Заңдын эң тынчсыздандыруучу өзгөрүүлөрүнүн бири — анын адаттагыдан башкача көрүнүштө болушу эсептелет. Ымыркайдын же баланын заңы жашыл болсо, бул көптөгөн жаш энелерди тынчсыздандырат. Жашыл заң — заңдагы өзгөрүүлөрдүн эң кеңири таралган көрүнүшү. Бул абал балдар арасында абдан кеңири таралган жана заңдын түсүнүн нормалдуу өзгөрүүсү болуп саналат.
Заң адатта күрөң түстө болот, бирок анын түсү күн сайын өзгөрүшү мүмкүн. Бул адатта тынчсызданууга себеп болбойт. Балдардагы жашыл заңдын себептери алардын жашына жараша ар кандай болушу мүмкүн.
Жашыл заң кээде кандайдыр бир оорунун бар экендигин көрсөтүшү мүмкүн болсо да, бул абал олуттуу, тынчсыздандыра турган себеп боло албайт.
Келгиле, бул макалада баланын заңы жашыл болсо, бул эмнени билдирерин, жашыл заңга эмне себеп болорун жана балаңыздын заңы жашыл экенин байкасаңыз эмне кылуу керектигин талкуулайлы.
Жашыл заң деген эмне?
Жашыл заң көбүнчө балаңыз жеген нерсеге, ал кабыл алган витаминге же дарыга байланыштуу болуп, ал балада диарея, ич оорусун пайда кылышы мүмкүн.
Жашыл заң көбүнчө жаңы төрөлгөн ымыркайларда кездешсе да, кээде кичинекей же чоңураак балдарда да пайда болушу мүмкүн.
Симптомдору
Жашыл заң өзүнөн-өзү пайда болушу же ашказандын бузулушу менен коштолгон айрым симптомдор менен бирге байкалышы мүмкүн:
- Адатта, калыптанган заң мезгил-мезгили менен жашыл түскө ээ болушу мүмкүн; бул заңдын түсүнүн кадимки өзгөрүшү
- Кээде сыртынан кара болуп көрүнгөн заң чындыгында кочкул жашыл түстө болушу мүмкүн
- Жашыл заң диарея учурунда суюк заң түрүндө болушу мүмкүн.
Баланын ичинин жашыл келишинин себептери?
Ымыркайларда жана жаш балдарда заңдын жашыл түстө болушуна көптөгөн факторлор себеп болот жана бул сейрек учурларда гана олуттуу медициналык көйгөйлөрдүн бар экендигин көрсөтөт.
Бардык курактагы балдарда бир эле учурда жашыл заң болушу мүмкүн, бирок анын себептери жана жыштыгы баланын жашына жараша айырмаланат.
Ымыркайлардагы жашыл заң
Наристелерде жана айрыкча, жаңы төрөлгөн бөбөктөрдө заңдын жашыл түстө болушу көп байкалат. Мунун себептери төмөнкүлөр:
- Жаңы төрөлгөн бөбөктүн биринчи заңы меконий кара-чайыр түсүндө болот, бирок ал кээде жашыл түскө да ээ болушу мүмкүн.
- Ашыкча көп өттүн бөлүнүп чыгышы да заңдын жашыл түстө болушуна алып келиши мүмкүн.
- Эмчек сүтү менен азыктанган баланын заңы меконийден кийин дароо жашыл түскө ээ болушу мүмкүн.
- Жашыл заң эненин рационундагы тамак-ашка карата чыдамсыздыкты көрсөтүшү мүмкүн, мындай абалда бөбөктө бир аз ыңгайсыздыктар, ичтин көбүшү сыяктуу абалдар келип чыккандыгын көрөбүз.
- Вирустук же бактериялык инфекциялар заңдын суюк, жашыл түскө келип калышына себеп болушу мүмкүн.
- Балаңыздын рационуна катуу азыктарды, айрыкча жашыл жашылчаларды кошкондо да анын заңы жашыл түскө айланышы мүмкүн.
Жаңы төрөлгөн ымыркайда алгачкы беш күндөн кийин да кочкул жашыл заңдын бөлүнүшү уланса, бала энеси тарабынан туура тамактандырылып жаткандыгын жана жетиштүү салмак кошуп жаткандыгын текшерүү зарыл. Эгерде жаш эне туура эмчек эмизүү эрежелерин сактабаса же бул боюнча билим жана көндүмдөрү аз болсо, бала багуу, анын ичинде туура эмчек эмизүү боюнча адистердин жардамын алышы керек.
Бөбөктөрдөгү жашыл заңдын себеби
- Жашыл түстөгү, суюк жана суулуу заңды пайда кылган оору — бул диарея. Мителер да диареяга алып келиши мүмкүн. Балдар колдорун жууганга көнбөгөндүктөн жана аны туура жууй албагандыктан, алар мителерди көбүрөөк жуктуруп алышат.
- Эгер балаңыз кошумча тамак жесе, бул да анын заңын жашыл түскө өзгөртүшү мүмкүн.
- Витаминдер, айрыкча, темир затын камтыган дары-дармектер баланын заңынын жашыл түстө болушуна алып келиши мүмкүн.
Улуураак курактагы балдарда
- Жашыл азыктарды колдонуу.
- Ар түрдүү дары-дармектерди же витаминдерди кабыл алуу.
- Диарея же ашказандын бузулушу заңдын жашыл түстө болушуна алып келиши мүмкүн.
AAP маалыматы боюнча, жашыл заң олуттуу тынчсызданууну жаратпайт. Бирок, заң жашыл, белгилүү бир формага ээ болбостон, суюк жана тез-тез бөлүнүп турса, мындай абал көбүнчө балада диарея болуп жатканынан кабар берет, мында бардык жаштагы балдарга көңүл буруу жана камкордук талап кылынат. Анткени диарея балдардын суусуздануусу жана баланын заңында кан болушу сыяктуу тынчсыздандыруучу жана өмүргө кооптуу абалдарга себеп болушу мүмкүн.
Ымыркайлардагы жашыл заң түздөн-түз тынчсызданууну жаратпаса да, диарея менен коштолгон жашыл заң коркунучтуу. Маалыматтарга ылайык, дүйнө жүзү боюнча ич өткөк 5 жашка чейинки балдардын өлүмүнүн себептеринин ичинен алдыңкы оору болуп саналат.
Дарыгерге качан кайрылуу керек?
Ошону менен бирге, эне же бала багуучу үчүн тынчсызданууну жарата турган заңдын көрүнүштөрү да бар.
Эгер балаңыздын заңы ак, кызыл (өзгөчө ачык кызыл) же кара түстө болсо, дароо педиатрга кайрылышыңыз керек.
Заңдын мындай түстөрдө болушу олуттуу көйгөй бар экенин билдирбеши мүмкүн, бирок мындай абал дарыгериңизге кайрылууну жана анын текшерүүсүн талап кылат.
Эскертүү белгилери
Эгер ымыркайда же балада ич өткөк жана төмөнкү белгилердин бири байкалса, дарыгерге кайрылыңыз:
- суусуздануу белгилери;
- бир күндөн ашык кусуу;
- ысытма 38,0 ºC дан жогору;
- тамактанууга кызыгуунун жоктугу.
