Hámiledarlıq tolqınlandırıwshı bolıwı menen birgelikte ol dáwirdegi kóplegen ózgerislerdiń qaysı biri normal hám qaysı biri qáweterleniwge sebep bolǵanın anıqlaw hár dayım ańsat emes. Bunday ózgerislerden biri bul hámiledarlıqta bólinip shıǵıwlar bolıp, hámiledarlıq dáwirinde onıń jabısqaqlıǵı yamasa qalıńlıǵı, jiyiligi hám muǵdarı menen óz ara parıqlanıwı múmkin.
Hámiledarlıqtıń dáslepki belgilerinen biri vaginal bólinip shıǵıwlardıń kóbeyiwi bolıp, bul hámiledarlıqtıń keyingi dáwirlerinde de dawam etedi.
Ápiwayı, ádettegi qınnan bólinip shıǵıwlar leykoreya dep ataladı, olar tınıq yamasa ashıq hám iyissiz yamasa ashqıltım iyisli boladı. Vaginal bólinip shıǵıwlardaǵı ózgerisler urıqlanıwdan bir-eki hápte ótkennen keyin, hátte hayız kóriwden aldın da baslanıwı múmkin.
Hámiledarlıqtıń sońǵı háptelerinde qınnan bólinip shıǵıwlar qanlı sızıqlar menen qalıń silekey tárizli massanı óz ishine alǵanlıǵın da seziwińiz múmkin, bul «tayarlıq» dep ataladı. Bul tuwıwdıń dáslepki belgisi esaplanadı hám ol qáweterleniwge tiykar bolmaydı.
Hámiledarlıqta bólinip shıǵıwlar qásiyetiniń ózgeriwine sebep ne?
Qınnan bólinip shıǵıwlardıń gormonlar dárejesiniń ózgeriwi sebepli muǵdarı, koncentraciyası hám geyde reńi hám de iyisi de túrlishe ózgeriwi múmkin.
Hámiledarlıq dáwiri dawamında jatır moynındaǵı ózgerisler vaginal bólinip shıǵıwlarǵa da tásir etedi. Jatır moynı hám qın diywalı jumsarıwı menen organizm sırtqı infekciyalardıń aldın alıwǵa járdem beriw maqsetinde bólinip shıǵıwlardı kóbeytedi. Hámiledarlıqtıń aqırlarında balańızdıń bası jatır moynına basılıwı hám de oǵan tásir etiwi múmkin, bul da kóbinese hámiledarlıqta bólinip shıǵıwlardıń kóbeyiwine alıp keledi.
Hámiledarlıqta bólinip shıǵıwlardıń reńi boyınsha sıpatlaması
Vaginal bólinip shıǵıwlar reńiniń ózgeriwine qarap, hámiledar hayaldıń denesinde ne bolıp atırǵanı haqqında shıpakerge dáslepki maǵlıwmat beriwi múmkin. Eger hámiledar hayal óziniń hámiledarlıq dáwirin «Lalu» sıyaqlı isenimli qosımshalar arqalı baqlap barsa, bólinip shıǵıwlardıń qısqasha sıpatlaması haqqında bilimge iye bolsa, bul waqıtında maman medicinalıq járdemge múrájat etiw imkaniyatın jaratadı. Bul bolsa patologiyalıq jaǵdaylarda hámile hám ana salamatlıǵına qáwip tuwdırıwshı faktorlardıń erte saplastırılıwına hám ananıń salamat perzent dúnyaǵa keltiriwine tiykar bolıp xızmet etedi.
Vaginal bólinip shıǵıwlar ushın norma hám patologiyanı anıqlawda tiykarǵı ólshem sıpatında olardıń reńi úlken áhmiyetke iye.
1-4 hápte
Birinshi háptede qanlı bólinip shıǵıwlar bolıwı múmkin, bul tiykarında sońǵı hayızdıń aqırı. Ekinshi hápte ovulyaciya procesi baslanǵanlıǵın hám urıqlanǵan máyek kletkasınıń jatır diywalına jabısqanlıǵın kórsetetuǵın aq, biraz qızǵılt bólinip shıǵıwlar menen xarakterlenedi. Máyek kletkasınıń jatırǵa birigiwi waqtında hámiledarlıq dáwirinde bólinip shıǵıwlardıń reńi hár dayım qanlı bolmaydı. Olar kóbinese sarǵısh hám krem sıyaqlı súwretlenedi. Hámiledarlıqtıń birinshi ayınıń aqırında jáne qanlı yamasa qońır reńdegi bólinip shıǵıwlar payda bolıwı múmkin. Eger bólinip shıǵıwlar ortasha bolsa, onda qáweterleniwge tiykar joq. Bul organizmdegi gormonal ózgerislerdiń kórsetkishi.
