Hámiledarlıq tilekleri yamasa hámiledarlıqtaǵı jeriklik derlik barlıq hayallarda júdá jiyi ushırasadı (duzlanǵan qıyar hám suwıq temperaturada muzqaymaq jewdi qálew sıyaqlı). Perzent kútip atırǵan analardıń azıq-awqatlardı tańlap jewi ádettegi jaǵday.
Izertlewshilerdiń pikirinshe, bolajaq analar tuwılajaq perzentleriniń tilekleri, organizm talap etip atırǵan ónimdi jewdi qálewi sebepli awqat tańlaydı degen juwmaqqa kelse, ayırım izertlewshiler bul processti ańsat túrde túsindiriw qıyın ekenligin atap ótedi.
Eger Sizde de awqatlardı tańlap jew tilegi bolsa, tileklerińizge qarsı bolmań, biraq, meyardı umıtpań. Biraq, Siz jewdi qálegen ónim tuwılajaq perzentińiz ushın zıyan keltiriw itimalı bolsa (mısal ushın, kóp muǵdarda muz, kesek hám qıshqıl ónimler) shıpakerińiz benen másláhátlesiń.
Hámiledar hayallar bunday tileklerdiń kópshiligi kútilmegende payda bolǵanday seziletuǵının aytadı, al tiykarında buǵan sebep ne?
Gormonlar. Bul qısmán durıs juwap. Hámiledarlıq dáwirinde hayallardaǵı gormonal ózgerisler tám hám iyis biliwge úlken tásir kórsetedi. (Bul qısqa múddetli processti basınan keshirip atırǵan hayallarda ne sebepten awqatqa bolǵan qálew hám jek kóriwdi túsiniwińizde járdem beredi).
Biraq, ulıwma juwmaq – hayallardıń hámiledarlıq dáwirindegi ınjıqlıqları, qálewlerin birlestirip turıwshı ulıwma faktor joq hám bunıń sebebin hesh kim anıq bilmeydi.
Qızıqlı: Hámiledarlıqta qarında bolatuǵın ózgerisler
Hámiledarlıqta jeriklik qashan baslanadı?
Hámiledarlıq dáwirinde hayallarda qálew-isteklerdiń ótiwi bir-birin tákirarlamaydı, yaǵnıy ol individual ótetuǵın process. Ayırım hayallarda hámiledarlıq dáwiri dawamında hesh qanday qálew-istekler ushıraspaydı.
Hámiledar hayallarda jeriklik tiykarınan, hámileniń birinshi hám ekinshi úsh aylıǵında kúsheyedi. Bala dúnyaǵa kelgeninen biraz waqıttan soń ananıń ınjıqlıqları hám qálewleri ádettegidey dawam etedi.
Hámileniń birinshi ayında hayallarda azıq-awqat ónimleri menen mashqalalar payda boladı. Kópshilik jaǵdaylarda hayallar ózlerine jaqpaǵan awqatlardı jew bılay tursın, hátteki iyiskewge de shıday almaydı. Bunday jaǵday qálew-istekten pútkilley parıq qıladı. Hámiledar hayallar bul dáwirde awqatlardı jewden bas tartadı.
Hámileniń 5 yamasa 6 háptesinde erte tańnan qusıw arqalı ónimler olardıń organizmine jaqpaǵanlıǵın bildiredi.
Áhmiyetli: Hámiledarlıq dáwirinde teridegi ózgerisler
Hámiledarlıq qálew-tilekleri neni ańlatadı?
Salamat awqatlanıw qánigeleri hám densawlıqtı saqlaw mentorlarınıń pikirinshe, hámiledarlıq dáwirindegi qálew-tilekler insan ómirindegi psixologiyalıq processler menen baylanıslı.
Máselen, hámiledar hayallardıń kóp muǵdarda muz hám ádettegidey bolmaǵan azıq-awqatlıq zatlar, kir juwıw kraxmalı, kesekti tutınıwı, hayal organizminde temir yamasa cink jetispewshiligi menen baylanıslı ekenin, sonday-aq, shańaraqlıq qatnasıqlarda kewilsizlikler bar ekenin bildiredi degen juwmaqqa keledi.
Ulıwma juwmaq mınaday: qánigeler hámiledarlıq dáwirindegi qálew-tileklerge itibar beriw menen bir qatarda, normanı támiyinlewdi másláhát beredi. «Salamat dieta — bul siziń sezim hám fizikalıq mútájliklerińizge, sonday-aq, organizmińizdiń tileklerine juwap beretuǵın awqatlanıw bolıp esaplanadı» – deydi qánigeler.
Shirinliklerdi tutınıwdaǵı tilekler glyukozanıń tómenlewi nátiyjesi, sonıń ushın az-azdan tez-tez awqatlanıw qumshekerdi kóp tutınbawǵa járdem beredi.
Hár kúni erte tańda tańǵı awqattı ishiw (tańǵı awqattı ótkerip jiberiw ishteydi kúsheytiwi múmkin), kúndelikli fizikalıq shınıǵıw jasaw hám psixologiyalıq járdem alıw arqalı hayallar zıyanlı qálew-tileklerinen waz keshiwi múmkin.
