Hámiledar hayallarǵa tutınıwı usınıs etilmeytuǵın azıq-awqatlar dizimi bir qaraǵanda sheksiz. Sonıń ishinde, ıslanǵan gósh, ayırım teńiz ónimleri hám hátteki kofeinli ónimler menen bir múddet xoshlasıw kerek boladı. Siz tutınǵan nárseler perzentińizdiń rawajlanıwına hám ósiwine tásir kórsetedi, sonıń ushın itiyatlılıq hám tańlap tutınıw hesh qashan zıyan keltirmeydi.
Hámiledarlıqta kókónislerdi durıs tutınıw náresteni ana qarnında waqtında da, tuwılǵannan keyin de onıń rawajlanıwına járdem beretuǵın áhmiyetli vitaminler hám minerallar menen támiyinlewi múmkin. Biraq ayırım kókónisler hámiledarlıqta qáwipli bolıwı da múmkin.
Hámiledarlıqta eń jaqsı kókónisler, sonday-aq qaysı kókónislerdi tutınbaw kerekligi haqqında usı maqala arqalı tolıq maǵlıwmat alıwıńız múmkin.
Paydalı maqala: Hámiledarlıqta neler múmkin emes?
Hámiledarlıqta kókónislerdiń paydası
Hámiledarlıqtaǵı eń jaqsı kókónisler kóp muǵdarda azıqlıq zatlardı bere aladı. Tuwrı waqıtta, jeterli muǵdarda awqatlanıw durıs awqatlanıwdıń tiykarın quraydı. Salawatlı awqatlanıw azıqlıq zatlar jetispewshiliginiń hám hámiledarlıqtaǵı qantlı diabettiń aldın alıwǵa járdem beredi.
Durıs awqatlanıwdıń paydaları:
- salawatlı salmaqtı saqlaw;
- qálipli qan basımı;
- anemiya rawajlanıw qáwipiniń azayıwı;
- ish ótiw hám ish qatıw sıyaqlı asqazan-ishek kesellikleriniń profilaktikası;
- náresteniń jeterli salmaqta tuwılıwı.
Ayırım áhmiyetli azıqlıq zatlar tómendegilerden ibarat:
- beta-karotin – náresteniń immunitet sistemasına, kóriw qábileti hám kletkalar rawajlanıwına paydalı;
- C vitamini – salamat toqımalardıń rawajlanıwı, tisler hám súyekler ushın paydalı;
- foliy kislotası – náresteniń salamat salmaǵı ushın hám nerv tútikshesi kemislikleriniń aldın alıw ushın áhmiyetli (kókónislerden tısqarı, kúnine 400 mkg foliy kislotası tabletkasın qabıllaw da usınıs etiledi);
- kaliy – qan basımın tártipke salıw ushın áhmiyetli.
Kókónislerdi jew hámiledarlıqta hám onnan keyin perzentińizdiń salamatlıǵı ushın oǵada úlken áhmiyetke iye.
Hámiledarlar ushın paydalı kókónisler
Hámiledarlıqta tutınıw ushın eń jaqsı kókónisler tómendegiler:
- jazǵı hám qısqı qabaq – belok, foliy kislotası hám A, C, K vitaminleriniń deregi;
- sparja – A, C, E hám K vitaminleri, sonday-aq kletchatka hám foliy kislotası bar;
- pomidor – C hám K vitaminleri hám biotin zatınıń deregi;
- qızılsha – immunitet sistemasın jaqsılawda paydalı bolǵan kletchatkanıń tábiyiy deregi;
- kartoshka – A, B hám C vitaminlerine bay;
- bolgar burıshı – kletchatka deregi;
- ukrop – E vitamini, belok hám B2 vitamininiń (riboflavinniń) tábiyiy deregi;
- brokkoli – kletchatkanıń tiykarǵı deregi, sonday-aq kaliy hám C, K vitaminlerine bay;
- ıspanaq, kók shópler, kapusta japıraǵı – foliy kislotası hám karotinoidlerdiń deregi.
Shıpaker kórigine barǵanıńızda siz hám tuwılajaq náresteńiz ushın paydalı bolǵan basqa kókónisler haqqında da sorap bilip alıwıńız múmkin.
Kókónisler hám kók shópler jaqsılap juwılǵannan keyin olardı jew qáwipsiz esaplanadı.
Hám hámiledar hayal buǵan bárqulla itibar beriwi shárt!
Hámiledarlıqta jewge bolmaytuǵın kókónisler
Hámiledarlıqta jewge bolmaytuǵın ayırım kókónis túrleri de bar. Bulardıń barlıǵı náresteńizge zıyanlı bakteriyalardıń juǵıw qáwpin arttırıwı múmkin:
- shiyki yamasa shala pisirilgen óskinler (ónip shıqqan másh, jońıshqa óskinleri);
- juwılmaǵan hár qanday kókónis;
- turp hám rediskanıń shiyki óskinleri;
- tayın salat aralaspaları.
Qansha kókónis jew kerek?
Ádettegiden kóbirek ashlıq sezimi tábiyiy, sebebi sizde awqatlanıwǵa bolǵan mútajlik salıstırmalı túrde joqarı. Kóbinese hámiledarlıqta az-azdan hám tez-tez awqatlanıw usınıs etiledi. Sizde as sińiriw menen baylanıslı mashqalalar bolıwı múmkin. Az-azdan hám tez-tez awqatlanıw bul mashqalalardıń itimallıǵın azaytadı.
Hámiledar hayal kúnine 300 gramm (tórt porciya) yamasa onnan kóp shiyki yamasa pisirilgen kókónis jewi usınıs etiledi.
Menyuǵa kókónislerdi qalay kirgiziw kerek?
Kókónislerdi tayarlawdıń siz sınap kóriwińiz múmkin bolǵan qızıqlı usılları bar. Kókónislerdi kashnich, rayxan sıyaqlı tábiyiy dámlewishler menen quwırıw olardı jáne de mazalı etedi. Jaqsılap tazalanǵan kókónislerdi kesip, maydalap hám pisirip tutınıń.
Eger onsha jaqtırmaytuǵın kókónisti jewge háreket etip atırǵan bolsańız, onı basqa kókónisler menen qosıp pisiriwińiz múmkin.
Bul maqala allaboutwomenmd.com hám www.webmd.com maǵlıwmatları tiykarında «Lalu» komandası tárepinen tayarlandı.
