Barlıq hayallarda, sonday-aq hámiledarlıq dáwiri dawamında hámiledar hayallarda bas aylanıw jiyi baqlanadı. Olardı bas aylanıw, geyde bolsa bas aylanıw menen birge jıǵılıp qalıw qorqınıshı da qıynaydı. Hámiledarlıqta bas aylanıw sebepleri hám shıpakerge qashan barıw kerek ekenligi haqqında usı maqalamızda tolıq toqtap ótemiz.
Hámiledarlıqta bas aylanıwı
Jaǵday hámmede hár qıylı seziliwi múmkin, biraq ádette tómendegishe táriyiplenedi:
- kóz aldı gúńgirtlesiwi;
- teńsalmaqlılıqtı joǵaltıw;
- jeńil kewil aynıwı;
- deneni qadaǵalawdı joǵaltıw sezimi.
Hámiledarlıq dáwirinde bas aylanıwınıń sebepleri?
Hámiledar hayallarda bas aylanıw sebepleri kóp bolıwı múmkin, sonıń ushın biz maǵlıwmattı ańsat úyrenip shıǵıw ushın dizim dúzdik.
Hámiledarlıqtıń ilk dáwirinde bas aylanıwınıń sebebi: Vertigo – bas aylanıw seziminiń kishi túri. Bul dáwirde bas aylanıw denedegi gormonal ózgerisler fonında júz beredi: hayal denesinde jańa ómir jaratılmaqta, sonıń ushın hámiledarlıqtıń basında bas aylanıwı sıyaqlı tınıshsızlanıw baqlanıwı múmkin.
Hámiledarlıqtıń ekinshi trimestrinde bas aylanıwı: Tiykarǵı sebep: denedegi qan kóleminiń kóbeyiwi, hámile ósiwi, júrek soǵıwınıń tezlesiwi, vazodilataciya. Sonday-aq, qan basımı keskin tómenlewi sebepli bas aylanıwı múmkin.
Bas aylanıwı migren, júrek keselligi, kemqanlıq, qandaǵı qant muǵdarınıń tómenlewi, stress hám uyqısızlıq sebepli kelip shıǵıwı múmkin.
Hámiledarlıqtıń úshinshi trimestrinde bas aylanıwı: Hámiledarlıqtıń aqırǵı úsh aylıǵında bas aylanıwı normal dawam etip atırǵan hámiledarlıqta baqlanbawı kerek, sonıń ushın bul dáwirde bas aylanıwı qıynasa, dárhal shıpakerge múrájat etiw usınıs etiledi. Sebepleri hár qıylı bolıwı múmkin, biraq olardıń hámmesi nárestege hám anaǵa zıyan jetkeriwi yamasa erte tuwılıwǵa alıp keliwi múmkin. Máselen, ashlıq hám qant muǵdarınıń keskin tómenlewi balanıń qarındaǵı jaǵdayına tásir etedi. Sonday-aq, teńsalmaqlıqtıń sebepleri qandaǵı gemoglobin dárejesiniń tómenligi, kislorod jetispewshiligi, atmosfera basımınıń ózgeriwi, toksikoz, hámile tárepinen iri tamırlardıń qısılıwı, hámiledarlıq qantlı diabeti bolıwı múmkin.
Hámiledarlıqtıń barlıq dáwirine tiyisli ulıwma sebepler
Hámiledarlıq waqtında qálegen waqıtta bas aylanıwına sebep bolıwı múmkin. Bul jaǵdaylar belgili bir trimestrge baylanıslı emes.
Kemqanlıq
Sizde salamat qızıl qan dánesheleri sanınıń azayıwı menen xarakterlenetuǵın kemqanlıq baqlanıwı múmkin. Bul organizmde temir hám foliy kislotası jeterli bolmaǵanda júz beredi.
Bas aylanıwı menen bir qatarda, anemiya sizdiń sharshawıńızǵa, terińiz reńiniń bozarıwına yamasa dem qısılıwına alıp keliwi múmkin.
