшро ташаккул диҳед. Масалан, қабул кардани ваннаи ширгарм, хондани китоб ё гӯш кардани мусиқӣ.
- Хонаи худро торик, салқин ва нисбатан ором нигоҳ дошта, барои хоб шароит фароҳам оваред.
- Ҳар ҳафта ба ҳисоби миёна то 150 дақиқа машқҳои махсус барои ҳомиладориро иҷро намуда, фаъолияти ҷисмониро нигоҳ доред.
- Пеш аз хоб аз ҳар гуна хӯрок ва машғулиятҳои фароғатӣ худдорӣ намоед.
- Бистар ва хобгоҳи худро фақат барои хоб истифода баред. Дар бистар иҷро кардани корҳои дигар, масалан, "кофтуков"-и смартфон, метавонад истироҳати мағзи сарро пеш аз хоб душвор гардонад.
Умуман, дар давраи ҳомиладорӣ ҳар шаб аз 8 то 10 соат хоб кардан мувофиқи мақсад аст*. Агар шабона зуд-зуд бедор шавед, эҳтимол ба шумо аз ин ҳам бештар хоб лозим шавад.
