Kópshilik hayallarda hámiledarlıqta ishtey joǵalıw jaǵdayı baqlanadı. Siz awqattı jaǵımsız dep biliwińiz yaki ózińizdi ash seziwińiz múmkin, biraq bunday payıtta ózińizdi awqat jewge májbúrley almaysız.
Hámiledarlıqta ishteydiń joǵalıw sebebi ne?
Ishteyińiz ózgeriwi ádettegi jaǵday, bul ásirese hámiledarlıq dáwirinde deneńizde júdá kóp ózgerisler júz beriwine alıp keledi. Eger sizde ishtey joǵalatuǵın bolsa, barlıq awqatlarǵa bolǵan ulıwma qızıǵıwsızlıq yamasa awqatlanıw tilegi joqlıǵı payda bolıwı múmkin. Sonı este saqlań, hámiledarlıq dáwirindegi ishteydiń joǵalıwı bul júdá keń tarqalǵan ózine tán ónimlerdi jaqtırmaw seziminen parıq qıladı.
Hámiledarlıq dáwirinde ishteydiń joǵalıwına tómendegi birneshe faktorlar sebep bolıwı múmkin:
Kewil aynıwı hám qusıw
Kewil aynıwı hám qusıw hámiledarlıqta, ásirese birinshi trimestrde, toksikoz túrinde, tez-tez ushırasadı, ayırım hayallarda bul jaǵday hámiledarlıq dáwiri dawamında da baqlanıwı múmkin.
Eger kewil aynıwı hám qusıw sebepli ishtey joǵalıwı baqlanıp atırǵan bolsa, maylı yamasa ashshı awqatlardan waz keshiwge háreket etiń, awqattan óz aldına suyıqlıq ishiń hám az-azdan, tez-tez awqatlanıń.
Ruwxıy salamatlıq jaǵdayı
Bunda túrli ruwxıy salamatlıq jaǵdayları, sonıń ishinde, stress hám depressiya siziń ishteyińizge tásir etiwi múmkin.
Hámiledar hayallar hár qıylı fizikalıq hám bioximiyalıq ózgerisler sebepli ruwxıy salamatlıq mashqalalarına kóbirek beyim bolıwı múmkin. Atap aytqanda, depressiya awqatlanıw ádetleriniń ózgeriwine, sonıń ishinde, ishteydiń tómenlewine sebep bolıwı múmkin.
Qızıqlı: Hámiledarlıq dáwirindegi qálew-istekler nelerden derek beredi?
Dári-darmaqlar
Hámiledarlıq dáwirinde qollanıw múmkin bolǵan ayırım dáriler ishteydi páseytiwi múmkin. Eger ishteydiń tómenlewi qabıl etip atırǵan preparatlarǵa baylanıslı dep oylasańız, bul haqqında shıpakerińiz benen másláhátlesiń.
Awqatlanıwdıń buzılıwı
Ayırım hámiledar hayallarda awqatlanıwdıń buzılıwı, sonıń ishinde, anoreksiya hám bulimiya jaǵdayı júz beriwi múmkin. Qánigelerdiń esaplawları boyınsha, hámiledar hayallarda tártipsiz awqatlanıw 0,6-27,8% ti quraydı.
Basqa múmkin bolǵan sebepler
Hámiledar hayallarda óspeler, asqazan iskerliginiń buzılıwı, zárde hám Addison keselligi sebepli de ishteydiń joǵalıwı kelip shıǵıwı múmkin.
Bunnan tısqarı, hámiledarlıq penen baylanıslı dám hám iyis seziwdiń ózgeriwi, B12 vitamini hám temir sıyaqlı zatlardıń jetispewshiligi ayırım hámiledar hayallarda ishteydiń joǵalıwına sebep bolıwı múmkin.
Paydalı: Hámiledarlıq dáwirinde tis etlerinen qan ketiwi
Hámiledarlıqta ishteydi qalay tiklew múmkin?
Eger siz ishtey joǵalıw jaǵdayın bastan keshirip atırǵan bolsańız, awqatlanıwıńızdı qalay durıs jolǵa qoyıwdı oylawıńız kerek.