5-20 hápte
Hár qanday qızǵılt, qońır hám qızıl bólinip shıǵıwlar norma emes hám óz-ózinen abort yamasa placentanıń erte ajıralıwın ańlatıwı múmkin. Normada tınıq, jumsaq konsistenciyalı hám iyissiz yaki az iyisli bólinip shıǵıwlar bolıwı kerek. Sarı reń, silekey, jasıl daqlar, júdá jabısqaq bólinip shıǵıwlar (barmaqlar arasında sozılatuǵın), jaǵımsız iyis jasırın jınıslıq infekciyalardan derek beriwi múmkin.
20-40 hápte
Tek ǵana tınıq hám iyissiz bólinip shıǵıwlar norma dep esaplanadı. Qınnan qanlı silekey bólinip shıǵıwı jatır moynı jaraqatlanǵanlıǵı yamasa tuwıwdıń dáslepki xabarshısı bolıwı múmkin. Sarǵısh, jasıl, qıshqıl yamasa jaǵımsız iyisli, kóbikli silekey genital infekciyanıń aktiv rawajlanıwınıń belgisi.
Qashan shıpakerge múrájat etiw kerek?
Hár qanday ádetten tıs bólinip shıǵıwlar haqqında shıpakerińizge xabar beriw júdá áhmiyetli, sebebi bul hámiledarlıq infekciyası belgisi yamasa hámiledarlıq penen baylanıslı basqa da túrli mashqalalardıń dáslepki belgisi bolıwı múmkin. Anormal bólinip shıǵıwlardıń ayırım belgileri:
- sarı, jasıl yamasa kúl reńli bólinip shıǵıwlar;
- kúshli hám jaman iyisli;
- qın átirapınıń qızarıwı, qıshıwı yamasa isiniwi menen birge keledi.
Patologiyalıq bólinip shıǵıwlar qanday da bir infekciyanıń belgisi bolıwı múmkin. Hámiledarlıq dáwirinde zamarrıq infekciyaları jiyi ushırasadı. Eger siz hámiledarlıq waqtında usı infekciya menen dus kelseńiz, shıpaker tárepinen vaginal kremler yamasa shamshalar járdeminde kompleksli emlew ilajları usınıs etiliwi múmkin. Zamarrıq infekciyası profilaktikası ushın:
- keń, hawa ótetuǵın kiyim kiyiń;
- paxtadan tayarlanǵan ishki kiyimlerden paydalanıń;
- dush, júziw yamasa túrli shınıǵıwlardan keyin jınısıy aǵzalarıńızdı qurǵatıń hám qurǵaq ekenligine isenim hasıl etiń;
- qın mikroflorasın normallastırıw ushın menyuńizge yogurt hám qatıq sıyaqlı sút ónimlerin kirgiziń.
Hámiledarlıqta patologiyalıq bólinip shıǵıwlar jınısıy jol menen juǵatuǵın kesellikler sebepli de payda bolıwı múmkin. Bul dáwirde barlıq hámiledar hayallar JJJK ushın tekseriliwi usınıs etiledi. Eger ózińizde JJJK bar dep esaplasańız, nárestege JJJK juǵıw qáwpin azaytıw ushın shıpakerińizge imkanı barınsha tezirek bul haqqında xabar beriw áhmiyetli.
Ádettegidey emes bólinip shıǵıwlar hámiledarlıqtaǵı hár qıylı asqınıwlardı da kórsetiwi múmkin. Eger hámiledar hayaldan 20-35 ml ashıq qızıl bólinip shıǵıwlar bolsa, dárhal shıpakerge múrájat etiw shárt. Bul placentanıń tómen jaylasıwınıń yamasa placentanıń waqıtınan burın ajıralıwınıń belgisi bolıwı múmkin.
Hámiledarlıqta bólinip shıǵıwlardıń xarakterine hám ondaǵı ózgerisler qashan baslanǵanlıǵına, ózgesheliklerine itibar berip barıń. Bul ózińiz hám hámileńizdiń salamatlıǵın qadaǵalap barıwda, hár qanday awır patologiyalıq jaǵdaydıń aldın alıwda, patologiyalıq jaǵdaylarda shıpakerge durıs diagnoz qoyıw hám emlew rejesin islep shıǵıwda járdem beriwi múmkin.
