Kópshilik adamlarda pnevmoniya ápiwayı suwıq tiyiw yamasa gripp penen baslanadı, keyin bolsa ókpege ótedi. Hámiledarlıqta pnevmoniya emlenbese, ómir ushın qáwipli bolıwı múmkin, qalaberse, hámiledar hayallardıń bul kesellikke qarsı gúresiwi biraz qıyın keshiledi.
Hámiledarlıqta pnevmoniya belgileri
Hámiledarlıq dáwirinde pnevmoniya belgilerinen xabardar bolıw hám onı emlew ushın dárhal shıpakerge múrájat etiw kerek.
Ulıwma belgileri tómendegishe:
- Suwıq tiyiw hám grippke uqsas belgiler, máselen, tamaq, bas hám buwınlardaǵı awırıw;
- Dem alıwdıń qıyınlasıwı yamasa tez-tez dem alıw;
- Kúshli hálsizleniw, sharshaw;
- Isıtpa yamasa qaltıraw;
- Kókirek tarawındaǵı awırıwlar;
- Qattı jótel.
Pnevmoniyanıń ana hám balaǵa tásiri
Pnevmoniya awır kesellik bolıp, emlenbese, ana hám tuwılajaq bala ushın qáwipli asqınıwlardı keltirip shıǵarıwı múmkin.
Hámiledarlıq waqtındaǵı pnevmoniya organizmdegi kislorodtıń azayıwına alıp keledi, sebebi bul jaǵdayda ókpe jeterli muǵdardaǵı kislorodtı denege jetkerip bere almaydı. Nátiyjede jatırǵa da az muǵdarda kislorod jetip baradı.
Bul keselliktiń ókpeden deneniń basqa bólimlerine, máselen, qan tamırlarına da tarqalıw itimallıǵı bar.
Hámiledarlıq waqtında pnevmoniya tómendegi aqıbetlerge alıp keliwi múmkin:
- Erte tuwılıw;
- Hámile salmaǵınıń kemeyiwi.
Kópshilik hayallar qattı jótel hámile ushın qáwipli dep qáweterlenedi. Biraq, náreste amortizator sıpatında xızmet etiwshi amniotik suyıqlıq penen qorshalǵan bolıp, hámileni jótel, hár qıylı terbelisler hám shawqımlar, basım hám de kishi soqqılardan qorǵaydı.
Áhmiyetli: Hámiledarlıqta sidik quramında belok bolıwı qáwipli me?
Qáwip faktorları
Hámiledar bolıw hayaldıń pnevmoniya menen keselleniw qáwpin arttıradı, sebebi organizm jatırdaǵı balanıń rawajlanıwı ushın kóp energiya sarplaydı. Qalaberse, ósip atırǵan náreste hám úlkeyip atırǵan jatır da hayaldıń ókpe kólemin azaytadı, bul bolsa ókpe funkciyasına qosımsha júkleme beredi.
Pnevmoniya kóbinese ókpege tarqalatuǵın bakterial infekciya nátiyjesinde júzege keledi. Kóbinese pnevmoniyaǵa sebep bolatuǵın bakteriyalarǵa tómendegiler kiredi:
- Haemophilus influenzae
- Mycoplasma pneumoniae
- Streptococcus pneumoniae
Pnevmoniyaǵa alıp keletuǵın viruslı infekciyalarǵa tómendegiler kiredi:
- Gripp virusı
- Suwsheshek yamasa orap alıwshı gerpes (juqpalı bórtpe)
- Respiratorlıq-sincitial virus (RSV) hám koronavirus (COVID-19).
Tómendegi jaǵdaylarda hámiledar hayallardıń pnevmoniya menen keselleniw qáwpi joqarı:
- Temeki shekse;
- Anemiya (qanazlıq) bar bolsa;
- Astması bolsa;
- Sozılmalı kesellikke shalınǵan bolsa;
- Jas balalar menen islewdi talap etetuǵın kásip penen shuǵıllansa;
- Emlewxanalarda yamasa qariyalar úylerinde islese;
- Immuniteti tómen bolsa.
Hámiledarlıqta pnevmoniyanı emlew
Hámiledarlıq waqtındaǵı pnevmoniyanı emlew infekciya sebepshisi virus yamasa bakteriya ekenligine baylanıslı.
Hámiledarlıq dáwirinde viruslı pnevmoniyanı emlewdiń kóp usılları qáwipsiz esaplanadı hám pnevmoniya keselligi dáslepki basqıshta anıqlansa, virusqa qarsı dári-darmaqlar arqalı saplastırıw múmkin. Ayırım jaǵdaylarda shıpaker tárepinen kislorodlı terapiya qosımsha túrde buyırıladı.
Bakterial pnevmoniya bolsa shıpaker usınısı boyınsha berilgen antibiotikler arqalı emlenedi.
Qızıqlı: Hámiledarlıqta qarında bolatuǵın ózgerisler
Qashan shıpakerge múrájat etiw kerek?
Hámiledar hayalda pnevmoniya belgileri payda bolıwı menen-aq shıpakerge múrájat etiw kerek. Sonda kesellik sebepli júzege keliwi múmkin bolǵan túrli asqınıwlardıń aldı alınadı.
Shıpaker sizden kesellik belgileri haqqında sorawdan tısqarı:
- Fonendoskop menen ókpelerdi tekseredi;
- Ókpeni rentgennen ótkeredi;
- Qaqırıqtan úlgi aladı.
Pnevmoniyanıń awır dárejesi anıqlansa, emlewxanada jatıp emleniw talap etiledi. Eger hámiledar hayal tómendegi belgilerge dus kelse, ol dárhal 103 yamasa jergilikli tez járdem nomerine qońıraw etiwi kerek:
- Kókirek awırıwı;
- Dem alıwdıń qıyınlasıwı;
- Paracetamol ishkennen keyin de túspeytuǵın joqarı temperatura (38 °C yamasa onnan joqarı) yamasa toqtawsız qusıw; sananıń shatasıwı yamasa hámileniń qozǵalısınıń azayıwı.
