Eger náresteniń dáretinde qan yamasa túkiriginde, qusıw jaǵdayında az muǵdarda qan bar ekenligin sezseńiz, sizde bunıń sebebi nede ekenligi hám bunday jaǵdaydan qáweterleniw kerek pe, joq pa, degen soraw payda bolıwı tábiyiy jaǵday.
Kópshilik nárestelerde nárestelik dáwirinde keminde bir márte bolsa da, dáretinde qan kóriniwi múmkin. Ish qatıw, kishi anal jarıqları hám basqa ayırım mashqalalar náresteniń dáretinde qan izleriniń payda bolıwına alıp keliwi múmkin.
Náresteniń dáretinde qan bolsa… Ne islew kerek?
Balańızdıń dáretinde ózgeris sezgen kúnnen baslap onı baqlap barıń. Balanıń dáretinde qan payda bolıwına bir neshe faktorlar sebep bolıwı múmkin, olardıń ayırımları qáweterge sebep bolmaydı, basqaları bolsa medicinalıq járdemdi talap etetuǵın faktorlar esaplanadı.
Siz kórgen nárse qan dep boljawdan aldın, balańız jaqında qanday awqat jegenligi haqqında oylap kóriń. Jas balalardıń as sińiriw sisteması tolıq jetilispegenligi sebepli olar jegen awqat sińirilip atırǵanda, úlkenlerdegidey, sezilerli dárejede ózgeriske ushıramaydı.
Sonıń ushın olardıń dáretinde kamalaktıń hár qanday reńin, sonıń ishinde, qızılsha hám pomidor sıyaqlı kókawatlardı jegende dáretiniń qızıl reńde bolıwın da kóriwińiz múmkin.
Mısalı, dárette mayda qan tamshıları jarıqlar bar ekenligin, dáret boylap mramorlanǵan qan bolsa basqa túrdegi mashqalalar bar ekenligin kórsetiwi múmkin. Eger bala dáretinde qan payda bolıwı dawam ete berse, shıpakerge múrájat etiń hám bala dáretinde ne kórip atırǵanıńızdı oǵan súwretlep beriń.
Qanlı dáret sebepleri
Náresteniń dáretinde qan payda bolıwınıń birneshe sebepleri bar. Olar tómendegiler:
- Azıq-awqatlar: pomidor, láblebi yamasa azıq-awqat boyawları sıyaqlı ayırım azıq-awqatlar balanıń dáretinde qızıl sızıqlar yamasa bóleklerge alıp keliwi múmkin. Solay etip, jas analar balanıń aqırǵı jegen awqatlarına itibar beriwi kerek.
- Anal jarıqlar: bul náresteniń dáretinde qan payda bolıwınıń eń kóp tarqalǵan sebeplerinen biri.
- Azıq-awqatqa allergiya: ana súti quramındaǵı yamasa ondaǵı belokqa qarata balada allergiya bolıwı múmkin, bul jaǵday allergik kolit dep ataladı.
Eger náresteniń ana sútine qarata sezgirligi joqarı bolsa, bul juwan ishektiń qabınıwına alıp keliwi hám bala dáretinde qan payda bolıwına alıp keliwi múmkin. - Ishek buzılıwı: juwan ishek silekey qabatınıń qabınıwı hám ishektiń bir bólimi ekinshi bólimine ótkende onda invaginaciya payda bolıwı náresteniń dáretinde qan payda bolıwına sebep boladı.
- Diareya: salmonella, E.coli, shigella yamasa basqa bakteriyalar isheklerdiń silekey qabatınıń qabınıwına alıp keliwi múmkin, bul bolsa balanıń dáretinde mayda qan tamshılarınıń payda bolıwına sebep boladı. Sonıń menen birge, diareya baqlanǵan balada ısıtpa, injıqlıq, awqatlanıwdan bas tartıw hám nárestelerde qáwipli suwsızlanıw jaǵdayın keltirip shıǵarıwı da múmkin.
- Ananıń qanı: Emiziwshi ananıń kókirek úrpi jarılǵan, awırǵan yamasa onnan qan aǵıp atırǵan bolsa, bunday jaǵday náresteniń densawlıǵı ushın zıyanlı jaǵdaylardı keltirip shıǵarmaydı. Biraq bul jaǵdaydı shıpaker menen másláhátlesip, saplastırıw shárt.
Náreste dáretinde qan bolsa, qashan shıpakerge múrájat etiw kerek?
Balańızda qattı qarın awırıwı bolıp, ol jılap atırǵan bolsa, dárhal shıpakerińizge múrájat etiń.
Sonday-aq, tómendegi jaǵdaylar baqlansa da shıpaker menen baylanısıń:
- Bala dáretinde kóp muǵdarda qan bolsa;
- Dáret reńi qara yamasa qatran reń kórinisinde bolsa;
- Anus yamasa tuwrı ishektiń jaraqatlanıwı bolsa;
- Dárette qan bar ekenligin eki márteden kóp kórgen bolsańız;
- Balańızda qan menen birge, diareya jaǵdayı bolsa;
- Balańız 12 háptelikten kishi bolsa.
Paydalı: Bala qashan tik turadı yaki ayaq basadı?
Emlew
Kóbinese, perzentińiz benen baylanıslı bul mashqala, júdá qattı dáret massasınıń ishek diywallarına tásir etiwi sebepli bolıwı múmkin. Eger sonday bolsa, qan dárette daq yaki uzın sızıq kórinisinde payda boladı. Bul jaǵday ádette, tez jazılatuǵın jaǵday bolıp, bunda shıpakerińiz náreste tuwrı ishegin glicerinli sham menen maylawdı, jıllı duzlı suwlı vanna yamasa steroidlı maylardı qollanıwdı usınıs etiwi múmkin.
Eger dárette qan payda bolıwına balanıń ish qatıwı sebep bolsa, dieta usılın qollanıwıńız maqul. Eger náresteńizde anal jarıǵı bolmasa, diagnoz qoyılǵannan soń, shıpakerińiz perzentińiz emleniwi ushın kerekli máslahátlerdi beriwi múmkin.
