Jańa tuwılǵan nárestede dene temperaturasın qadaǵalawshı sistema jaqsı rawajlanbaǵan boladı. Eger náresteńiz 3 aydan kishi bolsa hám tuwrı ishek temperaturası yamasa temporal arteriya temperaturası 38°C yaki onnan joqarı bolsa, náresteńizdi tezden jergilikli pediatr shıpakerine kórsetiń. Bul tez járdemdi talap etetuǵın jaǵday. Balańızdıń ulıwma salamatlıq jaǵdayın bahalaw ushın emlewxanaǵa alıp barıń. Nárestelerde ısıtpa shıǵıwı hár qıylı sebeplerden payda bolıwı múmkin.
Kishkentaydıń normal dene temperaturası 36,1 °C den 37,9 °C dárejege shekem bolıwı múmkin. Qánigeler 38 °C yaki onnan joqarı rektal temperaturanı ısıtpa dep esaplaydı.
Jańa tuwılǵan nárestede ısıtpa baqlanıwı awır keselliktiń belgisi bolıwı múmkin. Jańa tuwılǵan náresteler túrli infekciyalarǵa kóbirek beyimli (shıdamsız) boladı, sonıń ushın baladaǵı infekciyanıń hár qanday belgilerine jiddiy múnásibette bolıp, professional shıpakerdiń járdemine súyeniw kerek.
Nárestelerde ısıtpa shıǵıwı menen kórinetuǵın keń tarqalǵan mashqalalardan biri dem alıw sistemasınıń infekciyalıq kesellikleri bolıp esaplanadı. Jańa tuwılǵan balalar úlkenirek balalarǵa qaraǵanda murınları arqalı kóbirek dem aladı, sonıń ushın olarda murın pitiwi dem alıwdı qıyınlastırıwı múmkin. Jańa tuwılǵan nárestelerdiń hawa jolları da salıstırmalı kishi kólemge iye.
Kislorod jetispewshiligi jańa tuwılǵan nárestege awır zıyan tiygiziwi múmkin. Eger náreste dem alıwda qıynalatuǵın bolsa, biraq ısıtpası kóterilmese de, bul haqqında shıpaker menen másláhátlesiń.
Jańa tuwılǵan balanıń dem alıwında mashqala bar ekenligin kórsetetuǵın belgiler tómendegilerden ibarat:
- qırıllaw;
- dem alıwda murın tesiginiń keń ashılıwı;
- teri reńiniń aq yamasa kógis bolıwı, ásirese tırnaqlar átirapında yamasa awız átirapında (bul belgilerdi nárestelerde anıqlaw qıyınıraq)
- dem alǵanda qabırǵalar aralıq bulshıq etlerdiń tartılıwı.
Eger nárestede dem alıw mashqalası hám ısıtpa payda bolsa, ata-ana olardı dárhal emlewxanaǵa alıp barıwı yamasa tez járdemge múrájat etiwi kerek.
Paydalı usınıslar
Perzentińizdiń temperaturasın tekseriw ushın bárqulla sanlı termometrden paydalanıń. Hesh qashan sınaplı termometrden paydalanbań. Sebebi, olar sınsa, sınap tásirinde záhárleniw qáwpi júzege keliwi múmkin. Sonday-aq, kishkentay hám náresteler ushın rektal termometrden durıs paydalanıw qaǵıydalarına qatań ámel etiń.
Amerika Pediatriya Akademiyası usınısına kóre, 3 jasqa shekemgi balalarda anıq nátiyjelerge erisiw ushın dene temperaturasın tuwrı ishekte ólshew maqsetke muwapıq esaplanadı. Bul balanıń tuwrı ishegine termometr qoyıw arqalı ámelge asırıladı.
Tuwrı ishek termometrinen nadurıs paydalanıw, tuwrı ishekke awır zıyan jetkeriliwine alıp keliwi múmkin. Durıs paydalanıw ushın bárqulla ónim islep shıǵarıwshınıń kórsetpelerine ámel etiń.
Eger rektal temperaturanı ólshewde ózińizdi qolaysız sezseńiz, basqa usıldan paydalanıń yamasa rektal temperaturanı ólshewdi qánigelerden úyrenip alıń. Balańızdıń shıpakeri menen sóyleskenińizde, oǵan balańızdıń temperaturasın ólshew ushın qaysı usıldan paydalanǵanıńızdı aytıń.
Artıqsha qızıp ketiw
Ísıtpa shıqqanda balanıń suwıp ketpewi de áhmiyetli. Biraq náresteniń kóp qabatlı kiyim hám odeyal menen oralıwı aqıbetinde hádden tıs qızıp ketiwi múmkin. Bunda náresteniń júzi ıssı, qızarǵan hám bala tınıshsız bolıwı, kóp jılawı múmkin. Hádden tıs qızıp ketpew ushın:
- Perzentińizdi hár qanday ıssılıq dereginen uzaǵıraq tutıń. Mısalı, bólme isıtqıshı, kamin yamasa tikkeley quyash nurı túsiwinen saqlań.
- Úyińizdi shama menen 22 °C tan 24 °C qa shekemgi bolǵan temperaturada saqlań;
- Perzentińizdi ortasha qalıńlıqta kiyindiriń. Ol sizden qalıńıraq kiyim kiyiwge mútáj emesligin este saqlań.
Nárestelerde ısıtpa suwsızlanıw aqıbeti
Jańa tuwılǵan náresteler ana súti yamasa aralaspanı jeterli dárejede qabıl etpewi múmkin. Bul dene temperaturasınıń kóteriliwine alıp keliwi múmkin. Eger náresteńiz emshek sútin jeterli dárejede qabıl etpey atır dep oylasańız, onda shıpakerge múrájat etiń. Analar ushın paydalı kónlikpeler: emiziw qaǵıydaları, balanıń awqatlanıw muǵdarın qadaǵalaw sıyaqlı áhmiyetli bilimlerdi úyreniń. Bunday bilim hám kónlikpelerdi iyelewde «Lalu» óziniń isenimli hám paydalı resursları arqalı sizge járdem beriwi múmkin.
Balańızdıń temperaturasın qalay tekseriw algoritmin anıq iyelep alǵanıńızǵa isenim hasıl etiń hám balańızdıń aptechkası ushın termometr satıp alıń. Eger náresteńizde ısıtpa bolsa, álbette shıpaker menen másláhátlesiń.
Maqala Stenford balalar salamatlıǵı orayı, Amerika pediatriya akademiyası hám de WebMD basılımınıń maǵlıwmatları tiykarında «Lalu» jámááti tárepinen tayarlandı.
