Sút islep shıǵarıw ushın denege qosımsha kaloriya kerek boladı. Belgili túrdegi awqat hám ishimlikler jas ana sútin kóbeytiw ushın paydalı esaplanadı.
Laktaciyanı kúsheytetuǵın azıq-awqatlar boyınsha ótkerilgen izertlewler júdá az. Biraq, tómendegi ónimler ana súti islep shıǵarılıwın arttırıwda járdem beriwi múmkin:
Sulı jarması
Sulı jarması ana sútin kóbeytiw yamasa arttırıwda eń jaqsı ónimlerdiń biri. Sonday-aq, ol emiziwli hayallar hám náresteler ushın áhmiyetli bolǵan azıqlıq zatlardıń dáregi esaplanadı.
Bunday azıqlıq zatlarǵa tómendegiler kiredi:
- azıqlıq talshıqlar (dánli eginlerde ushırasadı);
- temir;
- magniy;
- rux (cink).
Sarımsaq
Sarımsaq jew yamasa sarımsaq qosımshaların qabıl etiw ayırım hayallarda laktaciya procesin xoshametlep, sút kólemin arttırıwı múmkin. Onıń nátiyjeliligin dálilleytuǵın hesh qanday izertlew joq bolsa da, Hindistandaǵı ayırım adamlar sarımsaqtı galaktagog (sút kóbeytiwshi ósimlik) sıpatında paydalanadı.
Biraq, sarımsaqtı júdá kóp tutınıw ana sútiniń iyisiniń jaǵımsız bolıwına alıp keliwi múmkin. Ayırım nárestelerge bul iyis jaqpaydı hám nátiyjede olar ana sútin azıraq tutınıwı múmkin.
Arpabadiyan tuqımları
Arpabadiyan tuqımları ana súti islep shıǵarıwdı kóbeytiw ushın satılatuǵın shay hám qosımshalardıń ulıwma quramlıq bólegi bolıp tabıladı. Ayırımlar bolsa, ishtiń kebiniwin jeńillestiriw ushın arpabadiyan tuqımınan da paydalanadı.
Izertlewler sonı kórsetedi, emiziw dáwirinde arpabadiyandı qabıllaw sút hám may muǵdarın asıradı hám náresteniń kóbirek salmaq arttırıwına járdem beredi.
Paydalı: Tuwıwdan keyin hayaldı qáwipten eskertiwshi belgiler
Belokqa bay ónimler
Belok ana sútin islep shıǵarıw ushın júdá zárúr. Ol hayaldan nárestege ótip onı azıqlandıradı hám ósiwine járdem beredi. Sol sebepli, emiziwli hayallarǵa hár kúni qosımsha 25 gramm belok qabıl etiwi usınıs etiledi. Ana sútiniń turaqlılıǵın támiyinlew ushın hár kúni kóp muǵdarda belokqa bay awqatlar tutınıw kerek.
Belokqa bay azıqlıqlar:
- maysız gósh;
- máyek;
- lobiya hám yasmiq;
- tofu (sır);
- jańǵaq hám dán ónimleri
Áhmiyetli: Balalardı emshek súti menen uzaq waqıt emiziwdiń paydalı hám zıyanlı tárepleri
Jasıl japıraqlı kókónisler
Viskonsin universitetiniń Shańaraq medicinası hám jámiyet salamatlıǵı kafedrası bóliminiń maǵlıwmatlarına qaraǵanda, kóplegen miywe hám kókónisler, sonıń ishinde, jasıl japıraqlı kókónisler laktaciya procesiniń tezlesiwine járdem berip, emshek sútin kóbeytiwge xızmet etedi.
Jasıl japıraqlı kókónislerge tómendegiler kiredi:
- láblebi japıraqları;
- baqbaq;
- kapusta;
- kashnich;
- shpinat.
Azıraq tutınıw kerek bolǵan azıq-awqatlar
Kópshilik hayallar emiziw waqtında hesh qanday azıq-awqattan waz keshiw kerek emes dep esaplaydı. Basqalar bolsa ayırım azıq-awqat hám ishimlikler sút muǵdarın azaytıwı yamasa náresteniń tınıshsızlanıwına alıp keliwi múmkin ekenligin atap ótken.
Olarǵa tómendegiler kiredi:
- kofeinli ónimler, sonıń ishinde, kofe, shay hám shokolad;
- sút ónimleri;
- kók shópler, sonıń ishinde, kashnich, jalbız hám chabrec;
- tatımlıqlar, máselen, darshın hám chili;
- miyweler, sonıń ishinde, citrus, kivi, keptirilgen qara erik hám ananas;
- piyaz, kapusta, brokkoli hám gúlli kapusta sıyaqlı qarında gaz payda etiwshi kókónisler
Biraq, hár bir hayal hám náreste hár qıylı. Kúndelik tutıw hám ózgerislerdi baqlap barıw mashqalalı azıq-awqatlardı anıqlawǵa járdem beredi.
Oqıń: Awız boslıǵı kandidozı — molochnitsa
Ana sútin kóbeytiw ushın qosımsha másláhátlar
Joqarıda sanap ótilgen ónimler menen laktaciya procesin jaqsılaw múmkin, sonıń menen birge sút muǵdarın arttırıwdıń basqa da kóplegen usılları bar. Bularǵa tómendegiler kiredi:
- tuwılǵannan keyin tez arada balanı emiziw;
- náreste talabına juwap retinde tez-tez emiziw;
- súttiń turaqlılıǵın saqlap qalıw ushın emiziwden keyin sawıw;
- suw hám shireler ishiw;
- kóp dem alıw;
- meditaciya hám fizikalıq shınıǵıwlar arqalı stressti azaytıw;
- emsheklerge sáykes keletuǵın ishki kiyim kiyiw;
- alkogol hám nikotinnen bas tartıw;
- náresteniń emiw nátiyjeliligin baqlaw;
- eger emiziw menen baylanıslı mashqalalar júzege kelse, laktaciya boyınsha shıpakerden tez arada másláhát alıw;
- dári-dármaqlar qabıl etiwden aldın shıpaker menen másláhátlesiw, sebebi dári-dármaqlardıń ayırımları sút muǵdarın azaytıwı múmkin.