Hámiledarlıq waqtında qálegen waqıtta anemiya rawajlanıwı múmkin. Eger joqarıda sanap ótilgen shaǵımlar sizdi tınıshsızlandırsa, shıpaker hámiledarlıq waqtında temir muǵdarın ólshew hám jaǵdayın baqlaw ushın qan analizin ótkeriwi múmkin. Kemqanlıq tastıyıqlansa, temir yamasa foliy kislotası qosımshaların usınıs etiwi múmkin.
Suwsızlanıw
Suwsızlanıw hámiledarlıqtıń qálegen waqtında júz beriwi múmkin. Eger sizde kewil aynıwı, qusıw tınıshsızlandırıp atırǵan bolsa, bunıń aqıbetinde ulıwma suwsızlanıw kelip shıǵıwı múmkin. Sonday-aq, hámiledarlıq waqtında organizm suwsızlanıwı múmkin, sebebi bul waqıtta deneńiz kóbirek suw talap etedi.
Hámiledarlıqtıń basında kúnine keminde 8-10 stakan suw ishiw kerek hám bul muǵdardı ekinshi hám úshinshi úsh aylıqta kóbeytip barıw lazım, sebebi siz hámiledarlıqtıń keyingi dáwirlerinde taǵamnamańızǵa qosımsha kaloriya qosasız. Bul bolsa, suw ishiwdi de kóbeytiwińiz kerekligin ańlatadı.
Hámiledarlıq dáwirinde suwǵa bolǵan mútájlikti azıq-awqat tutınıwına qarap esaplaw múmkin. Hár bir qabıl etilgen kaloriya ushın ádette 1-1,5 ml suw kerek boladı (mısalı, 2000 kaloriyalı awqatlanıwda bolǵan adamǵa hár kúni 2000-3000 ml suyıqlıq kerek boladı). Hámiledar hayallarǵa ekinshi trimestrden baslap kaloriya tutınıwın shama menen 300 kaloriyaǵa arttırıw usınıs etiledi. Sonıń ushın olarǵa ekinshi trimestrden baslap, ádettegi suyıqlıq tutınıwǵa qosımsha túrde jáne 300 ml suyıqlıq kerek boladı.[1]
Áhmiyetli: Hámiledarlıqta suwsızlanıw
Hámiledarlıq waqtında bas aylanıwın basqarıw
Hámiledarlıq waqtında bas aylanıwdıń aldın alıw yamasa azaytıwdıń bir neshe jolı bar:
- Bir halatta uzaq turıwdan shekleniń;
- Tik turǵan jaǵdayıńızdan otırıwǵa yaki jatıwǵa asıqpań;
- Ekinshi hám úshinshi trimestrde shalqasınan jatıwdan saqlanıń;
- Qandaǵı qant muǵdarı azaymawı ushın salamat awqatlanıw principlerine ámel etiń;
- Suwsızlanıwdıń aldın alıw ushın kóbirek suw ishiń;
- Qolaylı hám háreketlerdi sheklemeytuǵın kiyim kiyiń.
- Bas aylanıwǵa sebep bolǵan keselliklerdi emlew ushın shıpaker tárepinen usınıs etilgen qosımshalar hám dári-dármaqlardı qabıl etiń.
Eger hámiledarlıq waqtında basıńız aylansa ne islew kerek?
Birinshiden, siz áste otırıwıńız, suw ishiwińiz hám kózińizdi jumbawıńız kerek. Bir zatqa itibar menen qarap turıw jaqsıraq.
Eger ulıwma jaǵdayıńızda jaqsılanıw bolmasa, onda qan basımıńızdı ólshewińiz kerek. Itimal, bas aylanıwınıń sebebi qan basımınıń tómenlewi bolıwı múmkin. Bunday jaǵdayda siz aynalardı ashıwıńız hám jatıwıńız kerek.
Eger bul jaǵdayǵa qandaǵı qant dárejesiniń tómenlewi sebep bolsa, onda konfet yamasa qanday da bir shiyrinlik jewińiz kerek.
Eger joqarıdaǵı ilajlar járdem bermese, dárhal tez járdem shaqırıń. Este saqlań, hámiledarlıqta bas aylanıwınıń hámiledarlıqtıń sońǵı dáwirlerinde baqlanıwı tez járdem talap etiwi múmkin!
Saw bolıń!
