Gaz asqazan yamasa ishektegi ádettegi hawa, biraq, geyde náresteler isheginde hawanıń toplanıp qalıwı awırıwlı boladı. Nárestelerdiń ayırımlarında qarın isiwi baqlanıp, ishektegi gazler shıǵıp ketpegenshe uyqılay almaydı, ayırımları saatlap jılaydı.
Bul maqala arqalı biz Sizge nárestelerde gazdiń payda bolıw sebepleri, belgileri hám toplanıp qalǵan gazdi qalay shıǵarıw kerekligi haqqında paydalı maǵlıwmatlar menen bólisemiz.
Derlik barlıq nárestelerdiń organizminde gaz payda bolıp turadı. Gaz awqat sińiriw waqtında hawa kirgende, mısalı, náreste shiyshe sorǵıshtı sorıp, hawanı jutıp jibergende payda boladı. Balańızdıń qarnı isiwi normal jaǵday, qáweterleniwge orın joq.
Balalardıń qarnı kebiwiniń sebepleri neler?
Hawanı jutıw (Aerofagiya)
Nárestelerge emshek nadurıs tutılsa yamasa emizilse, shiyshe sorǵıshtan suyıqlıq iship atırǵanda olar hawanı jutıp jiberedi. Balalar kóp sóylewge háreket etip atırǵanda da hawanı jutıp jiberiwi múmkin.
Hádden tıs kóp jılaw
Náresteler jılaǵanda da hawanı jutıp aladı. Eger gaz payda bolıwına balańızdıń jılaǵanı sebep bolsa, bala tınıshlanǵannan soń jene hámmesi óz ornına túsedi.
Awqat sińiriw mashqalaları
Nárestelerdiń ishi qatqanda yaǵnıy awqat sińiriwde mashqalalar bolsa balalar organizminde gaz toplanıp qaladı.
Balalarda as sińiriw traktiniń tolıq jetilmegenligi
As sińiriw fermentleriniń jeterli bolmaǵanlıǵı esabınan, tolıq sińbegen azıq-awqat ónimleri mikroorganizmler tárepinen ıdıratıladı hám gaz payda bolıwına sebep boladı.
Asqazan-ishek virusları
Geyde viruslar as sińiriw sistemasındaǵı mashqalalarǵa sebep boladı:
- gaz toplanıwı;
- qusıw;
- ish ketiwi.
Jańa azıq-awqat ónimleri
Jańa awqatlar menen awqatlandırılǵanda, qattı awqat tutınatuǵın úlken jastaǵı balalarda jańa awqatlar menen awqatlanıw nátiyjesinde gaz toplanıp qaladı. Ayırım nárestelerde baqlanıp atırǵan tez-tez gaz toplanıp qalıw jaǵdayları, balalardıń azıq-awqatqa sezgirliginiń belgisi bolıwı múmkin.
Qarın kebiwi profilaktikası
Balalardıń isheginen gazlerdi tezirek shıǵarıp jiberiwde úy sharayatında orınlanatuǵın shınıǵıwlar járdem beredi:
- balalardıń ayaqların sheńber boylap háreketlendiriwge úndew;
- náresteni arqa tárepine jatqızıp, dizelerin búgip, ayaqların kóteriwi;
- balanıń basın asqazanınan joqarıǵa abaylap kóteriw, sonday-aq, tik halatta uslap turıw;
- mashinada balalardı seyil etiw — eger náreste mashinada júriwdi jaqsı kórse, bul balanı seyil etiwge tikkeley járdem beredi. Mashinadaǵı jumsaq terbelis awırıwdı jeńillestiriwi hám náresteni tınıshlandırıwı múmkin;
- nárestelerdi bólew — jańa tuwılǵan nárestelerdi bólew, gazlerden qutılıwǵa járdem beredi. Biraq bul jaǵday hámme nárestelerge de unamawı múmkin;
- bala júzin tómenge qaratıp kóteriw — nárestelerdi kóterip atırǵanda júzin joqarıǵa qaratpay uslap turıwları da bala denesinen gazlerdiń tezirek shıǵıp ketiwine járdem beriwi múmkin. Balanıń basın abaylap biraz kóteriw, náresteniń júzin yamasa murnın hesh nárse qaplap qalmaǵanlıǵına isenim hasıl etiw kerek;
- kishkentay qarınshasın massaj etiw — balanıń asqazanın ástelik penen sıypaw gazdiń shıǵıp ketiwin jeńillestiredi. Analar perzentleriniń qarınshasın saat tili baǵıtı boyınsha yamasa saat tili baǵıtına qarsı jumsaq háreketler menen tómenge basıwǵa urınıp kóriwi múmkin, bul náresteniń reakciyası arqalı basımdı basqarıwǵa imkaniyat beredi;
- qarnı menen jatqızıw — kishkentaylar oyaw hám qadaǵalaw astında bolǵan waqıtlarında qarnı menen jatqızıwdan paydalanıwı múmkin. Qarnı menen jatqızıw arqalı balalarda toplanǵan gazdi bosatıw ańsatlasadı. Bunnan tısqarı, bul háreketler balalardıń joqarı dene bulshıq etlerin kúsheytedi hám basın kóteriwge iytermeleydi;
- gaz aydawshı tamshılardı beriw — simetikon gaz aydawshı tamshıları ayırım nárestelerge hawa kóbiksheleriniń tez shıǵıp ketiwine nátiyjeli járdem beredi. Ata-analar balalarına belgilengen dozada kún dawamında simetikon gaz aydawshı tamshıların 4 mártege shekem beriwi múmkin;
- izertlewler sonı kórsetedi, probiotik qosımshalar ishek mikroorganizmlerin teńlestiriw arqalı náresteler isheginde hawa toplanıp qalıwınıń aldın aladı. Analar dáslep pediatr menen másláhátlesip, soń balaǵa probiotikler beriwi múmkin.
Eger siz úy sharayatında perzentińizge járdem bere almasańız, shıpakerlerdiń kómeginen paydalanıwıńızǵa tuwra keledi.
