Hámiledar hayallar milk qanawı boyınsha tis shıpakerine múrájat etkende olarǵa hámiledarlıq gingiviti (milklerdiń qabınıwı) keselligi diagnozı qoyılıwı múmkin.
Hámiledar hayallardıń shama menen 60-75 procentinde milkleri isken, qızarıp turǵan jaǵdayda boladı. Milkler názik hám tásirsheń bolǵanlıǵı sebepli tisler ápiwayı tis shotkası menen juwılǵanda qanap ketedi. Bul kesellik milk qabınıwınıń jeńil túrlerinen biri bolǵan hámiledarlıq gingiviti esaplanadı.
Hámiledarlıq gingiviti milklerdiń tis qaǵındaǵı bakteriyaǵa seziwsheńliginiń artıwı, gormonal ózgerisler sebepli kelip shıǵadı. Ulıwma alǵanda, hámiledarlıq dáwirinde hayallarda progesteron hám estrogen muǵdarı júdá joqarı boladı hám nátiyjede silekey perdelerdegi qan aǵımı kóbeyedi, bul bolsa milklerde seziwsheńlikti asırıp jiberedi.
Hámiledarlıq gingiviti sebepleri
- Gormonlar ózgeriwi;
- Raciondaǵı ózgerisler;
- Silekey islep shıǵarılıwınıń kemeyiwi;
- Silekeydegi ózgerisler;
- Tis pastası tásiri;
- Qusıw hám hálsizlik.
Hámiledarlıq gingiviti rawajlanıp atırǵan hámilege qanday tásir etedi?
Eger siz tislerdi taza saqlaw gigienasına ámel etseńiz hámiledarlıq gingiviti sizge yaki náresteńizge zıyan jetkermeydi. Milk keselligi erte tuwıwǵa alıp keliwi múmkinligi haqqında kózqaraslar bar, biraq bul keselliktiń awırlaw túrine shalınǵan hayallar ushın ǵana qáwipli bolıwı múmkin.
Izertlewler milk keselliginiń awır túri erte tuwıw, náresteniń kem salmaqta tuwılıwı hám hátte preeklampsiya (qan basımınıń kóteriliwi) sıyaqlı aqıbetlerge alıp keliwi múmkinligin kórsetedi. Basqa izertlewler bolsa, milk keselligi hám bunday awır asqınıwlar arasındaǵı baylanıstı biykarlaydı.
Hámiledarlıqta milk qanawı qashan baslanadı?
Hámiledarlıqtıń ekinshi trimestrinde túrli gormonal ózgerisler sebepli milkler birqansha jumsaq hám tásirsheń bolıwına qaramastan, ádette úshinshi trimestrde, estrogen hám progesteron dárejeleri eń joqarı shıńına shıqqanda milk qanawı baqlanadı. Birinshi trimestrdegi tásirsheń milkler hámiledarlıqtıń dáslepki belgisi bolıwı múmkin.
Hámiledarlıq dáwirinde tisler kútimi
Tislerge ǵamxorlıq etiwdi awız boslıǵın taza saqlawdan baslań:
- Kúnine keminde eki márte (ilajı bolsa, hár awqattan keyin) jumsaq shyotka hám ftorlı tis pastası járdeminde tazalap abaylap juwıń. Sonday-aq, túrli simptomlardıń aldın alıwshı arnawlı antigingivit tis pastalarınan paydalanıń;
- Hár kúni tis jibi menen tislerdi tazalań;
- Ftorlı, alkogolsiz awız juwıw quralınan paydalanıń;
- Ilajı bolsa, sheker tutınıwdı shekleń, sebebi ol tislerde qaq payda bolıw itimalın hám awızdaǵı bakteriyalar muǵdarın arttırıwı múmkin.
Hár qanday keselliktiń aldın alıw ushın turaqlı túrde tis shıpakerine múrájat etiń. Turaqlı tekseriwlerge qosımsha túrde, tómendegi jaǵdaylarda dárhal tis shıpakerine qońıraw etiń:
- Tis awırıwı;
- Milklerdiń jiyi qanawı;
- Milk keselliginiń basqa belgileri, máselen, milklerdiń isiniwi yamasa tásirshenligi, tis hám milktiń uzaqlasıwı, turaqlı jaman iyis keliwi yamasa tislerdiń bosasıwı baqlanıwı;
- Awız boslıǵında túrli jaralar payda bolıwı;
- Awız boslıǵınıń uyıwı.
Hámiledarlıq gingivitin qalay emlew múmkin?
Tis shıpakerleri hámiledarlıq gingivitin emlewde bir qatar emlewlerdi, sonıń ishinde, antibiotikler hám milk keselliklerine qarsı awız juwıw quralların usınıs etedi. Awır jaǵdaylarda bolsa xirurgiyalıq operaciya ótkeriliwi de múmkin.
Bul antibiotikler hám awız juwıw quralları ádette hámiledar hayallar ushın qáwipsiz, biraq olardıń ósip atırǵan náresteniń densawlıǵına tásiri haqqında hesh qanday izertlewler ótkerilmegen. Bunday qurallardı buyırıwda tis shıpakerleri hámiledarlıǵıńız, tuwıwǵa qansha waqıt qalǵanı hám házirgi allergiyalıq jaǵdayıńızdı inabatqa alıwı hám emlew tolıq qáwipsiz ekenligine isenim hasıl etiwi kerek.
