Hámiledarlıq waqtında ana bolıw haqqında qáweterlengenińizde jaqınlarıńız sizge “Ne qılıw kerekligin perzentli bolǵanıńda bilip alasań” dep aytqan bolsa kerek. Evolyuciyalıq jaqtan analıq instinkti túsinigi hámmege málim. Qızıǵı da sonda, ana bolǵanıńızdan keyin siz balańızǵa qanday ǵamxorlıq qılıwdı avtomatik túrde sezesiz.
Biraq perzent dúnyaǵa keltirgenińizde sizge náresteni qalay tárbiyalaw, qalay awqatlandırıw hám uyqlatıw sıyaqlı maǵlıwmatlardı jámlegen «arnawlı kórsetpe» berilmeydi.
Negizinde analıq instinkti bul bir ápsana hám bul instinktke súyeniw onsha durıs emes. Eger ana bola sala perzentti qalay tárbiyalaw kerekligin túsinip jetpegen bolsańız, qáweterlenbeń!
Analıq instinkti ne?
Analıq instinktine anıq túsindirme joq. Geyparalar ushın bul ana bolıw qálewin bildirse, basqalar bolsa onı perzent tárbiyalawda ne durıs hám nadurıs ekenligi haqqındaǵı ádep-ikramlılıq yamasa emocional kórsetpe dep túsinedi. Ayırımlar ushın bolsa analıq instinkti perzentti zıyanlı nárselerden qorǵaw bolıp tabıladı. Biraq hesh qanday ilimiy izertlew analıq instinktiniń ne ekenligin anıq dálillemegen.
Qızıqlı: Hámiledarlıq dáwirindegi qálew-tilekler neden derek beredi?
Analıq instinkti bar ma?
Hámiledarlıq waqtında hám onnan keyin dene hám miyde hár qıylı ózgerisler júz beriwi tábiyiy jaǵday. Tuwıttan keyingi oksitocin (“baxıt gormonı”) ana hám onıń jańa tuwılǵan nárestesi arasındaǵı baylanısqa óziniń unamlı tásirin kórsetedi. Balanı emiziw anada oksitocin dárejesin kúsheytedi, bul bolsa balaǵa bolǵan mehir hám baylanıslılıq sezimin jáne de arttıradı.
Basqa izertlewler sonı kórsetedi, hámiledarlıq hayallardıń miy dúzilisin sezilerli dárejede ózgertedi. 2016-jılǵı izertlewge qaraǵanda, hámiledarlıq waqtında miydegi kúlreń zattıń ózgeris dárejesi ananıń óz perzentine qanshelli jaqın bolıwınan dárek beredi. Biraq bul hámiledar hayal perzentin dúnyaǵa keltirgennen keyin analıq instinkti arqalı hámmesin tolıq úyrenip aladı degeni emes.
Analıq instinkti baqlanbasa she?
Perzentińiz tuwılǵannan keyin analıq instinkti «lampochkası» tosattan janbasa, qáweterleniwdiń zárúrligi joq. Analıq instinktine yamasa usı túsinikke súyeniwden góre, basqalardan, atap aytqanda «Lalu» qánigelerinen járdem hám másláhát alǵan maqqul.
Eń zárúr usınıslar bolsa tómendegishe:
- Perzentińizdiń densawlıǵı haqqında kúshli qáweter payda bolsa, pediatrǵa qońıraw etiń;
- Emiziw menen baylanıslı mashqalalarǵa dus kelgenińizde, laktaciya boyınsha másláhátshige ushırasıń;
- Eger túskinlikke tússeńiz, perinatal ruwxıy salamatlıq boyınsha psixoterapevtke múrájat etiń;
- Ana bolıw qanshelli qıyın ekenligin túsinetuǵın, hayallardı qollap-quwatlaytuǵın birlespelerden járdem alıń.
- «Lalu» mobil qosımshasın júklep alıń. Hám bárqulla gúzetip barıń. Joybar jas analarǵa bala kútimi boyınsha bilim hám kónlikpeler beriwdi óz aldına maqset etip qoyǵan.
Geyde perzentińiz benen baylanıs ornata almaw yamasa oǵan mehir sezbew tuwıttan keyingi depressiyanıń belgisi bolıwı múmkin. Eger siz ózińizdi ayıplı, biypárwa yamasa itibarsızday sezip atırǵan bolsańız, sizde tuwıttan keyingi ruwxıy salamatlıqtıń buzılıwı gúzetilip atırǵan bolıwı múmkin. Bunday jaǵdayda densawlıqtı saqlaw qánigelerine imkanı bolǵanınsha tezirek múrájat etiń.
Analıq instinktine súyeniwdiń unamsız tárepleri
Analıq instinkti bala tárbiyasında járdem beretuǵınday kórinse de, bul kórsetpege haddan tıs súyeniw negizinde unamsız aqıbetlerge alıp keliw itimallıǵı bar. Máselen, ele analıq ne ekenligin tolıq ańlamay turıp ózine artıqsha iseniw nadurıs (perzent ushın qáwipli) qarar qabıl etiwge sebep bolıwı múmkin.
Sol sebepli, «Lalu» jámááti tárepinen tayarlanǵan isenimli hám paydalı maǵlıwmatlardan mudamı paydalanıp barıń, zárúr jaǵdaylarda «Lalu» jámááti qánigelerine múrájat etiń.
