Ekzema (sonday-aq, atopik dermatit dep te ataladı) deneniń qálegen jerinde payda bolıwı múmkin bolǵan, qurǵaq, qıshıw menen ótetuǵın teri bórtpesi, ol ádette, bet hám qol-ayaq terisinde payda boladı. Ekzema hár bir adamda, sonıń ishinde, nárestelerde de bolıwı múmkin.
Balalarda ekzema sebepleri
Ayırım faktorlar adamlarda ekzema bórtpesine beyimliliktiń payda bolıwına sebep boladı, sonıń ishinde:
- Shańaraq tariyxında ekzema bolsa;
- Shańaraq tariyxında ıssılıq bórtpesi, allergiya yamasa astma bolsa;
- Turaqlı túrde suwıq hám ıǵal klimatta jasaw;
- Qorshaǵan ortalıqta qozdırıw qásiyetin keltirip shıǵarıwshı zatlardıń bolıwı (mısalı, tútin, kir juwıw poroshokları, iyisli zatlar hám záhárli zatlar).
Paydalı: Uyqı waqtında jılap atırǵan náresteni qalay juwatıw múmkin?
Balalar ekzeması qanday kóriniste boladı?
Ekzema, kóbinese 6 ayǵa shekem bolǵan nárestelerde bas hám bet terisinde payda boladı. Bórtik, ádette, qızıl bolıp, kóbikshe kórinisinde, sońınan bul kóbiksheden suyıqlıq aǵıp shıǵıwı hám ústinen qabıq penen qaplanıw jaǵdayı baqlanadı.
Ósip atırǵan nárestelerde ekzema dize hám shıǵanaq aymaǵında payda bolıwı múmkin. Ekzemanıń qıshıwı nárestede tınıshsızlanıwdı keltirip shıǵaradı. Náreste ne bolıp atırǵanın ayta almaydı, biraq olardıń is-háreketinen ekzema olarda qolaysızlıq keltirip shıǵarıp atırǵanın kóriw múmkin.
Ekzema bórtikleriniń belgileri tómendegilerdi óz ishine aladı:
- Uyqı mashqalası;
- Teridegi infekciyalar (bórtikti qırıw yaki ısqılaw nátiyjesinde túsken infekciya);
- Tınıshsızlanıw.
Qızıqlı: Balalardı emshek súti menen uzaq waqıt emiziwdiń paydalı hám zıyanlı tárepleri
Ekzemanı emlew usılları
Ekzemanı tikkeley emlep bolmaydı, biraq ondaǵı qıshıw, teriniń qurǵaqlıǵı, tırnaw jaǵdayı menen gúresiw hám infekciya túsiwiniń aldın alıw arqalı bir neshe emlew usılları bar.
Bunday emlew usılları tómendegilerdi óz ishine aladı:
- Bala terisin jaqsı ıǵallanǵan halda saqlań: perzentińizdi jıllı suwda shomıldırıń hám terisin qurǵaq etip súrtiń, soń dárhal ıǵallandırǵısh kremlerden paydalanıń;
- Ulıwma qıshıw qásiyetin keltirip shıǵarıwshı zatlardan saqlanıń: náresteńizdiń kir kiyimlerin juwıwda iyissiz sabın hám juwıw qurallarınan paydalanıń. Perzentińizdiń kiyimleri jumsaq paxta gezlemelerinen bolsın;
- Ulıwma allergenlerden saqlanıń: úyińizdi, ásirese, balańız bólmesin shań hám úy haywanları júninen tez-tez tazalań;
- Tırnaw jaǵdayınıń aldın alıń: eger náreste terisin tırnaǵısı kelse, onıń tırnaqların qısqartıń hám qolların shulıq yamasa qolǵaplar menen jawıp qoyıń. Bunnan tısqarı, terige ıǵal gezleme oramların qollawıńız múmkin. Qıshıw kúshli bolsa, pediatrıńız antigistamin preparatların usınıs etiwi múmkin;
- Terini emlew usılları: pediatrıńız perzentińiz terisine qollaw ushın steroidlar hám steroid bolmaǵan qurallardı qollanıwdı usınıs etiwi múmkin;
- Infekciyanıń aldın alıw: úy sharayatında ekzemanı emlewdiń eń nátiyjeli jolı — aǵartıwshı vanna bolıp esaplanadı. Olar kesellik tosattan kúsheygende onıń ótiwin jeńillestiriw yamasa aldın alıw ushın qollanılatuǵın emlew usılı bolmasa da, ekzemanı emlew rejiminiń bir bólegi bolıwı múmkin.
Áhmiyetli: Bala rawajlanıw basqıshları: Esitiw hám dawıs shıǵarıw
Qashan shıpakerge múrájat etiw kerek?
Ekzema bórtpesi, ásirese, ol tırnalǵan bolsa, onda infekciya payda bolıwı múmkin. Infekciyalardı saplastırıwda antibiotikler hám basqa da dárilerdi qollanıw shıpaker tárepinen usınıs etiledi. Eger perzentińizdiń terisinde infekciya payda bolǵanın sezseńiz, pediatrıńızǵa múrájat etiń.
Nárestelerde ekzema profilaktikası
Ekzemanıń óziniń kelip shıǵıwınıń aldın alıwdıń ilajı joq, biraq, onıń qozǵatıwshıların anıqlaw hám keselliktiń kúsheyiwiniń aldın alıw múmkin. Qozǵatıwshı faktorlardı azaytıwdıń ayırım usılları tómendegilerden ibarat:
- Perzentińizdi qurǵaq hám suwıq hawa-rayı sharayatınan uzaǵıraq uslań;
- Eger perzentińiz 6 aylıq yamasa onnan úlken bolsa, oǵan jılına bir márte grippke qarsı emlew ilajın infekcionist penen másláhátlesip ótkeriń;
- Úyińizdegi ulıwma qozǵatıwshı, qıshıwdı keltirip shıǵaratuǵın faktorlardan qashıń hám hár bir ónimniń etiketkaları menen tanısıp shıǵıń;
- Kir juwıw quralları qaldıqları kiyimlerde qalmawı ushın kiyimlerdi eki márte juwıń;
- Perzentińizdiń allergiyası qaysı zatlarǵa bar ekenligin biliw ushın allergolog penen másláhátlesken halda onda sınamalar ótkeriń;
- Náreste ekzemasın kúsheytetuǵın faktorlar qaysı ekenligin anıqlaw maqsetinde perzentińizdi turaqlı túrde baqlap barıń;
- Kishkentayıńızdıń terisin ıǵallap turıń.