Eger siz tolıq porciya awqatlardı jey almaytuǵınlıǵıńızdı sezseńiz de, ózińiz ushın jeterli bolǵan awqatlardı birinshi orınǵa qoyıwıńız múmkin. Bular siz hám bolajaq perzentińiz ushın jeterli azıqlıq zatlardı qabıllawdı támiyinlewge járdem beredi.
Tómende keltirilgen bir neshe azıq-awqat túrlerin tayarlaw ańsat, porciyaları kishi hám asqazanıńızda ańsat sińedi:
- Belokqa bay jegilikler: qattı qaynatılǵan máyek, yogurt, quwırılǵan noqat, sır, tawıq bólegi, túyetawıq góshi;
- Jumsaq, talshıqqa bay bolǵan paydalı kókónisler: shiyrin kartoshkalar, jasıl loviya, mayda geshir (qaynatılǵan yamasa shiyki halda), tábiyiy shpinatlı salat;
- Kishi bólekler: taza jiydekler, júweri unı, keptirilgen miyweler hám ápiwayı tvorog sıyaqlı qurǵaq sút ónimleri;
- Jumsaq dánler/kraxmallar: qońır gúrish, makaron hám makaron ónimleri, sır hám de duxovkada pisirilgen hám ezilgen kartoshka;
- Sorpa: tawıqlı lapsha sorpa hám tawıq góshli mastava;
- Suyıqlıqlar: ápiwayı bulyonlar hám densawlıq ushın paydalı smetanalar.
Paydalı: Hámiledarlıqta neler múmkin emes?
Qashan qáweterleniw kerek?
Eger sizde waqtı-waqtı menen ishteyińiz joǵalatuǵın bolsa yaki belgili bir awqatlarǵa bolǵan ishteyińiz joǵalatuǵın bolsa, hár kúni jeterli muǵdardaǵı azıqlıq zatlardı qabıllaytuǵın bolsańız, ádette, bunnan qáweterleniwge zárúrlik joq.
Mısalı, eger siz turaqlı túrde azıqlıq zatlarǵa bay awqatlardı qabıl etseńiz hám siziń salmaǵıńız hámiledarlıq múddetińizge sáykes kelse (Salmaǵıńızdı «Lalu» arqalı da baqlap barıwıńız múmkin), waqtı-waqtı menen ishtey joǵalıw jaǵdayınan qáweterlenbewińiz múmkin.
Bunnan tısqarı, ayırım hámiledar hayallardıń ózine tán awqatlarǵa, sonıń ishinde, júdá xosh iyisli awqatlar hám góshke bolǵan ishteyi joǵalıwı múmkin. Biraq bul salıstırmalı keń tarqalǵan jaǵday bolıp, ádette qáweterge sebep bolmaydı.
Biraq siz turaqlı túrde awqatlanbay atırǵan bolsańız yamasa bir kúnnen artıq sizde ishtey joǵalıw jaǵdayı bolsa, shıpakerińizge múrájat etiwińiz kerek.
Sebebi, bunday jaǵdayda ózińizdiń densawlıǵıńız, sonday-aq, ósip kiyatırǵan perzentińizdiń densawlıǵın qollap-quwatlaw ushın jeterli muǵdarda azıqlıq zatlardı alıw júdá áhmiyetli.
Hámiledarlıqta az awqatlanıw menen baylanıslı bolǵan asqınıwlar
Az awqatlanıw hámiledarlıq penen baylanıslı kóplegen asqınıwlarǵa, sonıń ishinde, hámileniń jaman ósiwine, az salmaqqa iye bolıwına hám ananıń salmaq joytıwına alıp keliwi múmkin. Bul sonday-aq, balalarda aqılıy funkciyalardıń hám minez-qulqtıń tómenlewi mashqalaların keltirip shıǵaradı. Makroelementler de, mikroelementler de birdey salamat hámiledarlıqtı támiyinlew ushın zárúr.
Hámiledarlıqta sozılmalı ishtey joǵalıwı baqlanǵan hayallarda qansızlıq, hámile ósiwi patologiyaları hám erte tuwılıw qáwipi boladı.
