Hámiledarlıqta qorıldaw tiykarınan hámiledarlıqtıń 2-trimestrinde, shama menen hámiledarlıq kalendarı boyınsha 16-háptede hámiledarlıq gormonları murın bitelip qalıwın keltirip shıǵara baslaǵanı sebepli kelip shıǵadı.
Hámiledarlıqta qorıldaw ne sebepten payda boladı?
Hayallarda hámiledarlıq gormonları artıwı, estrogen hám progesteron dárejesiniń kóteriliwi sebepli murındaǵı silekey perdeler isedi. Dem alıp atırǵan waqtıńızda, murın silekey perdelerindegi isikler sebepli qorıldaysız. Sonday-aq, qorıldaw shıǵıw itimallıǵı hámiledarlıq dáwirindegi artıqsha salmaqqa da baylanıslı. Hámiledarlıq dáwirindegi artıqsha salmaq, bas hám moyın átirapında qosımsha toqımalar rawajlanıwına sebep boladı, bul bolsa óz gezeginde qorıldawdı kúsheytiwi múmkin.
Hámiledarlıqta qorıldaw preeklampsiya belgisi me?
Kópshilik jaǵdaylarda, qorıldaw hámiledarlıqtıń jáne bir unamsız belgilerinen biri esaplanadı. Basqa áhmiyetli faktorlardan biri bolsa, qorıldaw obstruktiv uyqı apnoesinen (tamaqtıń arqa bólimindegi bulshıq etler normal dem alıw ushın júdá kóp bosasıwı nátiyjesinde) kelip shıǵadı. Bul jaǵday hawa jollarındaǵı sozılmalı isikler nátiyjesi. Izertlewler uyqı apnoesi joqarı qan basımı hám preeklampsiya (hámiledarlıq dáwirinde joqarı qan basımınıń tosattan payda bolıw jaǵdayı) menen baylanıslı ekenligin kórsetedi. Preeklampsiyanıń eklampsiyaǵa ótiwi yaki basqa asqınıwlardı keltirip shıǵarıwınıń aldın alıw ushın onı basqarıw kerek.
Preeklampsiya belgileri: tobıqlar, qollar hám betlerdiń ádettegiden ózgeshe isiwi, kóriw qábiletiniń ózgeriwi, xıralasıwı hám awqatlanıw norması menen baylanıslı bolmaǵan túrde artıqsha salmaq jıynaw. Hámiledarlıq dáwirinde uyqı apnoesi bolajaq ana hám balanı kislorodtan tosıp qoyadı, nátiyjede tuwılajaq balada júrek kesellikleri hám ókpe emboliyası sıyaqlı densawlıq mashqalalarınıń qáwpi artadı. Uyqı apnoesiniń belgileri azanda bas awırıwı menen oyanıw hám tez-tez sharshaw, nervleniw yaki este saqlaw menen baylanıslı mashqalalardı (sharshaw hám uyqısızlıq hámiledarlıqtıń ádettegi belgileri de bolıwı múmkin, ásirese birinshi hám úshinshi trimestrlerde) keltirip shıǵarıwı múmkin.
Paydalı: Hámiledarlıqta qan basımı kóteriliwi — túrleri hám profilaktikası
Tómendegi belgiler sizde baqlanıp atırǵan bolsa hám ádettegiden kóbirek qorıldap atırsańız, álbette, shıpakerińiz benen ushırasıń. Uyqı apneyasınan qıynalıp atırǵan bolsańız, shıpakerińiz Siz ushın salamat hám qáwipsiz azıwdı támiyinleytuǵın reje dúzip beredi. Sonı umıtpaw kerek, artıqsha salmaq uyqı apneyasına alıp keledi.
Hámiledarlıq dáwirinde qorıldawdıń qalay aldın alıw múmkin?
Qorıldawdı azaytıw yamasa pútkilley toqtatıw ushın ayırım usınıslardı orınlaw múmkin:
- Qaptalıńızǵa jatıp uyıqlań, shalqańızǵa jatıp uyıqlaw qorıldawdı kúsheytiwi múmkin;
- Tigirek jaǵdayda dem alıń, bul processte kópshikler menen basıńızdı biraz joqarıraq kóterip jatıw hawa jollarıńızdı tazalawǵa járdem beredi;
- Íǵallandırǵıshtan paydalanıń, ıssı yamasa suwıq temperaturada hawaǵa ıǵallıq qosıw dem alıp atırǵanıńızda qorıldawıńızdıń aldın aladı;
- Hár qıylı tútinlerden saqlanıń, hátteki, ekilemshi tútin de dem alıw jollarıńızdı tınıshsızlandırıwı hám qorıldawǵa alıp keliwi múmkin.
Hámiledarlıq waqtında qalayınsha jaqsıraq uyıqlaw múmkin?
Hámiledarlıq waqtında uyqı gigienası júdá áhmiyetli. Hár qıylı awırıwlar, tınıshsızlıqlar hám uyqısızlıqqa beyimlilik sebepli uyqıda jaqsı dem ala almay atırǵanıńızdı seziwińiz múmkin.
Paydalı: Hámiledarlıqta uyqısızlıq – sebepleri hám onı saplastırıw usılları
Hámiledarlıq waqtında jaqsıraq uyıqlaw ushın ayırım másláhátler:
- Deneńizdi bir ritmge keltiriw ushın hár kúni bir waqıtta uyıqlawǵa jatıwǵa háreket etiń. Bul ádet azanda bir waqıtta oyanıwıńızǵa da tiykar jaratadı.
- Uyıqlawdan aldın tınıshlıq keltiretuǵın uyqı ádetin qáliplestiriń. Mısalı, jıllı vanna qabıl etiw, kitap oqıw yamasa muzıka tıńlaw.
- Bólmeńizdi qarańǵı, salqın hám salıstırmalı tınısh saqlaw arqalı uyıqlaw ushın ortalıq jaratıń.
- Hár háptede ortasha 150 minutqa shekem hámiledarlıq shınıǵıwların orınlaw arqalı fizikalıq aktivlikti saqlań.
- Uyıqlawdan aldın hár qanday awqat hám ermeklerden waz keshiń.
- Tósegińiz hám jatın bólmeńizdi uyıqlaw ushın saqlań. Tósekte basqa wazıypalardı orınlaw, máselen, smartfondı «titkilip» shıǵıw. Bul uyqı aldınan miydiń dem alıwın qıyınlastırıwı múmkin.
Ulıwma alǵanda, hámiledarlıqta hár keshe 8 saattan 10 saatqa shekem uyıqlaw maqsetke muwapıq*. Eger túnde tez-tez oyansańız, bunnan da kóbirek uyqıǵa mútáj bolıwıńız múmkin.
