Сүт иштеп чыгуу үчүн организмге кошумча калория керек болот. Белгилүү бир түрдөгү тамак-аш жана суусундуктар жаш эненин сүтүн көбөйтүү үчүн пайдалуу болуп эсептелет.
Лактацияны жогорулатуучу азыктар боюнча жүргүзүлгөн изилдөөлөр өтө аз. Бирок, төмөнкү азыктар эмчек сүтүнүн иштелип чыгышын көбөйтүүгө жардам бериши мүмкүн:
Сулу жармасы
Сулу жармасы эне сүтүн көбөйтүү же арттыруу үчүн эң жакшы азыктардын бири. Ошондой эле ал бала эмизген аялдар жана наристелер үчүн маанилүү болгон азык заттардын булагы болуп саналат.
Мындай азык заттарга төмөнкүлөр кирет:
- азык булалары (дан эгиндеринде кездешет);
- темир;
- магний;
- цинк.
Сарымсак
Сарымсакты же сарымсак кошумчаларын колдонуу айрым аялдарда лактация процессин стимулдаштырып, сүттүн көлөмүн көбөйтүшү мүмкүн. Анын натыйжалуулугун далилдеген бир да изилдөө жок болсо да, Индиядагы айрым адамдар сарымсакты галактагог (сүттү көбөйтүүчү өсүмдүк) катары колдонушат.
Бирок, сарымсакты өтө көп жеш эне сүтүнүн жытынын жагымсыз болушуна алып келиши мүмкүн. Кээ бир ымыркайларга бул жыт жакпайт жана натыйжада алар эне сүтүн азыраак ичиши мүмкүн.
Фенхель уруктары
Фенхель уруктары эмчек сүтүн өндүрүүнү көбөйтүү үчүн сатылуучу чайлардын жана кошумчалардын жалпы курамы болуп саналат. Кээ бирөөлөр болсо, ичтин көбүшүн жеңилдетүү үчүн фенхель уруктарын да пайдаланышат.
Изилдөөлөр көрсөткөндөй, эмчек эмизүү мезгилинде фенхелди кабыл алуу сүт менен майдын көлөмүн жогорулатып, ымыркайдын көбүрөөк салмак кошушуна жардам берет.
Пайдалуу: Төрөттөн кийин аялды коркунучтан эскертүүчү белгилер
Белокко бай азыктар
Белок эне сүтүн өндүрүү үчүн өтө маанилүү. Ал аялдан ымыркайга өтүп, аны азыктандырат жана өсүшүнө жардам берет. Ошондуктан, эмчек эмизген аялдарга күн сайын кошумча 25 грамм белок керектөө сунушталат. Эне сүтүнүн туруктуулугун камсыз кылуу үчүн күн сайын көп өлчөмдө белокко бай тамактарды жеш керек.
Белокко бай азыктар:
- майсыз эт;
- жумуртка;
- төө буурчак жана жасмык;
- тофу (сыр);
- жаңгак жана дан азыктары
Маанилүү: Балдарды узак убакытка эмчек сүтү менен багуунун пайдалуу жана зыяндуу жактары
Жашыл жалбырактуу жашылчалар
Висконсин университетинин Үй-бүлөлүк медицина жана коомдук саламаттык кафедрасынын маалыматы боюнча, көптөгөн мөмө-жемиштер жана жашылчалар, анын ичинде жашыл жалбырактуу жашылчалар лактация процессин тездетүүгө жардам берип, эмчек сүтүн көбөйтүүгө кызмат кылат.
Жашыл жалбырактуу жашылчаларга төмөнкүлөр кирет:
- кызылчанын жалбырактары;
- каакым;
- капуста;
- кинза;
- шпинат.
Азыраак колдонуу керек болгон азык-түлүктөр
Көпчүлүк аялдар эмчек эмизүү учурунда эч кандай азыктан баш тартуунун кереги жок деп эсептешет. Башкалары белгилүү бир тамак-аш жана суусундуктар сүттүн көлөмүн азайтышы же ымыркайдын тынчсыздануусуна алып келиши мүмкүн деп айтышкан.
Аларга төмөнкүлөр кирет:
- кофеиндүү продуктулар, анын ичинде кофе, чай жана шоколад;
- сүт азыктары;
- көк чөптөр, анын ичинде кинза, жалбыз жана көкөмерен;
- татымалдар, мисалы, дарчын жана чили;
- жемиштер, анын ичинде цитрус, киви, кургатылган кара өрүк жана ананас;
- пияз, капуста, брокколи жана гүл капуста сыяктуу ичте газ пайда кылган жашылчалар
Бирок ар бир аял жана наристе ар башка. Күндөлүк тутуу жана өзгөрүүлөргө көз салуу көйгөйлүү тамактарды аныктоого жардам берет.
Окуңуз: Ооз көңдөйүнүн кандидозу — молочница
Эне сүтүн көбөйтүү үчүн кошумча кеңештер
Жогоруда санап өтүлгөн азыктар менен лактация процессин жакшыртууга болот, ошону менен бирге сүттүн көлөмүн көбөйтүүнүн башка көптөгөн ыкмалары бар. Буларга төмөнкүлөр кирет:
- төрөттөн кийин баланы тез арада эмизүү;
- ымыркайдын талабына жараша тез-тез эмизүү;
- сүттүн туруктуулугун сактоо үчүн эмизгенден кийин саап салуу;
- суу жана ширелерди ичүү;
- көп эс алуу;
- медитация жана физикалык көнүгүүлөр аркылуу стрессти азайтуу;
- эмчекке ылайыктуу ич кийим кийүү;
- алкоголь жана никотинден баш тартуу;
- ымыркайдын эмүү натыйжасын көзөмөлдөө;
- эгерде эмизүү менен байланышкан көйгөйлөр пайда болсо, лактация боюнча дарыгерден тез арада кеңеш алуу;
- дары-дармектерди кабыл алуудан мурун дарыгер менен кеңешүү, анткени кээ бир дарылар сүттүн көлөмүн азайтышы мүмкүн.
