Tuwıwdan keyin deneńiz júdá kóp ózgerislerdi basınan keshiredi hám bunı emlew ushın waqıt kerek. Tuwıwdan keyin bir hápte dawamında awırıw hám júdá qattı sharshaw sıyaqlı ayırım qolaysızlıqlardı seziw ádettegi jaǵday. Biraq ayırım hayallarda tuwıwdan keyin awır, ómir ushın qáwipli bolǵan densawlıq mashqalalarınıń aqıbetleri boladı. Eger ózińizdi qanday sezip atırǵanıńızdan qáweterde bolsańız yamasa awırıw, qolaysızlıqlar bolsa, shıpakerińiz benen baylanısıń.
Barlıq hayallar tuwıwdan keyingi kútimge mútáj. Tuwıwdan keyingi kútim — jańa tuwǵan hayallarǵa medicinalıq járdem bolıp esaplanadı. Ózińizdi jaqsı sezseńiz de, tuwıwdan keyingi barlıq tekseriwlerden ótiń. Bular tuwıwdan keyin jaqsı tiklenip atırǵanıńızǵa isenim payda etiwge járdem beretuǵın medicinalıq tekseriwler bolıp tabıladı.
Tuwıwdan keyingi kútim júdá áhmiyetli, sebebi jańa analar tuwıwdan keyingi kúnler hám hápteler dawamında awır, ayırım waqıtları ómir ushın qáwipli bolǵan qáwip astında boladı.
Tuwıwdan keyingi eskertiwshi belgiler
Ulıwma alǵanda, awır densawlıq mashqalalarınıń belgilerine kókirek quwıslıǵındaǵı awırıw, dem alıwdıń qıyınlasıwı, kúshli qan ketiwi hám kúshli awırıw sıyaqlılar kiredi.
Eger sizde tómendegi belgiler yamasa simptomlar bolsa, shıpakerińizge qońıraw etiń.
Infekciya belgileri:
- 38.0°C den joqarı ısıtpa, deneńiz infekciyanı keltirip shıǵarıwshı virus yaki bakteriyalardı óltirmekshi bolǵanda ısıtpa payda boladı;
- keserva, epizyotomiya yamasa perial jırtıqlar átirapında kúsheyip baratırǵan yamasa bólinip shıǵıwlar, awırıw, qızarıwlar;
- Keserva — operaciya bolıp, shıpakerińiz qarın hám jatırdı kesiw arqalı balańızdı dúnyaǵa keltiredi.
- Epiziotiniya — tuwıw waqtında náresteni sırtqa shıǵarıwǵa járdem beriw ushın vaginanıń ashılıwında islengen kesim;
- Aralıq jırtılıwı — qın hám tuwrı ishek ortasındaǵı tuwıw waqtındaǵı jırtılıw esaplanadı.
- Sidik shıǵarıwda ashıw yamasa awırıwlar, bel qaptalında awırıw yamasa tez-tez sidik shıǵarıwǵa beyimlilik.
- Emshektegi qızıl sızıqlar yamasa jańa payda bolǵan isikler. Sizde mastit dep atalatuǵın emshek infekciyası bolıwı múmkin.
- Qarınnıń tómengi bóliminde kúshli awırıw. Sizde endometritler yaǵnıy jatır silekey qabatınıń qabınıw keselligi bolıwı múmkin.
- Jaman iyisli bólinip shıǵıwlar. Sizde endometrit yamasa bakterial vaginoz dep atalatuǵın infekciya da bolıwı múmkin. Vaginada belgili bir bakteriyalar kóp bolǵanda bakterial vaginoz júz beredi.
Tuwıwdan keyin sizde tómendegi belgiler yamasa alamatlar bolsa, 103 nomerine qońıraw etiń hám tez járdem shaqırıń:
- tońıw;
- kóp terlew;
- tez-tez dem alıw;
- tez-tez júrek soǵıwı;
- albırawshılıq;
- ısıtpa;
- kúshli awırıw hám qolaysızlıq.
Basqa densawlıq penen baylanıslı mashqalalardıń belgileri:
- ádettegi hayız kóriwge qaraǵanda awırıraq qan ketiwi yamasa waqıt ótiwi menen kúsheyip baratırǵan qan ketiwi. Sizde tuwıwdan keyingi qan ketiw jaǵdayı (PPH dep te ataladı) bolıwı múmkin. Jaǵday hayalda tuwǵanınan keyin kúshli qan ketiwi esaplanadı. Bul bala tuwılǵannan keyin 12 háptege shekem júz beriwi múmkin bolǵan awır, biraq az ushraytuǵın jaǵday.
- Ayaqlarda, ásirese baltırlarıńızda awırıw, isiw, qızarıw, tońıw sıyaqlı jaǵdaylar baqlansa. Sizde kúshli tamır trombozı bolıwı múmkin.
- Kóriw qábiletiniń ózgeriwi, bas aylanıwı, kúshli bas awırıwı, oń qarınnıń joqarǵı bóliminde yamasa iyinde awırıw, dem alıwda qıyınlıq, tez salmaq jıynaw yamasa ayaq, qol yamasa bettiń isiwleri. Sizde tuwıwdan keyin preeklampsiya jaǵdayı bolıwı múmkin. Bul awır jaǵday esaplanıp, hayalda joqarı qan basımı bolǵanda hám onıń búyrek hám bawır sıyaqlı ayırım organları tuwıwdan keyin normal jaǵdayda islemey atırǵanda júz beredi.
- Kókirek qápesindegi awırıw, jótel. Sizde ókpe emboliyası bolıwı múmkin.
- Tuwıwdan sońǵı 10 kúnnen artıq úmitsizlik yamasa qayǵılıq sezimi. Sizde tuwıwdan keyingi depressiya jaǵdayı bolıwı múmkin. Hayallarda bala tuwılǵannan keyin depressiya payda boladı.
- Asqazan awırıwı yamasa qusıw.
